Ano sa banta mo?

•   Malain bala ang paggamit sang mga horoscope kag Ouija board, ukon mamangkot sa mga manugpakot?

•   Himuhimo lang bala nga istorya ang parte sa espiritismo—ang simbuliko nga inaway sang maayo kag malain—ukon matuod ini kag makahalalit?

 Usisaon sini nga artikulo kon ngaa mahimo makagalanyat ang espiritismo kag kon ngaa dapat ka mag-andam sa sini.

•  Ngaa makagalanyat ini?

•  Ngaa dapat mag-andam?

•  Ang puede mo himuon

•  Ang ginasiling sang iban

 Ang industriya sang kalingawan nakaganansia sang daku sa paghimo nila sang mga pelikula, palaguaon sa TV, video game, kag mga libro nga may labot sa espiritismo. Tungod sini, madamo nga pamatan-on ang nanamian sa astrolohiya, mga demonyo, mga bampira, kag inaswang. Ngaa? Ang pila sa mga rason amo ang masunod:

•   Pagkamausisaon: Para mabal-an kon bala matuod gid ang espiritu nga mga tinuga

•   Kabalaka: Para mabal-an kon ano ang matabo sa palaabuton

•   Komunikasyon: Para maistorya ang napatay nga pinalangga

 Mahimo indi man sala ina nga mga rason. Halimbawa, normal lang nga mabalaka sa palaabuton ukon mahidlaw sa napatay nga pinalangga. Pero may mga halit nga dapat mo mahibaluan.

 Ang Biblia may serioso nga mga paandam sa bisan ano nga may labot sa espiritismo. Halimbawa, nagsiling ini:

 “Wala sing bisan sin-o sa inyo nga . . . nagapamakot, nagahimo sing madyik, nagapamakot pasad sa mga panimad-on, babaylan, nagapanglumay, nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay. Kay ang nagahimo sini nga mga butang makangilil-ad kay Jehova.”—Deuteronomio 18:10-12.

 Ngaa ginapakalain sang Biblia ang espiritismo?

•   Tuyo sang espiritismo nga makig-abyan ang isa sa mga demonyo. Ang Biblia nagatudlo nga ang iban nga anghel sadto nagrebelde sa Dios kag ginhimo nila ang ila kaugalingon nga kaaway niya. (Genesis 6:2; Judas 6) Ining malain nga mga anghel, nga ginatawag nga mga demonyo, nagapatalang sa mga tawo paagi sa mga espiritista, mga manugpakot, kag astrolohiya. Mangin kaaway kita sang Dios kon ginahimo naton ini nga mga butang.

•   Tuyo sang espiritismo nga papatihon ka nga may mga tawo nga makapakot sang palaabuton. Pero, ang Dios lang ang makasiling: “Halin sa ginsuguran gintagna ko ang mahanabo, kag ang mga butang nga wala pa matabo.”—Isaias 46:10; Santiago 4:13, 14.

•   Tuyo sang espiritismo nga papatihon ka nga ang mga patay makakomunikar sa mga buhi. Pero ang Biblia nagasiling: “Ang mga patay wala gid sing nahibaluan . . . Wala na sing hilikuton ukon plano ukon ihibalo sa Lulubngan.”—Manugwali 9:5, 10.

 Base sa sini nga mga rason, ang mga Saksi ni Jehova nagalikaw sa bisan ano nga may labot sa espiritismo. Ginalikawan man nila ang mga kalingawan nga may labot sa mga zombie, bampira, kag sa makatilingala nga mga butang. “Kon may labot ini sa espiritismo,” siling sang pamatan-on nga si Maria, “indi ko ini dapat pagtan-awon.” a

•   Panikasugi nga “ang [imo] konsiensia matinlo” sa atubangan ni Jehova paagi sa paglikaw sang bisan ano nga buhat ukon kalingawan nga may labot sa espiritismo.—Binuhatan 24:16.

•   Ihaboy ukon sunuga ang bisan ano nga gamit mo nga may labot sa espiritismo. Basaha ang Binuhatan 19:19, 20, kag tandai ang maayo nga halimbawa nga ginpakita sang unang-siglo nga mga Cristiano parte sini.

 Tandai: Kon likawan mo ang mga buhat kag kalingawan nga may labot sa espiritismo, nagadampig ka kay Jehova. Kag ginapasadya sini ang iya tagipusuon!—Hulubaton 27:11.