May ginasugid ang libro sang Bugna parte sa “isa ka babayi” nga “dakung makihilawason nga babayi” kag may ngalan sia nga “isa ka misteryo: ‘Babilonia nga Daku.’” (Bugna 17:1, 3, 5) Ginapresentar sini nga babayi ang kabilugan nga grupo sang butig nga mga relihion sa kalibutan, nga ‘nagpati sa kabutigan sa baylo sang kamatuoran tuhoy sa Dios.’ a (Roma 1:25) Bisan pa indi palareho ini nga mga relihion, tanan sila nagpahilayo sa mga tawo sa pagsimba sa matuod nga Dios, nga si Jehova.—Deuteronomio 4:35.

Mga paagi para makilala ang Babilonia nga Daku

1.   Ang Babilonia nga Daku isa ka simbulo. Ang libro sang Bugna nagagamit sang “mga tanda,” gani makasiling kita nga ang Babilonia nga Daku isa lang ka simbulo, indi isa ka literal nga babayi. (Bugna 1:1) Dugang pa, “nagapungko [sia] sa ibabaw sang madamo nga tubig,” nga nagarepresentar sang “mga katawhan, mga kadam-an, mga pungsod kag mga hambal.” (Bugna 17:1, 15) Indi ini mahimo sang isa ka literal nga babayi.

2.   Ginarepresentar sang Babilonia nga Daku ang isa ka internasyonal nga organisasyon. Gintawag sia nga “daku nga siudad nga may ginharian sa mga hari sang duta.” (Bugna 17:18) Gani, bilog nga kalibutan ang iya sakop kag naimpluwensiahan.

3.   Ang Babilonia nga Daku isa ka relihioso nga organisasyon, indi pulitikal ukon komersial. Ang Babilonia sang una isa gid ka relihioso nga siudad, kay kilala ini sa “pagpaniwtiw” kag “binabaylan.” (Isaias 47:1, 12, 13; Jeremias 50:1, 2, 38) Ang matuod, ang mga nagaistar sa siudad nagasimba sa butig nga mga relihion nga nagakontra sa matuod nga Dios, si Jehova. (Genesis 10:8, 9; 11:2-4, 8) Ginkabig sang mga manuggahom sang Babilonia ang ila kaugalingon nga mas mataas sangsa kay Jehova kag sa pagsimba sa iya. (Isaias 14:4, 13, 14; Daniel 5:2-4, 23) Pareho man sini, kilala ang Babilonia nga Daku sa iya “espiritistiko nga mga buhat.” Gani ginapakita sini nga isa sia ka relihioso nga organisasyon.—Bugna 18:23.

    Ang Babilonia nga Daku indi pulitikal nga organisasyon, bangod “ang mga hari sang duta” nagalalaw sa iya kalaglagan. (Bugna 17:1, 2; 18:9) Indi man sia komersial nga organisasyon, kay indi sia ang ginapatuhuyan sang Biblia nga “mga negosyante sa duta.”—Bugna 18:11, 15.

Photograph taken by courtesy of the British Museum

4.   Ang Babilonia nga Daku nagakabagay gid sa pagrepresentar sa butig nga relihion. Imbes nga tudluan ang mga tawo nga mangin malapit sa matuod nga Dios nga si Jehova, ginatudluan sang butig nga relihion ang mga tawo nga magsimba sa iban nga mga dios. Ginatawag ini sang Biblia nga “espirituwal nga pagpakighilawas.” (Levitico 20:6; Exodo 34:15, 16) Madamo nga butig nga relihion ang nagatudlo gihapon sang mga pagpati nga naghalin pa sa Babilonia sang una, lakip ang trinidad, imortal nga kalag, kag ang paggamit sang mga imahen sa pagsimba. Ginasamuan man sini nga mga relihion ang ila pagsimba sang gugma sa kalibutan. Ini nga pagluib ginatawag sang Biblia nga espirituwal nga pagpanghilahi.​—Santiago 4:4.

    Ang manggad sang butig nga relihion kag ang ila pagpakitakita sini nagasanto gid sa paglaragway sang Biblia sa Babilonia nga Daku, nga “napanaptan sing purpura kag eskarlata” kag “napunihan sing bulawan kag malahalon nga mga bato kag perlas.” (Bugna 17:4) Ang Babilonia nga Daku amo ang ginhalinan sang “makangilil-ad nga mga butang sang duta,” ukon mga panudlo kag mga buhat nga nagapakahuya sa Dios. (Bugna 17:5) Ang mga miembro sang butig nga relihion amo ang “mga katawhan, mga kadam-an, mga pungsod kag mga hambal” nga nagasuporta sa Babilonia nga Daku.​—Bugna 17:15.

 Ang Babilonia nga Daku amo ang balasulon sang kamatayon “sang tanan nga ginpatay sa duta.” (Bugna 18:24) Halin sang una, wala lang gindabukan sang butig nga relihion ang mga inaway kag terorismo, kundi wala man nila gintudluan ang mga tawo sang kamatuoran parte kay Jehova, ang Dios sang gugma. (1 Juan 4:8) Isa ini ka rason sang grabe nga pagpinatyanay.

 Para sa Dios, ang mga sala sang Babilonia nga Daku “nagtangkas na tubtob sa langit.” (Bugna 18:4, 5) Akig gid ang Dios sa butig nga mga relihion kay sala gid ang pagpakilala nila sa Iya kag malain gid ang pagtratar nila sa ila mga sumulunod.

 Ang Biblia nagasiling nga “ginpahayag sang Dios ang paghukom” sa Babilonia nga Daku. (Bugna 18:20) Paagi sa paggamit sang mga simbulo, gintagna sang Biblia nga laglagon sang Dios ang tanan nga butig nga relihion. (Bugna 18:8) Gamiton niya ang mabangis nga sapat nga eskarlata ang kolor, nga nagrepresentar sang gamhanan nga pulitikal nga organisasyon, para salakayon ang butig nga relihion kag laglagon ini. (Bugna 17:16, 17) “Subong sini kadasig ang pagtagbong sa daku nga siudad sang Babilonia, kag indi na gid sia makita liwat.” (Bugna 18:21) Bangod sini, ang mga gusto mapahamut-an ang Dios dapat nga ‘maggua sa tunga nila’, nga ginapain ang ila kaugalingon halin sa butig nga relihion.—2 Corinto 6:14-17.