Nagakaon ang mga manta ray paagi sa pagpasulod sa ila baba sang tubig-dagat kag sang plankton samtang nagalangoy sila. Dayon nagalabay ang tubig sa isa ka filter, diin nagaumpok ang plankton pasulod sa tutunlan sang manta ray kag ginatulon niya ini. Sigesige nga nagasulod ang tubig kag ginapagua ini sang manta ray sa iya hasang. Pero maseparar gihapon sang manta ray ang plankton sa tubig bisan mas gamay ini sangsa buho sang ila filter. Siling sang isa ka science journalist nga si Ed Yong, ini nga ikasarang “daw indi mapatihan.”

 Binagbinaga: Ang filter sang manta ray daw pareho sang lima ka arko nga nagaporma nga daw husay nga may mga unto sa pihak kag pihak. Ang pila sa mga unto sini nagahilay pagua kag ang iban naman pasulod. Ini nga mga unto nagaseparar sa tubig, diin ang iban sini nagailig paibabaw kag ang iban naman sa tunga amo nga nagaporma ini sang gagmay nga mga alimpulos.

 Kon ang plankton ukon ang iban pa nga magagmay nga mga pagkaon mag-igo sa mga unto, nagaumpok ini kag nagaupod sa mas madasig sing ilig nga tubig pakadto sa tutunlan sang manta ray, kon diin puede na ini matulon. Bisan gamay katama ang mga plankton amo nga makaigo ini sa tunga sang mga unto, pero nagakaanod ini kag nagaumpok pakadto sa tutunlan sang manta ray bangod sang alimpulos nga nagapadasig sang pagkaanod sini. Bangod sini nga filtration system, makaon sang manta ray ang magagmay nga mga pagkaon nga kuntani maglusot sa mga unto kag maggua sa hasang sang manta ray.

 Dugang pa, wala nagabara ang filtration system sang manta ray kag masarangan niya tinluan ang iya kaugalingon, bisan ano pa kadasig ang paglangoy sang manta ray kag bisan ano kadamo ang plankton nga ara sa tubig.

 Gusto sundon sang mga researcher ang ideya halin sa filtration system sang manta ray para maghimo sang mga filter nga makatinlo sang higko nga tubig kag makakuha sang makahalalit nga microplastic nga ara sa tubig.

 Ano sa banta mo: Ang filtration system bala sang manta ray resulta sang ebolusyon? Ukon gindesinyo ini?