Sa sini nga artikulo

•  Ano ang pag-date?

•  Handa ka na bala mag-date?

 Para sa pila ka tawo ang pag-date lingawlingaw lang. Pero sa sini nga artikulo, ang “pag-date” nagapatuhoy sa tion nga nagaupdanay ang duha ka tawo, ukon nagahatag sang tion sa isa kag isa para mabal-an nila kon bala bagay sila nga mangin mag-asawa. Gani, may goal ang pag-date. Indi lang ini para makuha ang atension sang opposite sex.

 Sa ulihi, ang mga naga-date dapat maghimo sang desisyon. Mapakasal bala sila ukon mabulagay? Kon naga-date ka na, dapat handa ka bisan diin man sa sini ang matabo.

 Ang punto: Kon pamatyag mo handa ka na mag-date, dapat handa ka naman mangasawa ukon mamana.

 Ang pag-date posible magresulta sa pag-asawahay, gani dapat mo pamensaron kon ano nga mga kinaiya ang ara sa imo nga makabulig ukon makaguba sa isa ka relasyon. Halimbawa, binagbinaga ang masunod:

•   Pagtrato sa imo pamilya. Kon ano ang pagtrato mo sa imo mga ginikanan kag mga utod ilabi na kon na-stress ka, masami nga magapakita kon paano mo tratuhon ang imo mangin bana ukon asawa.

   Prinsipio sa Biblia: “Isikway ninyo ang tanan nga sahi sang dumot, kaakig, kasingkal, sininggitanay, masakit nga hambal, kag ang tanan nga kalainan.”—Efeso 4:31.

   Pamangkuta ang imo kaugalingon: ‘Masiling bala sang akon mga ginikanan kag mga utod nga ginarespeto ko sila? Kon may indi pag-intiendihanay, ginaistoryahan bala namon ini sing kalmado, ukon nagapangakig dayon ako kag nagapakigbais?’

•   Pagsakripisyo. Kon may bana ka na ukon asawa, kinahanglan mo pamensaron kon ano ang iya gusto kag sa masami kinahanglan mo magsakripisyo paagi sa pagsunod sang iya gusto.

   Prinsipio sa Biblia: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

   Pamangkuta ang imo kaugalingon: ‘Ginapilit ko bala ang gusto ko? Para sa iban, rasonable bala ako? Sa ano nga mga paagi nga ginapakita ko nga ginauna ko ang gusto sang iban sangsa akon gusto?’

•   Pagpaubos. Ang isa ka maayo nga bana ukon asawa nagaako sang iya mga sala kag sinsero nga nagapangayo sing pasaylo.

   Prinsipio sa Biblia: “Kay kita tanan makasala sing madamong beses.”—Santiago 3:2, footnote.

   Pamangkuta ang imo kaugalingon: ‘Ginaako ko bala ang akon mga sala, ukon nagarason pa ako? Nagapangakig bala ako kon ginalaygayan ako sang iban para mag-uswag ako?’

•   Paggamit sang kuarta. Ang kuarta amo ang isa sa panguna nga mga rason sang pagbaisay sang mag-asawa. Gani malikawan ninyo ang pagbaisay kon maayo ka maggamit sang kuarta.

   Prinsipio sa Biblia: “Sin-o sa inyo nga luyag magtukod sang torre ang wala anay nagapungko kag nagasuma sang gasto agod mahibaluan kon bala may bastante sia nga inugpahuman sa sini?”—Lucas 14:28.

   Pamangkuta ang imo kaugalingon: ‘Makontrol ko bala ang akon paggasto, ukon pirme ako may utang? Paano ko ginapakita nga responsable ako sa paggamit sang kuarta?’

•   Espirituwal nga rutina. Kon isa ka sa mga Saksi ni Jehova, kinahanglan may regular ka nga rutina sa pagtuon sang Biblia kag sa pag-attend sa Cristianong mga miting.

   Prinsipio sa Biblia: “Malipayon ang mga mahunahunaon sa ila espirituwal nga kinahanglanon.”—Mateo 5:3.

   Pamangkuta ang imo kaugalingon: ‘May ginahimo bala ako para mapabakod ang akon pagtuo? Ang akon rutina sa pagsimba bala ang pinakaimportante sa akon kabuhi, ukon ginatugutan ko nga masablagan ini sang iban nga butang?’

 Ang punto: Ang imo pakaslan nagakabagay gid makakita sang isa ka maayo nga bana ukon asawa. Kon ginatinguhaan mo nga mangin maayo nga bana ukon asawa, labanlaban nga makakita ka sang isa nga nagatinguha man nga mangin amo sina.