“Sang nagaeskwela pa ako, kon may isa nga mag-istorya nga nakig-sex sia, nagaka-pressure man ang iban nga makig-sex kay basi maulihi sila. Kay man, wala sing may gusto nga mangin lain sia sa iban.”—Elaine, 21.

 Na-pressure ka na bala nga makig-sex kay daw ginahimo man ini sang tanan?

 Na-pressure ka na bala nga makig-sex kay ginapilit ka sang isa nga palangga mo nga himuon ini?

 Kon amo, ini nga artikulo makabulig sa imo nga mabatuan ang pressure—halin man sa iban ukon sa imo mismo kaugalingon—kag makahimo sing insakto nga mga desisyon.

•  Ang sala nga pagpati kag ang matuod

•  Kon paano batuan ang pressure nga makig-sex

•  Ang ginasiling sang iban

 SALA NGA PAGPATI: Ang tanan nakapakig-sex na (ako na lang ang wala).

 ANG MATUOD: Suno sa isa ka surbe, duha sa kada tatlo ka tin-edyer nga nagaedad sang 18 anyos ang nakig-sex na. Pero buot silingon man sini nga madamo pa nga tin-edyer—sobra sa 30 porsiento—ang wala pa nakig-sex. Gani indi “tanan” nagapakig-sex.

 SALA NGA PAGPATI: Mapabakod sang sex ang amon relasyon.

 ANG MATUOD: Amo sina ang ginasiling sang pila ka lalaki para mapilit nila ang mga babayi nga makig-sex sa ila, pero indi ina matuod. Sa masami, gina-breakan sang lalaki ang babayi kon nakig-sex na sa iya ang babayi—amo nga naakig gid ang babayi kay abi niya serioso sa iya ang lalaki ukon unungan sia sini. a

 SALA NGA PAGPATI: Ginadumilian sang Biblia ang pag-sex.

 ANG MATUOD: Wala nagsiling ang Biblia nga malain ang pag-sex. Pero para lang ini sa lalaki kag babayi nga mag-asawa.—Genesis 1:28; 1 Corinto 7:3.

 SALA NGA PAGPATI: Mangin miserable ang akon kabuhi kon sundon ko ang Biblia.

 ANG MATUOD: Kon maghulat ka kag makig-sex ka lang pagkatapos sang kasal, mangin mas malipayon ka bangod wala ka sing kabalak-an, hinulsulan, kag mga insecurity nga sa masami nabatyagan sang mga nakig-sex antes sang kasal.

 Ang punto: Wala pa sing tawo nga nahalitan kay naghulat sia nga makasal anay antes makig-sex. Pero madamo nga kabuhi ang naguba kay nakig-sex sila antes sang kasal.

•   Pabakura ang imo panindugan sa kon ano ang insakto kag sala. Siling sa Biblia, ginagamit sang hamtong nga mga tawo ang ‘ila mga ikasarang sa paghangop kag ginahanas ini nga makilala ang maayo kag malain.’ (Hebreo 5:14) May panindugan sila kag indi madali madala sa pressure.

   “Ginatinguhaan ko gid nga maghimo sing maayo para may maayo ako nga reputasyon. Kag ginalikawan ko gid nga ibutang ang akon kaugalingon sa sitwasyon nga puede magguba sini.”—Alicia, 16.

   Pamensari ini: Ano nga reputasyon ang gusto ko matigayon? Takus bala nga isakripisyo ko ang akon reputasyon para manamian lang ang iban sa akon?

•   Binagbinaga ang malain nga mga resulta. Ang Biblia nagasiling: “Kon ano ang ginasab-ug sang tawo, ini man ang iya anihon.” (Galacia 6:7) Pensara ang mangin epekto sini sa kabuhi mo—kag sa kabuhi niya—kon magpadala ka sa pressure nga makig-sex. b

   “Ang mga tawo nga nakig-sex antes sang kasal masami nga ginakonsensia, nagahinulsol, kag nagabatyag nga wala sing nagapalangga sa ila. Wala pa dira nalakip ang posibilidad nga magbusong ukon malatnan sang sexually-transmitted disease.”—Sienna, 16.

   Pamensari ini: Ang libro nga Sex Smart namangkot: “Kon ginapilit ka sang imo mga abyan nga maghimo sang isa ka butang nga makaguba sang imo kabuhi, sila bala ang mga tawo nga gusto mo updon kag pangayuan sing laygay parte sa importante nga mga butang sa imo kabuhi?”

•   Mangin balanse sa imo pagtamod. Ang sex indi malain. Ang matuod, ginapakita sang Biblia nga dapat magkalipay sa sini ang mag-asawa.—Hulubaton 5:18, 19.

   “Ang sex isa ka matahom nga bahin sang pagpanuga. Gusto sang Dios nga magkalipay kita sa sini, pero dapat sa sulod lamang sang kahimusan sang pag-asawahay.”—Jeremy, 17.

   Pamensari ini: Kon magpakasal ka sa ulihi, puede ka gid mag-sex. Kag ma-enjoy mo gid ini sing maayo nga wala nagakabalaka sa malain nga mga resulta nga ginsambit kaina.