Ano ang Ginasiling sang Biblia Parte sa Krismas?

I-PLAY

Ang sabat sang Biblia

Wala ginsambit sa Biblia ang petsa sang pagkatawo ni Jesus, kag wala man ini nagsiling nga selebrahon naton ang iya kaadlawan. Subong sang ginsiling sang McClintock and Strong’s Cyclopedia: “Ang pagsaulog sang Krismas wala ginsugo sang Dios, kag wala man ini maghalin sa BT [Bag-ong Testamento].”

Kon usisaon naton ang kasaysayan sang Krismas, maathag nga naghalin ini sa ritwal sang pagano nga mga relihion. Suno sa Biblia, ginapaakig naton ang Dios kon ginasimba naton sia sa paagi nga wala niya nahamut-an.—Exodo 32:5-7.

Kasaysayan sang mga kustombre sang Krismas

Selebrasyon sang kaadlawan ni Jesus: “Ang unang mga Cristiano wala nagsaulog sang pagkabun-ag [ni Jesus] kay para sa ila ang pagsaulog sang kaadlawan ni bisan sin-o isa ka pagano nga kustombre.”—The World Book Encyclopedia.
Disiembre 25: Wala sing ebidensia nga natawo si Jesus sa sini nga petsa. Mahimo nga ginpili sang mga lider sang relihion ini nga petsa para magdungan sa pagano nga mga kapiestahan nga ginahiwat kon winter solstice.
Paghatag sing regalo, pagsinalusalo, pagkinasadya: Ang The Encyclopedia Americana nagsiling: “Ang Saturnalia, isa ka Romano nga selebrasyon nga ginsaulog sa tungatunga sang Disiembre, amo ang nangin sulundan sang madamo nga kinabatasan sang pagkinasadya kon Krismas. Halimbawa, sa sini naghalin ang maluho nga sinalusalo, paghatag sing mga regalo, kag pagsindi sing mga kandila.” Ang Encyclopædia Britannica nagsiling nga “wala sing trabaho kag sirado ang mga negosyo” kon Saturnalia.
Christmas lights: Suno sa The Encyclopedia of Religion, ginadekorasyunan sang mga taga-Europa ang ila mga balay “sang tanan nga sahi sang suga kag evergreen” para selebrahon ang winter solstice kag tabugon ang malaut nga mga espiritu.
Mistletoe, holly: Ini nga mga tanom pirme ginagamit nga dekorasyon kon Krismas. “Ang mga Druid nagapati nga ang mistletoe may madyik. Ang holly ginasimba subong panaad nga magabalik ang adlaw.”—The Encyclopedia Americana.
Christmas tree: “Ginasimba sang pagano nga mga taga-Europa ang kahoy kag ginpadayon nila ini sang nangin Cristiano sila.” Ang isa ka pagsimba sa kahoy nga ginahimo asta subong amo ang kinabatasan nga “pagbutang sang Yule tree [Christmas tree] sa puertahan ukon sa sulod sang balay kon tigtulugnaw.”—Encyclopædia Britannica.