Si Maria Bala Iloy sang Dios?

I-PLAY

Ang sabat sang Biblia

Indi. Ang Biblia wala nagatudlo nga si Maria iloy sang Dios, kag wala man sini ginatudlo nga dapat simbahon sang mga Cristiano si Maria. a Binagbinaga:

Wala gid naghambal si Maria nga sia ang iloy sang Dios. Ang Biblia nagsiling nga nagbun-ag sia sang “Anak sang Dios,” indi sang Dios mismo.—Marcos 1:1; Lucas 1:32.
Wala gid nagsiling si Jesucristo nga si Maria iloy sang Dios. Wala man sia nagsiling nga dapat simbahon si Maria. Isa ka bes, grabe gid ang pagdayaw sang isa ka babayi kay Maria kay nangin iloy sia ni Jesus. Pero wala nag-ugyon sa iya si Jesus, kag nagsiling ini: “Mas malipayon ang mga nagapamati sa pulong sang Dios kag nagatuman sini!”—Lucas 11:27, 28.
Ang mga termino nga “Iloy sang Dios” kag “Theotokos” (Nagbun-ag sa Dios) indi mabasa sa Biblia.
Sa Biblia, ang termino nga “Rayna sang Langit” wala nagapatuhoy kay Maria, kundi nagapatuhoy ini sa butig nga diosa nga ginasimba sang apostata nga mga Israelinhon. (Jeremias 44:15-19) Ang “Rayna sang Langit” mahimo nga si Ishtar (Astarte), isa ka diosa sang mga taga-Babilonia.
Ang mga Cristiano sang una wala nagasimba kay Maria, kag wala man nila sia ginhatagan sing pinasahi nga pagpadungog. Ang isa ka historian nagsiling parte sa mga Cristiano sang una: “Mahimo gid nga ginsikway [nila] ang panudlo sang mga kulto kag posible indi nila gusto nga masal-an sila nga nagasimba sa diosa kon hatagan nila sing sobra nga atension si Maria.”—In Quest of the Jewish Mary.
Ang Biblia nagsiling nga ang Dios nagaluntad na halin pa sadto. (Salmo 90:1, 2; Isaias 40:28) Kay wala sia sing ginhalinan, gani wala sia sing iloy. Isa pa, imposible nga makaigo ang Dios sa tiyan ni Maria kay ang Biblia nagasiling nga bisan sa langit indi gani makaigo ang Dios.—1 Hari 8:27.

Si Maria—Iloy ni Jesus indi “Iloy sang Dios”

Si Maria isa ka Judiya, kag kaliwatan sia ni Hari David. (Lucas 3:23-31) Nahamut-an gid sia sang Dios bangod sa iya pagtuo kag debosyon. (Lucas 1:28) Ginpili sia sang Dios nga mangin iloy ni Jesus. (Lucas 1:31, 35) Si Maria may iban pa nga kabataan sa iya bana nga si Jose.—Marcos 6:3.

Ginasugid sang Biblia nga si Maria nangin disipulo ni Jesus, pero diutay lang nga impormasyon ang mabasa naton parte sa iya.—Binuhatan 1:14.

Ngaa nagapati ang iban nga si Maria iloy sang Dios?

Suno sa kasaysayan, nagsugod ang pagsimba kay Maria sang ulihi nga bahin sang ikap-at nga siglo C.E. Sa sina nga tion, ang Iglesia Katolika nangin opisyal nga relihion sang Emperyo sang Roma. Gani madamo nga pagano sang una ang nagpangangkon nga mga Cristiano sila. Ginbaton man sang simbahan ang Trinidad, isa ka doktrina nga wala nabase sa Biblia.

Sa doktrina nga Trinidad, ginapatihan sang simbahan nga si Jesus ang Dios, gani si Maria ang iloy sang Dios. Sang 431 C.E., ginproklamar sang konsilyo sang simbahan sa Efeso si Maria nga “Iloy sang Dios.” Ang mariolatry—ang sobra nga pagpadungog kay Maria—naglapnag pagkatapos sining Konsilyo sang Efeso. Sang nakumbertir ang mga pagano sa Katoliko, ang imahen sang mga diosa sang pertilidad pareho nanday Artemis (Diana, sa mga Romano) kag Isis, amat-amat nga gin-islan sang mga imahen kag simbulo sang Birhen Maria.

Sang 432 C.E., nagmando si Papa Sixtus III nga magpatindog sing simbahan sa Roma sa pagpadungog sa “Iloy sang Dios.” Gintukod ini malapit sa lugar nga ginatindugan sadto sang templo sa pagpadungog kay Lucina, ang diosa sang mga Romano sa pagbata. Ginlaragway sang isa ka awtor ini nga simbahan nga “mabakod nga simbulo nga sa tapos nangin Cristiano ang mga Romano, gin-islan ang pagsimba sa Daku nga Iloy sang pagano nga mga kulto sa pagsimba kay Maria.”—Mary—The Complete Resource.

a May mga relihion nga nagatudlo nga si Maria iloy sang Dios. Ginatawag sia sang iban nga “Rayna sang Langit” ukon Theotokos, isa ka Griego nga tinaga nga nagakahulugan “Nagbun-ag sa Dios.”