Ginapilit Bala sang mga Saksi ni Jehova ang mga Tawo nga Islan ang Ila Relihion?

I-PLAY

Wala. Pareho sa ginsiling sa amon panguna nga magasin nga Ang Lalantawan: “Ang pagpilit sa mga tawo nga islan ang ila relihion indi husto.” a Wala namon ginapilit ang mga tawo bangod sa masunod nga mga rason:

Wala ginpilit ni Jesus ang mga tawo nga batunon ang iya mga panudlo. Kabalo sia nga diutay lang ang magabaton sang iya mensahe. (Mateo 7:13, 14) Sang nasandad ang pila niya ka disipulo sa iya ginsiling, ginpabay-an niya sila nga maglakat imbes nga piliton sila.—Juan 6:60-62, 66-68.
Gintudluan ni Jesus ang iya mga sumulunod nga indi pagpiliton ang iban nga islan ang ila pagtuluuhan. Imbes nga piliton ang mga tawo nga batunon ang maayong balita sang Ginharian, dapat pangitaon sang iya mga disipulo ang mga tawo nga magabaton sang ila mensahe.—Mateo 10:7, 11-14.
Wala sing pulos ang pag-ilis sang relihion kon napilitan lang, kay kinabubut-on lang nga pagsimba ang ginabaton sang Dios.—Deuteronomio 6:4, 5; Mateo 22:37, 38.

Pagpangumbertir bala ang amon ginahimo?

Ginatuman namon ang sugo sang Biblia, gani ginapalapnag namon ang mensahe sini “tubtob sa pinakamalayo nga bahin sang duta,” kag ginahimo namon ini “sing dayag kag sa mga balay.” (Binuhatan 1:8; 10:42; 20:20) Pareho sang mga Cristiano sadto, kon kaisa ginaakusar man kami sing ilegal nga pagpangumbertir. (Binuhatan 18:12, 13) Pero ini nga mga akusasyon indi matuod. Wala namon ginapilit ang amon pagtuluuhan sa kay bisan sin-o. Sa baylo, nagapati kami nga ang mga tawo dapat tugutan nga magkuha sang ihibalo para makadesisyon suno sa ila natun-an.

Wala namon ginapilit ang mga tawo nga islan ang ila relihion, indi kami pulitikal nga hublag nga nagapakunokuno nga relihion, kag wala kami nagatanyag sing materyal ukon posisyon sa komunidad para mang-engganyo sing bag-o nga mga miembro. Indi kami pareho sa iban nga nagasiling nga Cristiano sila pero ginapakahuy-an nila ang Cristo paagi sa paghimo sini nga mga buhat. b

May kinamatarong bala ang isa nga islan ang iya relihion?

Wala ginsunod ni propeta Abraham ang relihion sang iya mga paryente

Huo, ginapakita sang Biblia nga may kinamatarong ang mga tawo nga islan ang ila relihion. Mabasa diri ang madamo nga wala nagsunod sa relihion sang ila mga paryente kag kinabubut-on nga nagdesisyon nga magsimba sa matuod nga Dios. Ang mga halimbawa sini amo sanday Abraham, Rut, ang pila ka taga-Atenas, kag si apostol Pablo. (Josue 24:2; Rut 1:14-16; Binuhatan 17:22, 30-34; Galacia 1:14, 23) Dugang pa, ginakilala man sang Biblia ang kinamatarong sang isa nga maghimo sing sayop nga desisyon nga biyaan ang pagsimba nga nahamut-an sang Dios.—1 Juan 2:19.

Ang kinamatarong nga islan ang relihion ginasuportahan man sang Universal Declaration of Human Rights (Ang Kalibutanon nga Pahayag sang mga Katarungang Pangkataohan), nga suno sa United Nations amo ang “pundasyon sang internasyonal nga katarungang pangkataohan.” Ini nga dokumento nagasiling nga ang tagsatagsa may “kahilwayan nga magbaylo sang iya relihiyon ukon pagtuo” kag “mangita, magbaton kag magdala sang impormasyon kag ideya,” lakip ang relihioso nga mga ideya. c Siempre, nalakip sa sini nga mga kinamatarong ang obligasyon nga respetuhon ang kinamatarong sang iban nga indi mag-ilis sang ila pagtuluuhan kag indi magbaton sang ideya nga wala nila ginaugyunan.

Wala mo bala ginarespeto ang mga tradisyon kag kustombre sang imo pamilya kon mag-ilis ka sing relihion?

Indi man nga amo sina. Suno sa Biblia, respetuhon naton ang tanan, bisan ano man ang ila relihion. (1 Pedro 2:17) Ginatuman man sang mga Saksi ni Jehova ang sugo sang Biblia nga tahuron ang ila mga ginikanan, bisan pa lain ang ila pagtuluuhan.—Efeso 6:2, 3.

Pero ang iban wala nagaugyon sa pagtamod sang Biblia. Ang isa ka babayi nga nagdaku sa Zambia nagsiling: ‘Sa amon komunidad, ang pag-ilis sang relihion ginkabig nga pagkadimainunungon, pagluib sa pamilya kag sa komunidad.’ Nangin problema ini sang babayi sang nagtuon sia sa Biblia upod sa mga Saksi ni Jehova sang tin-edyer sia, kag wala madugay nagdesisyon sia nga islan ang iya relihion. Nagsiling sia: “Sulit-sulit nga ginsilingan ako sang akon mga ginikanan nga wala gid sila nahamuot sa akon kag nga ginpaslaw ko sila. Nabudlayan gid ako sa sini, bangod importante sa akon ang kahamuot sang akon mga ginikanan. . . . Ang pagkamainunungon kay Jehova sa baylo nga sa relihioso nga mga tradisyon wala nagakahulugan nga indi ako mainunungon sa akon pamilya.” d

a Basaha ang Enero 1, 2002, nga gua sang Ang Lalantawan, pahina 12, parapo 15.

b Halimbawa, sang mga tuig 785 C.E., nagpagua si Carlomagno sing sugo nga silutan sang kamatayon ang mga tawo sa Saxony nga indi magpabawtismo subong Cristiano. Subong man ang Peace of Augsburg, nga ginkasugtan sang 1555 C.E. sang mga nagainaway nga grupo sang Balaan nga Imperyo sang Roma, nagsugo nga ang manuggahom sang tagsa ka teritoryo sini dapat Romano Katoliko ukon Lutheran kag dapat sundon sang tanan nga sakop sini ang iya relihion. Ang mga indi magbaton sang relihion sang ila manuggahom ginapahalin.

c Pareho man sini nga mga kinamatarong ang nalakip sa African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, ASEAN (Association of Southeast Asian Nations) Human Rights Declaration, European Convention on Human Rights, kag International Covenant on Civil and Political Rights. Pero bisan ang mga pungsod nga nagasiling nga ginakilala nila ini nga mga kinamatarong may lainlain nga paagi sa pagpatuman sini.

d Sa Biblia, Jehova ang ngalan sang matuod nga Dios.