Sang Oktubre 4, 2014, mga 19,000 ang nagtipon para sa ika-130 nga annual meeting sang Watch Tower Bible and Tract Society of Pennsylvania. Ang programa ginhiwat sa Assembly Hall sang mga Saksi ni Jehova sa Jersey City, New Jersey, U.S.A., kag naka-video hook up ini sa pila ka lugar.

Si Mark Sanderson, nga miembro sang Nagadumala nga Hubon sang mga Saksi ni Jehova, amo ang tsirman sang programa. Ginpadaku ni Utod Sanderson sa iya nagabukas nga pamulongpulong nga pinasahi gid ang annual meeting sini nga tuig, bangod ginasaulog ang ika-100 nga anibersaryo sang pagtukod sang Mesianikong Ginharian.

Ginsaysay ni Utod Sanderson ang tatlo ka importante nga nahimo sang Ginharian sa 100 ka tuig nga paggahom sini:

• Pagbantala sa bilog nga kalibutan. Bangod sa pagpakamaayo ni Jehova, mapisan nga nabantala sang iya katawhan ang maayong balita sang Ginharian. Nagdamo ang mga manugbantala, halin sa pila lang ka libo sang 1914 nangin sobra ini sa walo ka milyon sang 2014 nga tuig sang pag-alagad. Padayon kita nga magbantala sing makugi tubtob magsiling si Jehova nga natapos na ang hilikuton.

• Proteksion sa mga sakop sang Ginharian bilang isa ka grupo. Ginapamatukan gid kita sang mga lider sang relihion kag sang mga may awtoridad sa gobierno, kag ginatinguhaan pa gani nila nga papason ang tanan nga mga Saksi ni Jehova. Pero, ginproteksionan ni Jehova ang iya mga sumilimba bilang isa ka grupo. Ang madamo nga kadalag-an sa korte, lakip na ang sa Korte Suprema sang Estados Unidos kag sa European Court of Human Rights, nagapamatuod nga ginaproteksionan kita ni Jehova asta subong.

• Paghiusa sang mga tawo nga sarisari ang ginhalinan. Ang Ginharian sang Dios amo ang naghiusa sa mga tawo nga sarisari ang ginhalinan, nasyonalidad, kag lenguahe. Amo ini ang nakabulig sa ila nga malampuwasan ang madamo nga kabudlayan kag mangin nahiusa nga grupo sang mga sumilimba. “Isa ini ka milagro nga si Jehova nga Dios lang ang makahimo,” siling ni Utod Sanderson. Ginsulit niya liwat nga nalipay gid ang tanan nga nagtambong nga ara sila sa sining pinasahi nga annual meeting.

Serye sang Mangin Abyan ni Jehova.

Ang masunod nga topiko sang programa sang annual meeting amo ang serye sang video para sa mga kabataan, nga sobra duha ka tuig na naton nga ginatan-aw. Ginpakita anay ni Utod Sanderson ang video sang gin-interbyu nga mga bata sa bilog nga kalibutan. Natandog gid ang mga nagtambong sa sinsero kag tinagipusuon nga pagpasalamat sang mga bata sa ila natun-an sa sini nga mga video.

Dayon ginpagua ang bag-o nga video sini nga serye. May tig-ulo ini nga “Buligan Ka ni Jehova nga Mangin Maisog.” Ginapakita sa sining 12 ka minuto nga video ang istorya sa Biblia parte sa Israelinhon nga bata nga babayi nga maisog nga nagsugid sa asawa ni Naaman parte kay Jehova. (2 Hari 5:​1-​14) Ginpagua ini nga video sa jw.org sang Lunes, Oktubre 6, 2014, kag matigayon ini sa sobra 20 ka lenguahe.

JW Language.

Ginpahibalo man ni Utod Sanderson ining bag-o nga app para sa digital nga mga gadyet, nga makabulig sa mga Saksi ni Jehova nga gusto magtuon sang iban nga lenguahe para mapasangkad ang ila ministeryo. Ini nga app may sobra 4,000 ka tinaga kag prase sa 18 ka lenguahe. May plano nga dugangan pa ini sing mga tinaga kag mga prase, mga pasundayag para sa pagbantala, kag iban pa.

JW Broadcasting.

Nalipay gid ang mga nagtambong sang ginpahibalo ang parte sa bag-o nga estasyon sa Internet TV sang mga Saksi ni Jehova, nga una nga ginpagua sa Ingles lang. Halin ini sa aton ulong talatapan sa Brooklyn, New York, U.S.A., kag ipagua sini nga estasyon ang aton mga video, musika, kag gindrama nga pagbasa sa Biblia. Ipagua man diri ang kada bulan nga programa nga pagadumalahan sang isa ka miembro sang Nagadumala nga Hubon ukon sang kabulig sa isa sa mga komite sini.

Ginpakita man ni Utod Sanderson ang pila ka bahin sang una nga programa sini. Gindumalahan ini ni Stephen Lett sang Nagadumala nga Hubon, nga nagalakip sang video parte sa paghanda sining bag-o nga estasyon. Una nga ginpagua ang JW Broadcasting sang Oktubre 6, 2014, kag mahimo ini matan-aw sa tv.dan124.com.

“Ang Ginharian​—100 ka Tuig kag Nagapadayon Pa.”

Sa isa ka video, ginsaysay ni Samuel Herd sang Nagadumala nga Hubon kon paano nagabulig ang Ginharian sang Dios nga mag-uswag kita sa pagbantala. Paagi sa mga video sang mga natabo sang una, mga pag-akto liwat, kag mga eksperiensia sang madugay na nga mga Saksi, ginpakita sini ang mga pagpanikasog pareho sang paghimo kag pagpasalida sang “Photo-Drama of Creation”; paggamit sang radyo pono, testimony card, kag de-trompa nga mga salakyan, pagmartsa nga may dala nga mga plakard; kag paghiwat sang mga klase nga magahanas sa aton sa pagministeryo.

Paano kita makapanginpulos sa pagpamalandong parte sa nahimo sang Ginharian sa nagligad nga 100 ka tuig? Kon himuon naton ini, mangin matuod pa gid sa aton ang Ginharian kag mangin mas malipayon kita sa pagpaabot sa mga himuon sini sa palaabuton.

Ambahanon sa Pagsimba.

Nalipay gid ang mga nagtambong sang ginpahibalo ni David Splane sang Nagadumala nga Hubon nga irebisar ang aton libro sang ambahanon nga Mag-amba kay Jehova. Ang materyal nga gamiton sa kober sini kag ang silver nga kilid gin-ilog sa Bag-ong Kalibutan nga Badbad. Ining maayo sing kalidad nga mga materyal nagapakita nga importante gid ang mga ambahanon sa aton pagsimba.

Ginpahibalo man ni Utod Splane nga dugangan pa ini sing pila ka ambahanon. Pero indi na kinahanglan nga hulaton pa ang bag-o nga gin-imprinta nga libro sang ambahanon antes naton magamit ang bag-o nga mga kanta. Ipagua ini sa jw.org kon matapos na ini.

Ang tatlo ka bag-o nga ambahanon, nga gin-ensayo sang pamilya Bethel sina nga semana, gin-amba sa annual meeting. Si Utod Splane ang nagdumala sang ginkanta ang bag-o nga ambahanon nga may tig-ulo “Ang Ginharian Nagagahom Na—Magkari Ini!” Ginkomposo ini nga ambahanon para sa ika-100 ka tuig nga anibersaryo sang Ginharian. Pagkatapos makanta sang koro ang ambahanon, nagdungan sa ila ang mga nagtambong. Dayon sa isa ka bahin sang programa, nagkanta ang koro kag ang mga nagtambong sang isa pa ka bag-o nga ambahanon nga may tig-ulo “Hatagi Kami sing Kaisog.”

Interbyu.

Si Gerrit Lösch sang Nagadumala nga Hubon ang nagdumala sang narekord na nga interbyu sa tatlo ka mag-asawa nga madugay na nga nagaalagad sa Bethel. Ginsugid nila ang madamo nga pagbag-o nga nasaksihan nila sa sulod sang mga tinuig, nga nagapakita nga nagauswag gid ang katawhan sang Dios. Ginhambal ni Utod Lösch nga ang mga pag-uswag sa organisasyon gintagna sang Biblia, kag ginpalig-on niya ang tanan nga padayon nga magdungan sa pag-uswag sang organisasyon ni Jehova.​—Isaias 60:17.

“Larawan kag Ginalarawan.”

Si Utod Splane ang nagpamulongpulong sini, nga nagpaathag kon ngaa sining nagligad nga mga tinuig wala na ginabinagbinag sa aton mga publikasyon ang parte sa mga larawan kag ginalarawan indi pareho sang una.

Sang una, ginasiling nga ang madamo nga matutom nga lalaki kag babayi nga ginsambit sa Biblia nagalarawan ukon nagalandong sa mga grupo sang matutom nga mga Cristiano sa aton tion. Ginahunahuna man sadto nga ang pila ka kasaysayan sa Biblia mga tagna sang mahanabo sa mga alagad sang Dios subong. Makawiwili gid tun-an ang parte sa sini. Pero ngaa talagsa na lang ginasambit sa aton mga publikasyon ang parte sa larawan kag ginalarawan?

Ginapakita sang Kasulatan nga ang pila ka karakter kag hitabo nagalandong sa isa ka tawo ukon butang nga mas daku. Kon maathag nga ginapakita sang Biblia ang kaangtanan sang larawan kag ginalarawan sini, ginabaton naton ini. “Pero kon wala ini ginapakita sang Biblia, ti indi man kita maghimuhimo,” siling ni Utod Splane. Dapat likawan naton ang sobra nga interpretasyon sa aton ginabasa. Dugang pa, kon magkonsentrar na lang kita sa larawan kag mga ginalarawan kag ang mga katumanan sini, indi na naton makita ang praktikal nga mga leksion nga ginatudlo sang Biblia sa aton tanan​—langitnon man ukon dutan-on ang aton paglaum.​—Roma 15:4. *

“Magapadayon Bala Kamo sa Pagbantay?”

Sa sini nga pamulongpulong, nga ginhatag ni Utod Lett, ginbag-o ang aton paghangop sa parabola ni Jesus parte sa napulo ka birhen. (Mateo 25:​1-​13) Amo na ini subong ang aton paghangop: Ang nobyo amo si Jesus, kag ang mga birhen amo ang hinaplas nga mga sumulunod ni Jesus. (Lucas 5:​34, 35; 2 Corinto 11:2) Ang parabola naaplikar sa katapusan nga mga adlaw, diin ang talipuspusan sini mahanabo sa dakung kapipit-an. Sa paglaragway sa lima ka buangbuang nga birhen, wala nagsiling si Jesus nga madamo sa iya hinaplas nga mga alagad ang mangin indi matutom kag kinahanglan islan. Kundi, isa ini ka paandam. Pareho sang lima ka birhen nga mainandamon kag lima nga buangbuang, ang tagsa ka hinaplas may kahigayunan nga magpili kon mangin handa sila kag alisto ukon mangin indi matutom.

Base sa prinsipio nga likawan ang sobra nga interpretasyon sa isa ka kasaysayan, indi man maalamon nga tun-an ini nga ilustrasyon para lang makita ang ginalarawan sang tagsa ka detalye sini. Kundi, mas maayo kon tun-an naton ang praktikal nga mga leksion sa sini nga ilustrasyon. Hinaplas man kita ukon “iban nga karnero,” tanan kita may responsibilidad nga ipaiwag ang aton kapawa kag ‘magpadayon sa pagbantay.’ (Juan 10:16; Marcos 13:37; Mateo 5:16) Wala sing isa nga mangin matutom para sa aton. Ang kada isa sa aton dapat ‘magpili sang kabuhi’ paagi sa pagpabilin nga alisto sa espirituwal kag aktibo sa ministeryo.​—Deuteronomio 30:19.

“Ang Parabola Parte sa mga Talanton.”

Si Anthony Morris sang Nagadumala nga Hubon ang masunod nga nagpamulongpulong. Ginpaathag niya sa mga nagtambong ang ginbag-o nga paghangop sa ilustrasyon parte sa mga talanton. (Mateo 25:14-​30) Nahangpan na naton subong nga ang agalon sa sini nga ilustrasyon (si Jesus) magapadya sa mga ulipon (ang iya matutom nga hinaplas nga mga sumulunod sa duta) sa palaabuton kon mag-abot sia kag banhawon sila pakadto sa langit. Sang ginsiling ni Jesus ang matabo sa “malaut kag uyaya nga ulipon,” wala nagtagna si Jesus nga madamo sa iya hinaplas nga mga sumulunod ang mangin indi matutom. Kundi, ginapaandaman niya ang mga hinaplas nga padayon sila nga mangin maukod kag likawan ang panimuot kag buhat sang malaut nga ulipon.

Ano nga praktikal nga leksion ang matun-an naton sa sini nga parabola? Ang agalon sa sini nga ilustrasyon may gintugyan nga daku nga kantidad sa iya mga ulipon. Sing kaanggid, gintugyan man ni Jesus sa iya mga sumulunod ang butang nga ginatamod niya nga hamili​—ang sugo nga pagbantala kag pagtudlo sa mga tawo agod mangin disipulo. Ginapaabot niya nga tanan kita mangin maukod sa pagbantala nga hilikuton, suno sa aton kahimtangan. Ginkomendahan ni Utod Morris ang tanan nga nagtambong bangod sang ila makugi nga pagpakigbahin sa mga hilikuton sang Ginharian.

“Sin-o ang Magasalakay sa Katawhan sang Dios?”

Amo ini ang tema sang katapusan nga pamulongpulong sang programa, nga ginhatag ni Geoffrey Jackson sang Nagadumala nga Hubon. Ginbinagbinag ni Utod Jackson ang pagsalakay sa katawhan sang Dios sa palaabuton nga pangunahan ni Gog sang Magog.​—Ezequiel 38:14-​23.

Sang una, nahangpan naton nga ang Gog amo ang tawag kay Satanas nga Yawa sang gintagbong sia halin sa langit. Pero, nagsiling si Utod Jackson nga ini nga paathag nagpautwas sang pila ka importante nga pamangkot. Halimbawa, gintagna ni Jehova nga kon malutos si Gog, ipakaon ni Jehova si Gog “sa tanan nga sahi sang pispis nga nagapangdagit kag sa mabangis nga mga sapat sa latagon.” (Ezequiel 39:4) Gintagna man ni Jehova nga ilubong “si Gog kag ang tanan niya nga katawhan” sa duta. (Ezequiel 39:11) Pero paano ini himuon sa espiritu nga tinuga? Si Satanas itagbong sa kadadalman sa sulod sang 1,000 ka tuig, indi nga kaunon ukon ilubong. (Bugna 20:​1, 2) Dugang pa, sa katapusan sang 1,000 ka tuig, buy-an si Satanas halin sa kadadalman kag “magagua sia agod patalangon ang mga pungsod sa apat ka pamusod sang duta, ang Gog kag Magog.” (Bugna 20:​7, 8) Maathag nga indi puede mapatalang ni Satanas si Gog kon sia mismo si Gog.

Ginpaathag ni Utod Jackson nga ang Gog sang Magog sa tagna ni Ezequiel nagarepresentar indi kay Satanas, kundi sa paghimbon sang mga pungsod nga magasalakay sa katawhan sang Dios sa palaabuton. Mahimo gid nga ang pagsalakay ni Gog amo man ang pagsalakay sang “hari sang aminhan” kag ang pagsalakay sang “mga hari sang duta.”​—Daniel 11:40, 44, 45; Bugna 17:12-14; 19:19.

Sin-o ang ginapatuhuyan sang “hari sang aminhan”? Indi pa naton ini mapat-od subong. Pero makapalig-on sa aton pagtuo nga makita nga ang aton paghangop sa palaabuton amat-amat nga nagaathag samtang nagahilapit ini. Wala kita nahadlok sa nagahilapit nga pagsalakay sa katawhan sang Dios, kay nakahibalo kita nga kon magsalakay na si Gog sang Magog, malutos sia kag malaglag sing bug-os​—samtang ang katawhan sang Dios magapabilin sing dayon. *

Konklusion.

Ginpahibalo ni Utod Sanderson nga matigayon na ang pocket-size nga New World Translation. Ginahanda naman ang audio nga Biblia, nga lainlain ang magabasa sang mga ginahambal sang tagsa ka karakter sa Biblia. Ini nga mga rekording amat-amat nga ibutang sa jw.org, sugod sa libro sang Mateo.

Ginpahibalo man ni Utod Sanderson ang aton tuigan nga teksto sa 2015 amo ang Salmo 106:1: “Magpasalamat kamo kay Jehova, kay maayo sia.” Ginpalig-on niya ang tanan nga magpasalamat kada adlaw.

Ang katapusan nga ambahanon sa sina nga miting amo ang ikatlo nga bag-o nga ambahanon nga may tig-ulo “Jehova ang Imo Ngalan.” Nag-upod ang pito ka miembro sang Nagadumala nga Hubon sa koro nga ara sa entablado samtang ginakanta ang matahom nga bag-o nga ambahanon​—nagakaigo gid ini nga pagtakop sining pinasahi nga miting!