Sa sulod na sang sobra 130 ka tuig, ang mga Saksi ni Jehova nagatipon sa mga kombension nga ginahiwat kada tuig. Subong, ang mga programa may sobra 40 ka sarisari nga mga pamulongpulong, nga may nalakip nga musika, interbyu, kag mga video. Para makabenepisyo kag mapabakod ang mga naga-attend sa programa, dapat maathag ini nga ‘mabatian kag makita.’ (Lucas 2:20) Paano ginagamit ang imo mga donasyon para masigurado nga ang tanan makabenepisyo sa sini nga mga kombension, bisan diin man sila nagaistar?

 Madamo nga moderno nga mga stadium kag mga arena sa Western nga mga pungsod ang may ara na mga audio/video system. Ti ngaa naga-install pa kita sang aton kaugalingon nga equipment kon arkilahan naton ini nga mga lugar para sa kombension? Si David, nga nagaobra sa World Headquarters Broadcasting Department, nagsiling: “Pila lang sa mga pasilidad nga ginaarkilahan namon ang gindesinyo para mamati ang mga naga-attend sa sobra anom ka oras nga programa nga puro lang hambal. Halimbawa, sa mga sports venue, ang public address system ginagamit para sa malip-ot nga mga announcement kag pagpatokar sang mga musika. Ang ila mga video screen ginagamit para mag-display sang score sang hampang, advertisement, kag mga replay. Pero, gusto namon nga makita sang mga audience ang malawig nga mga video kag mabatian nila kag maintiendihan sing maayo ang kada tinaga sang humalambal.”

 Sarisari ang lugar sang kada kombension, gani ang kada audio/video system ipasibu man. Kon nakapili na sang lugar nga hiwatan sang kombension, ang mga Broadcasting Department sa aton mga branch office magadesisyon kon diin papungkuon ang mga maga-attend. Ibase ini sa ginabulubanta nga kadamuon sang maga-attend kag sa kapasidad sang pasilidad. Dayon, ginaplanuhan sing maayo sang mga brother kon diin iplastar ang mga speaker kag mga video screen kag kon paano ini ikonek sa isa kag isa. Ginalista man nila ang tanan nga equipment nga kinahanglanon para siguraduhon nga makita kag mabatian sang tanan ang programa.

 Mas komplikado pa gid ang pagplastar sang mga audio/video system sa mga kombension diin ang mga programa ipresentar sa madamo nga lenguahe. Kon i-interpret ang programa sa lain nga lenguahe, kinahanglan nga makita kag mabatian sang mga interpreter ang programa. Dayon i-transmit nila ini sa iban nga lenguahe kag mapamatian paagi sa isa ka estasyon sang radyo. Sa bulig sang pinasahi nga media player, ang mga video dungan nga makita sang tanan nga naga-attend, bisan pa ang audio gina-transmit sa walo ka sarisari nga lenguahe. “Komplikado gid ini katama,” siling ni David, kag “ang mga boluntaryo nga naga-operate kinahanglan nga nahanas sing maayo.”

 Madamo nga mga branch office ang may suplay sang audio/video equipment nga ginagamit kada tuig. Kon amo sina ang kahimtangan, ginasaylosaylo sang mga brother ang tanan nga bahin sang equipment halin sa isa ka kombension pakadto sa masunod. Sa branch lang sang United States, sobra $200,000 a kada tuig ang ginagasto para saylusayluhon ang mga equipment para sa kombension. Pero, mas barato ini sangsa magbakal kag magmentinar sang dugang nga mga equipment. Si Steven, nga nagbulig sa pagdumala sa audio/video sa isa ka kombension sa Canada, nagsiling, “Ginhimo gid sang amon audio/video team ang tanan para siguraduhon nga ang kada nut, tuerka, kable, kag ang iban pa nga gamit naisip, nahalungan, nahimos sing maayo, kag nahanda sa masunod nga programa.”

 Ang pag-arkila sang mga audio/video equipment mahal kaayo, kag sa masami indi ini de-kalidad kag wala ini namentinar sing maayo. Bangod sina, ginabakal namon ang mga equipment nga kinahanglanon namon. Sining karon lang, ang presyo sang indoor nga LED video wall nga may kalaparon nga singko por tres metros nagabili sing mga $24,000, kag ang isa ka 15 metros nga kable sang microphone nagabili sing mga $20. Gani, ang Broadcasting nagapakig-angot anay sa Purchasing Department para ‘sumahon ang gasto’ antes magbakal sang equipment. (Lucas 14:28) Halimbawa, ano kadamo nga tawo ang makabenepisyo sini nga equipment? Ang pagbakal bala sang bag-o nga equipment amo gid ang solusyon? May bastante bala nga talaguan para sa equipment, kag may ara bala sang gamit kag nahanas nga mga boluntaryo para magmentinar sini?

 Para indi dali maguba ang mga audio/video equipment kag makakinot sa gindonar nga mga pondo, regular kami nga nagahimo sang electronic kag mechanical repair. Ginabutang man namon ang mga equipment sa mabakod nga mga suludlan para malikawan ang damage kon magsaylosaylo, kag ini nga mga suludlan ginakay-o man kon kinahanglanon.

 Nagdayaw gid ang mga indi Saksi sa kalidad sang audio/video sa aton mga kombension. Halimbawa, sa isa ka kombension, ang empleyado sang isa sa pinakadaku nga mga broadcaster sa bilog nga kalibutan nagkomento sa kalidad sang aton mga video kag sang mga impormasyon sa sini. “Nakibot gid sia sang nabal-an niya nga ang mga miembro sang amon team mga boluntaryo tanan kag indi mga propesyonal,” siling ni Jonathan, nga nagabulig sa pagplastar kag pag-operate sa mga audio/video equipment sa mga kombension. “Siling niya nga sa iya kompanya, lima ka adlaw ang kinahanglan para ma-install ang gin-install namon sing isa lang ka adlaw kag tunga.” Sa isa naman ka kombension, ang facility manager nagsiling, “Madamo na nga mga propesyonal sa music kag video ang nakaagi diri, pero subong pa lang ako nakakita sang mga tawo nga kabalo gid sang ila ginahimo!”

 Paano ka nakabenepisyo sa mga audio/video system sa kombension? Basi pareho ang imo ginabatyag kay David, nga taga-England. Sia nagsiling: “Nagaedad na ako sing 88 kag naga-attend ako sa kombension halin sang una asta subong. Pero subong, mas nahapusan pa gid ako magpokus sa programa. Salamat sa manami nga mga video, kay wala ako natak-an sa programa kag mas maathag ini kag wala nagabag-o ang mensahe.” Si Micheal, nga taga-Nigeria, nagsiling, “Bangod mabatian na gid sang mga kauturan ang mga humalambal kag makita ang mga video, wala na sila nabudlayan magpokus kag wala na nagakadula ang ila interes sa programa.”

 Sa sini nga tuig, sa imo pag-attend sa ‘Ibantala ang Maayong Balita!’ nga Rehiyonal kag Espesyal nga mga Kombension, pamensari ang tanan nga panikasog nga ginhimo para buligan ka nga mabatian kag makita ang programa. Ginapasalamatan gid namon ang imo mga donasyon, lakip ang mga donasyon paagi sa donate.dan124.com, nga nakabulig para mangin posible ini tanan. Salamat gid.