“Nanamian gid ’ko sang amon Kingdom Hall!” siling ni Nicole, isa ka pamatan-on nga sister sa Colombia. “Amo ini ang lugar nga makaupod ko ang akon espirituwal nga pamilya.” Amo man bala sina ang nabatyagan mo?

 Sa bilog nga kalibutan, ang mga Saksi ni Jehova nagatipon sa mga 63,000 ka Kingdom Hall. Ini nga mga bilding komportable gid nga lugar para masimba ang Dios. Pero indi lang amo sina. Ang isa ka regular payunir nga si David sa Colombia nagsiling: “Mas nanamian ang mga tawo sa aton mensahe bangod sang aton Kingdom Hall. Madamo nga bisita ang nagdayaw sang nakita nila kon paano naton ginamentinar ini nga bilding sa maayo nga kondisyon.” Wala lang ini natabuan. Nagapangabudlay gid kita para matinluan kag mamentinar ang aton mga Kingdom Hall. Paano naton ginahimo ini?

 Ang mga kongregasyon nga nagagamit sang Kingdom Hall amo ang nagamentinar sini. Para mahimo ini, ginatinluan sing regular sang mga kauturan ang ila Kingdom Hall. Nagahimo man sila sang preventive maintenance kag ginakay-o ang gagmay nga mga guba.

 Para mabuligan ang mga kongregasyon sa pagmentinar sang ila mga Kingdom Hall, nagaasayn ang Local Design/Construction Department (LDC) sang mga brother para mangin maintenance trainer. Anom asta pulo ka Kingdom Hall ang ginaasayn sa kada maintenance trainer. Ginabisitahan niya ang kada isa sini kag ginahanas ang mga publisher sa mga kongregasyon kon paano atipanon ang ila nga Kingdom Hall. Kada tatlo ka tuig, gina-evaluate niya ang kada bilding kag ginatan-aw kon may guba nga kinahanglan kay-uhon kag kon safe pa bala ini gamiton.

 Nagapasalamat gid ang aton mga kauturan sa training nga ginahatag sang mga maintenance trainer. Ang isa ka sister sa India nga si Indhumathi, nagsiling: “Kanami gid sang training. Nalipay gid kami nga matun-an kon paano atipanon ang amon Kingdom Hall.” Si Evans nga isa ka brother sa Kenya, nagsiling: “Natun-an namon kon paano malikawan ang daku nga gasto paagi sa pagkay-o sang gagmay nga mga guba antes pa ini magdaku.”

 Ang gasto sa kada tuig sa paggamit kag pagmentinar sang isa ka Kingdom Hall mahimo maglab-ot sa ginatos asta sa linibo ka dolyar, a depende kon diin nga lugar ang Kingdom Hall, kon ano na ini ka dugay, kag kon pila ka kongregasyon ang nagagamit sini. Paano ginabayaran ang mga galastuhan sini?

 Ang pagmentinar sa Kingdom Hall ginasuportahan sang mga donasyon. Si Alexander, nga isa ka brother sa Kazakhstan, nagsiling: “Ang bahin sang pondo ginagamit para sa bayad sa Internet, kag iban pa, pareho sang tubig kag kuryente. Ang iban pa nga ginagastuhan amo ang importante nga mga gamit pareho sang mga tisyu, gloves, mga gamit sa pagpaninlo, kag mga pinta.” Ang sobra nga kuarta gina-donate sa worldwide work para makabulig sa mas daku kag mas mahal nga mga maintenance project sa bilog nga kalibutan.

 Kon ang bili sa pagmentinar sang isa ka Kingdom Hall magsobra sa ginagasto nga kuarta sa sulod sang duha ukon tatlo ka bulan kon ginagamit ini, ang mga gulang nagapamangkot kag nagapabulig sa LDC maintenance trainer. Kon aprobahan sang LDC ang proyekto, ginasuportahan ini sang donasyon halin sa worldwide work. Sang 2023 nga tuig sang pag-alagad, 8,793 sini nga mga proyekto ang natapos, kag $76.6 ka milyon ang nagasto. Ari ang duha sa sini nga mga proyekto.

 Sa Angola, ang 15 ka tuig na nga Kingdom Hall may madamo nga guba. Kinahanglan na islan ang linya sang kuryente, may mga crack ang pader, kag nagreklamo ang mga kaingod nga nagakadto sa ila balay ang tubig halin sa Kingdom Hall kon nagaulan. Ang LDC nag-organisar sang proyekto para makay-o ini nga mga guba. Ang nagasto sa sini nga proyekto naglab-ot sa $9,285. Nagpasalamat kag nagdayaw gid ang mga kaingod kon paano ini ginhimo.

 Sa Poland, ang atop sang Kingdom Hall nagatulo, kag indi na makay-o ang carpet. Gin-aprobahan sang LDC ang proyekto para makay-o kag himuon nga waterproof ang atop kag islan ang carpet. Ang nagasto sa sini nga proyekto naglab-ot sa $9,757. Bangod ginkay-o ini nga mga guba, indi na kinahanglan sang daku nga renovation para sa sini nga Kingdom Hall sa masunod nga pila ka tuig.

 Ang pagmentinar wala lang nagabulig sa pagkinot sang mga donasyon kundi nagadayaw man ini kay Jehova. Si Shaun, nga isa ka brother sa Tonga, nagsiling: “Bangod sang ginahimo naton nga pagmentinar, masimba naton si Jehova sa isa ka matinlo, mahipid, kag manami nga Kingdom Hall. Bangod sini mas makilala pa gid sang mga tawo si Jehova. Nalipay gid kami kon ginaagda namon ang iban nga mga tawo sa Kingdom Hall.”

 Tanan kita makapaninlo kag makamentinar sang lugar nga aton ginagamit sa pagsimba. Si Marino, nga isa ka maintenance trainer sa Australia, nagsiling: “Tanan kita may pribilehiyo gid sa sining matahom nga asaynment sa pag-atipan sang aton mga Kingdom Hall. Kon ginahimo naton ini, daku gid ang mabulig naton sa pagkinot sang mga donasyon para magamit ini kon diin ini mas kinahanglanon.”

 Si Joel, nga isa ka brother sa India, nalipay gid sa pagmentinar sang ila Kingdom Hall. Nagsiling sia: “Ang pag-obra upod sa akon mga kauturan, nakabulig sa akon nga maimadyin ang kabuhi sa bag-ong kalibutan.” Si Nicole, nga ginsambit kaina, nagsiling: “Sining karon lang, nagbulig ako sa pag-mop sang salog samtang ginakay-o sang mga brother ang guba sa CR. Bisan pa indi ako ang nagkay-o sa guba, pero nakabulig ako para malikawan ang aksidente.”

 Kon gusto mo mag-volunteer sa pagmentinar sang inyo Kingdom Hall, istoryaha ang inyo mga gulang. Dugang pa, ang imo mga donasyon makabulig sa pagmentinar indi lang sa inyo Kingdom Hall kundi pati man sa mga Kingdom Hall sa bilog nga kalibutan. Maka-donate ka paagi sa mga donation box sa inyo Kingdom Hall ukon paagi sa donate.dan124.com. Salamat gid sa imo kaalwan.