Natawo ako sa San Juan Chancalaito, isa ka gamay nga banwa sa estado sang Chiapas, Mexico. Ang akon pamilya halin sa etniko nga grupo sang mga Maya nga ginatawag Chol. Ikalima ako sa dose nga mag-ulutod. Sang bata ako, kami sang akon mga utod nagtuon sing Biblia sa isa ka Saksi ni Jehova. Pero wala ko ginsunod ang mga natun-an ko sa Biblia.

 Pag-edad ko sing 13, nagadroga na ako kag nagapangawat. Sa sina nga tion naglayas ako sa amon kag kon diindiin lang ako nagaistar. Pag-edad ko sing 16, nag-obra ako sa talamnan sang marijuana. Mga isa ka tuig na ako diri sang isa ka gab-i, samtang naga-transport kami sang daku nga shipment sang marijuana sa sakayan, gin-atake kami sang armado nga mga lalaki nga kompetensia namon sa pagbaligya sing droga. Ginpaarakan nila kami. Pero nakaluwas ako kay naglumpat ako kag nagsalom sa suba. Dayon nagpaanod ako sa sulog para makapalagyo. Pagkatapos sini nga insidente, nagkadto ako sa United States.

 Sang didto na ako sa States, padayon ako nga nagbaligya sing droga kag grabe pa gid ang mga inagihan ko. Pag-edad ko sing 19, gin-aresto ako kag ginpriso sa sala nga pagpangawat kag sa plano nga pagpatay. Sang ara na ako sa prisuhan, nag-entra ako sa isa ka gang kag pirme nagapangsapote. Gani ginsaylo ako sa guardiado gid nga prisuhan sa Lewisburg, Pennsylvania.

 Sang ara na ako sa Lewisburg, naglain pa gid ang mga ginpanghimo ko. Bangod may mga pika na ako sang gang, mahapos ako nga nakaentra sa amo gihapon nga gang sa sini nga prisuhan. Nangin bayolente pa gid ako kag pirme lang nagaentra sa rambol. Isa ka bes, nag-inaway kami sang iban nga gang. Grabe gid ang rambol. Naglinampusanay kami sing mga baseball bat kag mga dumbbell. Para mag-untat kami, naggamit ang mga guardia sing tear gas. Pagkatapos sini, ginbutang ako sa special management unit para sa makatalagam nga mga priso. Grabe ako mangakig kag maparas maghambal. Maabtik ako sing kamot kag nanamian gid ako mangsapote. Kag wala ako nagakakonsiensia sa akon ginahimo.

 Sa special management unit, ara ako pirme sa selda, gani nagabasa ako sing Biblia para malingaw. Sang ulihi, ginhatagan ako sang guardia sang libro nga Mahimu Ka Mabuhi sing Dayon sa Paraiso sa Duta. a Samtang ginabasa ko ini, nadumduman ko ang madamo nga butang nga natun-an ko sa Biblia upod sa mga Saksi sang bata pa ako. Dayon napensaran ko ang malain ko nga mga ginpanghimo bangod sa akon pagkabayolente. Nadumduman ko man ang akon pamilya. Ang akon duha ka utod nga babayi nangin Saksi ni Jehova. Sa pensar ko, ‘Mabuhi sila sing wala katapusan.’ Dayon, ginpamangkot ko ang akon kaugalingon, ‘Ti paano na lang ako?’ Sugod sadto, gusto ko na gid magbag-o.

 Pero nabal-an ko nga kinahanglan ko ang bulig para magbag-o. Gani nangamuyo ako kay Jehova nga Dios kag nakiluoy nga buligan niya ako. Dayon, nagsulat ako sa branch office sang mga Saksi ni Jehova sa United States kag nangabay sing pagtuon sa Biblia. Naghimo sing kahimusan ang branch office nga makadtuan ako sang mga Saksi halin sa kongregasyon nga malapit sa prisuhan. Pero sadto nga tion, indi ako puede magbaton sing bisita luwas lang kon pamilya ko. Gani ang isa ka Saksi sa sina nga kongregasyon, nagapadala sa akon sing makapalig-on nga mga sulat kag mga literatura base sa Biblia. Nagpalig-on gid ini sa akon determinasyon nga magbag-o.

 Ang pinakadaku nga pagbag-o nga ginhimo ko amo ang pagbiya sa gang nga madugay ako nga nangin miembro. Ang lider sang gang ara man sa special management unit. Isa ka bes, samtang nagapahunayhunay kami gin-istorya ko sia kag ginsilingan nga gusto ko mangin isa sa mga Saksi ni Jehova. Nakibot gid ako sa iya ginsiling: “Kon para ina sa Dios, wala na ako sing mahimo. Indi ta ka pagpunggan. Pero kon gusto mo lang nga makagua sa gang, kabalo ka na sang mangin resulta.”

 Sa sulod sang duha ka tuig, nakita sang mga nagaobra sa prisuhan ang mga pagbag-o sa akon batasan. Gani nangin mabuot sila sa akon. Halimbawa, wala na nila ako ginapusasan kon ginaeskortan nila ako pakadto sa palaliguan. Ginsilingan pa gani ako sang isa ka guardia nga padayunon ko ang maayo ko nga ginahimo. Sang katapusan ko nga tuig sa prisuhan, ginsaylo ako sa minimum-security satellite camp nga malapit sa mayor nga prisuhan. Sang 2004, pagligad sang napulo ka tuig, ginhilway ako kag gin-deport pabalik sa Mexico sakay sa bus para sa mga priso.

 Pag-abot ko sa Mexico, ginpangita ko ang Kingdom Hall sang mga Saksi ni Jehova. Wala ako sing maayo-ayo nga bayo. Gani sa una ko nga pagtambong sa miting, ginsuksok ko ang uniporme ko sadto sa prisuhan. Pero kanami sang mga Saksi kay gin-abiabi gid nila ako bisan amo sadto ang hitsura ko. Kaayo gid sa ila kag sa pensar ko amo ini ang matuod nga mga Cristiano. (Juan 13:35) Sa sina nga miting, naghimo ang mga gulang sing kahimusan para matun-an ako sa Biblia. Pagligad sang isa ka tuig, nabawtismuhan ako bilang isa sa mga Saksi ni Jehova sang Septiembre 3, 2005.

 Sang Enero 2007, nag-alagad ako bilang bug-os tion nga ministro, kag 70 ka oras kada bulan ang ginagamit ko para tudluan ang iban sang Biblia. Sang 2011, naggradwar ako sa Bible School for Single Brothers (subong ginatawag School for Kingdom Evangelizers). Nakabulig gid ini sa akon para mahimo ko ang akon mga responsibilidad sa kongregasyon.

 Sang 2013, napangasawa ko ang akon pinalangga nga si Pilar. Daw indi sia makapati kag daw naham-ot kon istoryahan ko sia parte sa mga ginpanghimo ko sang una. Wala ko na gid ginbalikan ang akon mga bisyo sadto. Kumbinsido kami sang akon asawa nga may gahom gid ang Biblia sa pagpabag-o sang kabuhi. Kag isa ako sa ebidensia.—Roma 12:2.

 Pamatyag ko para gid sa akon ang ginsiling ni Jesus sa Lucas 19:10. Ini nagasiling: “Nagkari [ako] sa pagpangita kag sa pagluwas sa nadula.” May direksion na ang akon kabuhi subong. Kag wala na ako nagapangsapote. Nagapasalamat gid ako sa Biblia kay bangod sini nakita ko ang pinakamaayo nga katuyuan sa kabuhi, natigayon ko man ang maayo nga relasyon sa iban, kag labaw sa tanan ang maayo nga kaangtanan sa akon Manunuga, si Jehova.