Ano ang Hitsura ni Jesus Sadto?

I-PLAY

Ang sabat sang Biblia

Wala sing nakahibalo kon ano gid ang hitsura ni Jesus sadto, kay wala ini ginlaragway sang Biblia. Ginapakita sini nga indi importante kon ano man ang hitsura ni Jesus. Pero, ang Biblia nagahatag sa aton sing diutay nga ideya parte sa iya hitsura.

Hitsura: Si Jesus isa ka Judiyo kag mahimo nga nakasunod sia sa hitsura sang iya iloy nga isa ka Judiyo. ((Hebreo 7:14) Indi gid man lain ang iya hitsura kon ikumparar sa iban, kay isa ka bes naglakbay sia sing tago halin sa Galilea pakadto sa Jerusalem kag wala sia nakilal-an. (Juan 7:10, 11) Kag indi man sia pinasahi kon ikumparar sa iya mga apostoles. Dumduma nga kinahanglan pa sia ipakilala ni Judas Iscariote sa madamo nga tawo nga nagdakop sa iya.—Mateo 26:47-49.
Kalabaon sang buhok: Mahimo nga indi malaba ang buhok ni Jesus kay ang Biblia nagasiling nga “kon malaba ang buhok sang isa ka lalaki makahuluya ini.”—1 Corinto 11:14.
Bungot: Si Jesus may bungot. Ginsunod niya ang kasuguan sang mga Judiyo nga nagadumili sa mga lalaki nga ‘gub-on ang punta sang ila bungot.’ (Levitico 19:27; Galacia 4:4) Ginsambit man ang bungot ni Jesus sa isa ka tagna sa Biblia parte sa iya pag-antos.—Isaias 50:6.
Lawas: Maathag man nga si Jesus mabukod. Sa tion sang iya pagministeryo, malayo ang iya ginalakbay. (Mateo 9:35) Duha ka beses niya nga gintinluan ang templo sang mga Judiyo, ginpamaliskad niya ang mga lamesa sang mga manugbaylo sang kuarta, kag isa ka bes nga gintabog niya ang mga sapat paagi sa latigo. (Lucas 19:45, 46; Juan 2:14, 15) Ang McClintock and Strong’s Cyclopedia nagsiling: “Ang bug-os nga pagsaysay sang ebanghelyo nagapakita [nga si Jesus] may mapagros kag mapagsik nga lawas.”—Volume IV, pahina 884.
Ekspresyon sang nawong: Si Jesus mapinalanggaon kag maluluy-on, kag makita ini sa ekspresyon sang iya nawong. (Mateo 11:28, 29) Ginapangita sia sang tanan nga sahi sang tawo kon nagakinahanglan sila sing paumpaw kag bulig. (Lucas 5:12, 13; 7:37, 38) Bisan ang mga bata nanamian sa iya.—Mateo 19:13-15; Marcos 9:35-37.

Sayop nga mga pagpati parte sa hitsura ni Jesus

Sayop nga pagpati: Ang iban nagasiling nga si Jesus may dugo nga Aprikano kay sa libro sang Bugna ginkumparar ang iya buhok sa de-lana ukon wool kag ang iya tiil sa “puro nga saway.”—Bugna 1:14, 15.

Ang kamatuoran: Ang Bugna isa ka libro sang “mga tagna.” (Bugna 1:1) Ang buhok kag tiil ni Jesus ginlaragway paagi sa mga simbulo para ipakita ang mga kinaiya ni Jesus sa tapos sang iya pagkabanhaw, indi para ilaragway ang iya hitsura sang ari sia sa duta. Sa pagsiling nga “ang buhok sa iya ulo subong kaputi sang de-lana, kag sang niebe,” ginapaanggid sang Bugna 1:14, indi ang texture sang buhok kundi ang kolor sini. Ginarepresentar sini ang kaalam ni Jesus bangod sa kalawigon sang iya pagluntad. (Bugna 3:14) Sa sini nga bersikulo, wala ginapaanggid ang texture sang buhok ni Jesus sa de-lana ukon sa niebe.

Ang tiil ni Jesus “kaangay sa puro nga saway nga nagabaga sa hurno.” (Bugna 1:15) Dugang pa, ang iya nawong “tuman kasilaw kaangay sang adlaw sa kaudtuhon.” (Bugna 1:16) Wala sing rasa ukon lahi nga amo sini ang kolor sang panit, gani ini nga palanan-awon simbuliko, nga nagapakita sa ginbanhaw nga si Jesus bilang isa nga “nagapuyo sa kapawa nga indi mapalapitan.”—1 Timoteo 6:16.

Sayop nga pagpati: Si Jesus maluya.

Ang kamatuoran: Si Jesus maisog gid. Halimbawa, maisog sia nga nagpakilala sa mga tawo nga may mga armas nga nagkadto para dakpon sia. (Juan 18:4-8) Sigurado man nga makusog si Jesus kay isa sia ka panday.—Marcos 6:3.

Pero ngaa ginbuligan pa si Jesus sa pagpas-an sang iya usok sang pag-antos? Kag ngaa una sia nga napatay sangsa iban nga ginlansang sa tupad niya? (Lucas 23:26; Juan 19:31-33) Antes ginpatay si Jesus, maluya na gid sia. Wala sia sing tulog bilog nga gab-i, kag isa sa mga rason amo ang iya grabe nga kasubo. (Lucas 22:42-44) Sina nga gab-i, ginmaltrato sia sang mga Judiyo, kag pagkaaga ginpaantos sia sang mga Romano. (Mateo 26:67, 68; Juan 19:1-3) Mahimo nga amo ini ang pila ka rason kon ngaa madasig sia nga napatay.

Sayop nga pagpati: Si Jesus pirme serioso kag masinulub-on.

Ang kamatuoran: Ginpakita gid ni Jesus ang mga kinaiya sang iya Amay sa langit nga si Jehova, nga ginalaragway sang Biblia bilang “malipayon nga Dios.” (1 Timoteo 1:11; Juan 14:9) Ang matuod, gintudluan ni Jesus ang mga tawo kon paano mangin malipayon. (Mateo 5:3-9; Lucas 11:28) Maathag nga pirme makita sa ekspresyon sang nawong ni Jesus nga malipayon sia.