Una nga bes nga natestingan ni Ed kag sang iya asawa nga si Jennie ang phone witnessing sang 2010. a “Wala gid ’ko nag-enjoy,” siling ni Jennie. “Ginsilingan ko ang akon bana, “Indi na ’ko magliwat!’” Amo man sina ang nabatyagan sang iya bana. Sia nagsiling, “Wala ako nanamian kon tawgan ako kag baligyaan, gani daw indi ko maimadyin nga magpanawag sa iban para preachingan sila.”

 Dayon nagsugod ang COVID-19 nga pandemic, kag indi na makapamalaybalay ang mga Saksi ni Jehova. Pero bilang pagsunod sa sugo ni Jesus nga ibantala ang maayong balita, nagpadayon sila sa pagministeryo, sa masami paagi sa letter writing kag telephone witnessing. (Mateo 24:14; 28:19, 20) Bisan ang Cristianong mga miting, pati man ang mga miting para sa pag-alagad sa latagon, ginahimo paagi sa videoconference. Pero sa isa sa sina nga mga miting, gintestingan liwat ni Ed ang phone witnessing bisan pa nabudlayan sia sa sini. Ano ang nabatyagan niya antes sia magtawag sa telepono? “Grabe gid ang akon nerbios gani nangamuyo ako sing bulig!” siling niya. “Dayon nagtawag ako, kag nagkilalahay kami ni Tyrone.” b

 Si Tyrone kag ang iya asawa nga si Edith, nagaistar sa kaumhan sang Kentucky, U.S.A. Nagaedad sia sang 83, kag indi na sia maayo makakita. Pero, nagsugot sia nga magpa-Bible study. Ginabasa niya ang tulun-an sa bulig sang magnifying glass kag regular sila nga naga-Bible study ni Ed sa telepono.

 Mga isa ka bulan sang ulihi, si Tyrone kag si Edith nag-attend sa miting sang kongregasyon. Pero, bangod wala sila sang Internet, naga-connect sila paagi sa telepono. Ngaa nag-upod man si Edith?

 Kon mag-Bible study si Tyrone, mabatian ni Ed kag ni Jennie nga ginatudluan ni Edith si Tyrone sang sabat kag ginabuligan sia sa pagpangita sang mga teksto sa Biblia. Pero wala sia naga-Bible study. “Mabatyagan namon sa tingog ni Edith nga masubo sia,” siling ni Jennie, “pero wala kami kabalo ni Ed kon ngaa.”

 Isa ka bes, napensaran ni Jennie nga istoryahon si Edith. Gani sang pamatyag niya puede sila makaistoryahanay, ginpangabay niya si Ed nga ihatag sa iya ang telepono. Siling niya, “Tyrone, mabatian ko ang tingog sang imo asawa, basi puede ko sia mapangabay nga magbasa sang teksto ukon magkomento.”

 Wala lang dugay, naghambal si Edith sa telepono. “Dugay ko na gusto nga maistorya ka,” siling niya sa mahinay nga tingog. Dayon nagsiling sia: “Saksi ni Jehova ako. Pero 40 ka tuig na ako nga inactive.”

 Nakibot gid si Jennie. “Utod ta ka gali!” siling niya, kag dayon naghibi sila.

 Pagkatapos sina, ginhatagan ni Ed si Edith sang brosyur nga Magbalik kay Jehova. Sa masunod nga mga semana, natalupangdan ni Ed kag ni Jennie ang positibo nga mga pagbag-o kay Edith. “Sadto, kasubo gid sang iya tingog,” siling ni Ed. “Pero subong malipayon na sia.” Nangin suod liwat si Edith kay Jehova, kag isa na sia subong ka malipayon nga manugbantala sang maayong balita. Ang iya bana nabawtismuhan bilang isa sa mga Saksi ni Jehova sang Hulyo 2022.

 Kon dumdumon ni Ed ang iya reaksion sadto sa phone witnessing, madumduman niya dayon ang pag-istoryahanay nila ni Tyrone. Sang ginbasa ni Ed kay Tyrone ang Juan 6:44 kag ginpaathag nga ginabuyok ni Jehova ang mga tawo sa kamatuoran, nag-ugyon si Tyrone, kag nagdugang: “Dugay ko na ginahulat ang tawag mo.” Nalipay man si Jennie nga gintinguhaan nila sang iya bana ang pag-phone witnessing bisan pa ginanerbios sila. “Kon may nabudlayan kita pero ginahimo naton ini para kay Jehova, pakamaayuhon gid niya kita,” siling niya.