Pagkatapos gintuga sang Dios ang una nga lalaki kag babayi, ginkasal sila sang Dios. Ginhimo niya ang pag-asawahay bilang isa ka espesyal nga relasyon sa tunga sang lalaki kag babayi. Amo ini ang mangin pundasyon sang isa ka pamilya.—Genesis 1:27, 28; 2:18.

 Gusto sang Dios nga mangin malipayon ang mga mag-asawa. (Hulubaton 5:18) Sa Biblia, may ginhimo sia nga mga pagsulundan para sa pag-asawahay. May ginhatag man sia nga mga prinsipio nga makabulig sa mga mag-asawa nga mangin malipayon sa ila pag-updanay.

Sa sini nga artikulo

•  Ano nga mga pagsulundan ang ginhatag sang Dios para sa mga mag-asawa?

•  Ano ang ginasiling sang Biblia parte sa pagbulagay kag diborsio?

•  Dapat bala iparehistro ang pag-asawahay para batunon ini sang Dios?

•  Ano ang papel kag responsibilidad sang bana kag asawa base sa Biblia?

•  Ginasugo bala sang Dios nga dapat may bata gid ang mga mag-asawa subong?

•  Paano makabulig sa amon pag-asawahay ang Biblia?

•  Mga teksto sa Biblia parte sa pag-asawahay

 Sa ginsuguran, ginhimo sang Dios ang pag-asawahay para mag-updanay ang isa ka lalaki kag isa ka babayi. (Genesis 2:24) Wala nalipay ang Dios sa poligamya, homoseksuwalidad, ukon pag-live in. (1 Corinto 6:9; 1 Tesalonica 4:3) Gintudluan ni Jesus ang iya mga sumulunod nga sundon ang mga ginapatuman sang Dios halin pa sang una parte sa pag-asawahay.—Marcos 10:6-8.

 Para sa Dios, ang pag-asawahay permanente. Kon ang lalaki kag babayi mag-asawahay, nagapromisa sila nga mangin matutom sila sa isa kag isa kag magaupdanay asta nga buhi sila. Gusto sang Dios nga tumanon nila ina nga promisa.—Marcos 10:9.

 May mga sitwasyon nga indi makaupdanay ang mag-asawa, pareho abi kon ang isa sa ila kinahanglan magpauli sa iya pamilya para atipanon ang pila ka problema ukon emerhensia. Pero kon may problema sa pag-asawahay sang mag-asawa, wala nagaugyon ang Biblia nga magbulagay sila. Sa baylo, ginapalig-on sila sang Biblia nga solbaron ang ila problema para indi sila magbulagay.—1 Corinto 7:10.

Suno sa Biblia, ang  pagpakighilahi amo lamang ang rason para makadiborsio ang isa. (Mateo 19:9) Gani, kon magdesisyon ang bana kag asawa nga magbulagay ukon magdiborsio bisan pa indi pagpakighilahi ang rason, ang bisan sin-o sa ila nga duha indi puede maka-date ukon makapangasawa ukon makapamana liwat suno sa Biblia.—Mateo 5:32; 1 Corinto 7:11.

 Gusto sang Dios nga sundon sang mga Cristiano ang mga kasuguan sang gobierno parte sa pag-asawahay. (Tito 3:1) Kon posible nga iparehistro sang mag-asawa ang ila kasal, dapat nila ini himuon. Paagi sa sini ginapakita nila ang pagtahod sa sekular nga awtoridad kag ginatahod nila ang pagtamod sang Dios nga ang pag-asawahay isa ka permanente nga relasyon. a

•   Mga responsibilidad. Dapat palanggaon kag respetuhon sang mag-asawa ang kada isa. (Efeso 5:33) Dapat nila ihatag sing mahigugmaon ang seksuwal nga kinahanglanon sang kada isa kag likawan gid nila nga magluib sa bisan ano nga paagi. (1 Corinto 7:3; Hebreo 13:4) Kon may mga bata ang mag-asawa, pareho nila nga responsibilidad nga padakuon sila.—Hulubaton 6:20.

   Wala sing may ginasugid ang Biblia kon paano tungaon sang mag-asawa ang ila sekular nga trabaho kag ang mga ulubrahon sa balay. Puede nila istoryahan kon ano ang pinakamaayo para sa ila pamilya.

•   Ang responsibilidad sang bana. Ang Biblia nagasiling nga “ang bana amo ang ulo sang iya asawa.” (Efeso 5:23) Sia ang ulo kay buot silingon dapat niya giyahan ang iya pamilya kag sia ang magahimo sang desisyon para sa kaayuhan sang iya asawa kag mga bata.

   Dapat niya siguraduhon nga naatipan ang ila kinahanglanon sa pisikal, malipayon sila, kag suod sila sa Dios. (1 Timoteo 5:8) Dapat niya pabaloran ang mga kinaiya kag mga ikasarang sang iya asawa. Mapakita niya ini paagi sa pagbulig sa mga ulubrahon sang iya asawa. Kag kon nagahimo sia sang desisyon, dapat man niya anay binagbinagon ang opinyon kag ginabatyag sang iya asawa. (Hulubaton 31:11, 28) Ang Biblia nagasiling nga dapat ipakita sang bana ang gugma samtang ginahimo niya ang iya mga responsibilidad.—Colosas 3:19.

•   Ang responsibilidad sang asawa. Ang Biblia nagasiling nga “ang asawa dapat may tudok nga pagtahod sa iya bana.” (Efeso 5:33) Nalipay gid ang Dios kon ginarespeto sang asawa ang responsibilidad sang iya bana nga ginhatag sang Dios.

   Responsibilidad sang asawa nga buligan ang iya bana, buligan sia nga makahimo sing maayo nga desisyon, kag suportahan ang iya responsibilidad bilang ulo. (Genesis 2:18) Ginadayaw gid sang Biblia ang asawa nga nagatuman sang iya importante nga responsibilidad sa pag-asawahay.—Hulubaton 31:10.

 Wala. Sang una, ginsugo sang Dios ang iya mga sumilimba nga magbata. (Genesis 1:28; 9:1) Pero ini nga sugo wala na naaplikar sa mga Cristiano. Wala ginsugo ni Jesus ang iya mga sumulunod nga magbata. Kag ang iya mga disipulo sang una wala man nagsiling nga dapat may bata gid ang mga mag-asawa. Depende sa mag-asawa kon bala gusto nila magbata ukon indi.

 May mga prinsipio sa Biblia nga makabulig para mangin malipayon ang pag-updanay sang mag-asawa. May mga prinsipio man sa Biblia nga makabulig sa mag-asawa nga malikawan ang mga problema kag kon paano solbaron ang problema sa ila pag-asawahay.

 Ang mga prinsipio sa Biblia makabulig sa mag-asawa nga . . .

•   magpakita sang gugma.—1 Corinto 13:4-7; Colosas 3:14.

•   solbaron ang indi pag-intiendihanay.—1 Corinto 10:24.

•   mangin maayo nga manugpamati.—Santiago 1:19.

•   magpakita sang pagrespeto.—Roma 12:10.

•   patawaron ang kada isa.—1 Pedro 4:8.

•   mangin matutom.—Marcos 10:9.

•   mangin mapinasensiahon.—Efeso 4:2, 3.

•   magbuligay.—Manugwali 4:9.

•   mangin mabakod ang ila relasyon.—Ambahanon ni Solomon 8:7.