“Indi kita magpangampo sa paghimo sing maayo, kay sa nagakaigo nga tion magaani kita kon indi kita paglapyuon.”—Galacia 6:9, Bag-ong Kalibutan nga Badbad.

 “Indi kita magkataka sa paghimo sing maayo, kay kon magpadayon kita, magaabot ang tion nga magaani kita.”—Galacia 6:9, Maayong Balita nga Biblia.

 Ginpalig-on ni apostol Pablo ang mga Cristiano nga padayon nga himuon ang maayo sa pagtan-aw sang Dios. Kon himuon nila ina, makasalig sila nga padyaan sila sang Dios.

 “Indi kita magpangampo.” Ini nga ekspresyon puede man i-translate nga “indi kita makapoy.” Sa orihinal nga lenguahe, ini nga tinaga nagakahulugan man nga indi maluyahan sang buot ukon madulaan sang kapagsik. Paagi sa paglakip ni apostol Pablo sa iya kaugalingon, ginpakita niya nga nakaeksperiensia man sia sang pagluya sang buot.—Roma 7:21-24.

 “Sing maayo.” Amo ini ang tanan nga butang nga kinahanglan himuon sang isa ka Cristiano sa iya pag-alagad sa Dios. Nagalakip ini sang mga butang nga ginahimo sang tawo para mabuligan ang kaupod niya nga nagasimba sa Dios kag ang iban.—Galacia 6:10.

 “Sa nagakaigo nga tion magaani kita kon indi kita paglapyuon.” Ginpahanumdom ni Pablo sa iya mga bumalasa nga indi nila dayon makita ang benepisyo sa paghimo sang maayo, pareho sa pagtubo sang tanom sang mangunguma. Ginkonek ni Pablo ini nga bersikulo sa isa ka panguna nga kamatuoran nga ginsiling sa bersikulo 7: “Kon ano ang ginasab-ug sang tawo, ini man ang iya anihon.” Gani, kon ang isa ka Cristiano magahimo sang maayo sa pagtan-aw sang Dios, magaani sia sang daku nga padya, lakip ang kabuhi nga wala sing katapusan.—Roma 2:6, 7; Galacia 6:8.

 Sang mga 50-52 C.E., ginsulat ini ni apostol Pablo para sa mga Cristiano sa Galacia. Ginhimo niya ini para proteksionan ang iya mga kauturan sa impluwensia sang mga nagapakunokuno nga mga Cristiano nga nagapatiko sang kamatuoran parte kay Jesus. (Galacia 1:6, 7) Ining butig nga mga manunudlo nagapakigbais nga kinahanglan sundon sang mga Cristiano ang Kasuguan nga ginhatag sang Dios sa pungsod sang Israel sadto paagi kay Moises. (Galacia 2:15, 16) Ginpaathag ni Pablo nga natuman na ang katuyuan sang Kasuguan kag indi na ini kinahanglan sundon sang mga nagasimba sa Dios.—Roma 10:4; Galacia 3:23-25.

 Sang ginpalig-on ni Pablo ang pareho niya nga mga Cristiano nga magpadayon “sa paghimo sing maayo,” wala niya ginatumod ang pagsunod sa Mosaikong Kasuguan. Kundi, ginapalig-on niya sila nga ‘tumanon ang kasuguan sang Cristo,’ nga nagalakip sang tanan nga gintudlo ni Jesus parte sa paghimo sang maayo sa iban.—Galacia 6:2; Mateo 7:12; Juan 13:34.

 Tan-awa ining malip-ot nga video para mahibaluan mo ang sumaryo sang libro sang Galacia.