Padayon nga ginahanas ang mga Saksi ni Jehova sa tanan nga bahin sang ila pagkabuhi bilang Cristiano, lakip na sa ila pagministeryo. Ini nga ministeryo nga ginsugo ni Jesus nga himuon sang iya mga sumulunod, amo ang pagbantala kag pagtudlo sang maayong balita sang Ginharian sang Dios. (Mateo 24:14; 28:19, 20) Ginahanas kami sa amon mga miting kada semana kag sa amon mga kombension kag asembleya kada tuig. Pero ang mga Saksi ni Jehova nga may mga responsibilidad sa sulod sang kongregasyon ukon sa organisasyon makabaton pa gid sang dugang nga paghanas sa espesyal nga mga Bible school.

Sa sini nga artikulo

•  Ano nga paghanas ang mabaton sang mga Saksi ni Jehova?

•  Mga Bible school para sa mga Saksi ni Jehova

•  Diin nabase ang mga paghanas nga ginatudlo sa mga Saksi?

•  May bayad bala ang paghanas sa mga Saksi ni Jehova?

•  Paano nakabenepisyo ang mga Saksi ni Jehova kay ginahanas sila?

 Mga miting sa kongregasyon. Kada semana, naga-attend kami sa duha ka miting kag nagatipon kami sa lugar nga ginatawag Kingdom Hall. Ang isa ka miting ginahiwat kon midweek ukon sa tungatunga sang semana, kag ang isa naman ginahiwat kon weekend ukon sa Sabado ukon Domingo. Welcome gid ang tanan nga mag-attend kag wala man ini sing bayad.

•   Midweek meeting. Ginatudluan kami kon paano mangin mas maayo sa pagbasa, sa pagpakig-istorya sa iban, sa paghambal sa publiko, sa pagbantala, kag sa pagtudlo. Ginahanas kami paagi sa mga pamulongpulong, pagbinagbinag, presentasyon, kag mga video. Nagabulig ini sa amon para mangin mas epektibo kami sa pagsugid sang mensahe sang Biblia sa iban kag sa pag-Bible study sa interesado nga mga tawo. Ang tanan nga naga-attend sa miting, makabenepisyo gid sa sini nga paghanas. Kag ang pinakaimportante, mapabakod sini ang amon pagtuo kag gugma sa Dios kag sa amon mga kauturan.

•   Weekend meeting. May duha ka bahin ini nga miting. Una, may pamulongpulong nga nabase sa Biblia nga gindesinyo para sa mga interesado. Ang ikaduha naman nga bahin, may pamangkot kag sabat base sa artikulo sang tulun-an nga edisyon sang Ang Lalantawan. a Ginabinagbinag kag ginapaathag sa artikulo ang mga topiko kag mga prinsipio sa Biblia nga makabulig sa amon sa ministeryo kag sa amon personal nga kabuhi.

 Mga asembleya kag mga kombension. Kada tuig may ara kami tatlo ka dalagku nga pagtilipon, kag naga-attend sa sini ang madamo nga kongregasyon. Ining masadya nga mga pagtilipon may mga tema nga nabase sa Biblia. Nalakip sa sini ang mga pamulongpulong, presentasyon, interbyu, kag mga video. Pareho sa amon mga miting sa kongregasyon, ang mga asembleya kag mga kombension nagatudlo sa amon parte sa Biblia kag nagabulig sa amon nga mangin mas maayo pa gid nga mga manugbantala kag manunudlo sang maayong balita. Welcome man nga mag-attend ang bisan sin-o, kag wala ini sing bayad.

 Para sa dugang nga paghanas, ginaagda ang pila sa mga Saksi ni Jehova nga mag-eskwela sa lainlain nga mga Bible school. Ano ini nga mga eskwelahan? Ano ang katuyuan sini kag daw ano ini kalawig? Kag sin-o ang puede makaeskwela?

Pioneer Service School

•   Katuyuan: Para hanason ang full-time nga mga ministro, nga ginatawag mga payunir, b nga mangin mas epektibo sa pagbantala kag pagtudlo. Ini nga eskwelahan daw pareho sa isa ka classroom nga may pagbinagbinag, mga presentasyon, pamulongpulong, kag mga workshop.

•   Kalawigon: Anom ka adlaw.

•   Kon sin-o ang puede makaeskwela: Ang mga payunir nga nakalab-ot na isa ka tuig sa pagpayunir ginaagda nga mag-eskwela. Kag ang malawig na nga mga payunir nga wala nakaeskwela sa nagligad nga lima ka tuig ginaagda man.

School for Kingdom Evangelizers

•   Katuyuan: Para hatagan sang pinasahi nga paghanas ang eksperiensiado nga full-time nga mga ministro. Paagi sa sini mapauswag pa gid sang mga estudyante ang ila ikasarang sa pagbantala kag pagpanudlo, kag maid-id pa gid nila nga matun-an ang mga topiko sa Biblia. Madamo sa mga naka-graduate sa sini nga eskwelahan ang ginaasayn sa mga lugar kon sa diin kinahanglan ang dugang nga manugbantala.

•   Kalawigon: Duha ka bulan.

•   Kon sin-o ang puede makaeskwela: Puede maka-apply ang mga payunir nga nakalab-ot sang mga kalipikasyon kag may ikasarang nga makaalagad sa mga lugar diin daku ang kinahanglanon.

School for Congregation Elders

•   Katuyuan: Para buligan ang mga elder c nga mahimo ang ila mga responsibilidad sa kongregasyon, pareho sang pagtudlo kag pag-shepherding, kag para pabakuron ang ila gugma sa Dios kag sa ila mga kauturan.—1 Pedro 5:2, 3.

•   Kalawigon: Lima ka adlaw.

•   Kon sin-o ang puede makaeskwela: Ginaagda ang bag-o gintangdo nga mga elder kag ang eksperiensiado nga mga elder nga wala nakaeskwela sa nagligad nga lima ka tuig.

School for Circuit Overseers and Their Wives

•   Katuyuan: Para hanason ang mga nagalakbay nga ministro nga ginatawag nga mga circuit overseer, d nga mangin mas epektibo sa ila mga asaynment. (1 Timoteo 5:17) Ginabuligan man sini nga eskwelahan ining Cristiano nga mga elder kag ang ila mga asawa nga mas madugangan pa ang ila nabal-an sa Biblia.

•   Kalawigon: Isa ka bulan

•   Kon sin-o ang puede makaeskwela: Ginaagda ang bag-o nga mga circuit overseer kag ang ila mga asawa nga nakalab-ot na isa ka tuig sa ila asaynment. Agdahon naman sila liwat nga mag-eskwela pagligad sang lima ka tuig.

Kingdom Ministry School

•   Katuyuan: Para buligan ang mga elder kag ang mga ministeryal nga alagad e sa pag-atipan sang ila mga responsibilidad sa kongregasyon base sa mga sitwasyon kag kinahanglanon sa sina nga tion. (2 Timoteo 3:1) Ini nga eskwelahan ginahiwat kada duha ukon tatlo ka tuig.

•   Kalawigon: Nagabag-obag-o, sa masami isa lang ka adlaw.

•   Kon sin-o ang puede makaeskwela: Mga circuit overseer, mga elder, kag mga ministeryal nga alagad.

Bethel Service School

•   Katuyuan: Para buligan ang mga miembro sang pamilya Bethel f nga mangin mas epektibo sa ila asaynment kag para magdugang ang ila gugma sa Dios kag sa isa kag isa.

•   Kalawigon: Lima ka adlaw kag tunga.

•   Kon sin-o ang puede makaeskwela: Ang mga bag-o nga miembro sang pamilya Bethel kinahanglan mag-eskwela. Ang madugay na nga mga miembro nga wala nakaeskwela sa nagligad nga lima ka tuig puede makaeskwela liwat.

Watchtower Bible School of Gilead

•   Katuyuan: Para buligan ang mga estudyante nga apresyahon pa gid ang Pulong sang Dios kag para mabuligan sila nga iaplikar ang ila mga natun-an. (1 Tesalonica 2:13) Ang matutom nga mga Cristiano nga lalaki kag babayi nga naka-attend sa Gilead mangin daku gid nga bulig sa organisasyon ni Jehova kag sa pagtudlo parte sa Biblia sa bilog nga kalibutan. Ang mga nag-graduate puede i-asayn bilang mga special pioneer, missionary, ukon sa branch office sa ila lugar ukon sa iban nga pungsod.

•   Kalawigon: Lima ka bulan.

•   Kon sin-o ang puede makaeskwela: Ginaagda sang mga branch office ang pila ka full-time nga mga ministro nga mag-apply. Ini nga eskwelahan ginahiwat sa United States sa Watchtower Educational Center sa Patterson, New York.

School for Branch Committee Members and Their Wives

•   Katuyuan: Para hanason ang mga miembro sang Branch Committee g nga dumalahan ang hilikuton sa branch office kag ang espirituwal nga mga hilikuton sang mga Saksi ni Jehova sa pungsod ukon mga pungsod nga naasayn sa ila branch territory.

•   Kalawigon: Duha ka bulan.

•   Kon sin-o ang puede makaeskwela: Ginaagda sang World Headquarters sang mga Saksi ni Jehova ang pila ka ginpili nga mga miembro sang Branch Committee kag ang ila mga asawa nga mag-eskwela. Ginahiwat ini sa Watchtower Educational Center sa Patterson, New York.

 Ang Biblia amo gid ang ginagamit nga libro para hanason ang mga Saksi ni Jehova. Nagapati kami nga ang Biblia gingiyahan sang Dios kag mabasa sa sini ang pinakamaayo nga instruksion parte sa tanan nga bahin sang kabuhi bilang Cristiano.—2 Timoteo 3:16, 17.

 Wala. Libre lang ini. Ang mga hilikuton sang mga Saksi ni Jehova ginasuportahan sang boluntaryo nga mga donasyon.—2 Corinto 9:7.