“Sang may mga problema ako sa eskwelahan, nakabulig gid sa akon ang pagpamensar sa tawo nga nanamian ko nga nakaeksperiensia na sang akon problema. Dayon ginsunod ko ang iya ginhimo. Kon may role model ka, nagahapos ang isa ka mabudlay nga sitwasyon.”​—Haley.

 Ang imo role model makabulig sa imo nga malikawan ang mga problema kag malab-ot ang imo mga goal. Gani dapat magpili ka sing maayo nga role model.

•  Ngaa dapat magpili sing maayo?

•  Paano magpili?

•  Ang ginasiling sang iban

•   Ang imo mga role model makaimpluwensia sa imo mga ginahimo.

   Ang Biblia nagsiling nga dapat sundon sang mga Cristiano ang halimbawa sang maayo nga mga tawo. Ini nagsiling: “Samtang ginapanilagan ninyo ang resulta sang ila paggawi, iluga ang ila pagtuo.”​—Hebreo 13:7.

   Tip: Ang imo ginpili nga mga role model may maayo ukon malain nga impluwensia sa imo. Gani pilia ang mga tawo nga may maayo nga mga kinaiya, indi lamang ang popular ukon kaedad mo.

   “Madamo ako sing natun-an sa pareho ko nga Cristiano nga si Adam. Kanami sang iya batasan kag pagtan-aw sa mga butang. Madumduman ko pa gani asta subong ang pila ka butang nga iya ginsiling kag ginhimo. Wala lang sia kabalo nga daku gid ang nabulig niya sa akon.”​—Colin.

•   Ang imo mga role model makaimpluwensia sa imo ginahunahuna kag ginabatyag.

   Ang Biblia nagsiling: “Indi kamo magpadaya. Ang pagpakig-upod sa malain nga mga tawo nagapalain sang mapuslanon nga mga batasan.”​—1 Corinto 15:33.

   Tip: Indi ka magpili base lang sa hitsura. Pilia ang tawo nga manami ang mga kinaiya. Kay kon hitsura lang ang basihan mo mahimo ma-disappoint ka lang.

   “Magabatyag ka nga walawala kag malaw-ay kon pirme mo ginakumparar ang imo kaugalingon sa matahom nga mga tawo. Kag ma-obsess ka lang sa imo hitsura.”​—Tamara.

   Pamensara ini: Ano ang posible nga malain nga resulta kon ang pilion mo nga role model mga artista kag mga athlete?

•   Ang imo mga role model may epekto kon bala malab-ot mo ang imo mga goal ukon indi.

   Ang Biblia nagsiling: “Ang tawo nga nagaupod sa maalamon mangin maalamon man.”​—Hulubaton 13:20.

   Tip: Pilia ang mga role model nga nagapakita sing maayo nga mga kinaiya nga gusto mo sundon. Samtang ginapanilagan mo sila, makatuon ka sing mga paagi para malab-ot ang imo goal.

   “Imbes magsiling nga ‘Gusto ko mangin responsable,’ isiling, ‘Gusto ko mangin responsable pareho kay Jane. Wala sia nagakaleyt kag ginahimo gid niya ang iya mga asaynment.’”​—Miriam.

   Ang punto: Kon magpili ka sing maayo nga role model, masiguro mo nga mangin pareho ka sa iya sa ulihi.

 Makapili ka sing role model sa duha ka paagi.

1.   Mamensar sing kinaiya nga gusto mo, dayon magpili sing tawo nga nanamian mo nga may amo sina nga kinaiya.

2.   Magpili sang tawo nga nanamian mo, dayon mamensar sang iya kinaiya nga gusto mo sundon.

 Ang worksheet sini nga artikulo makabulig sa imo nga mahimo ina.

 Nalakip sa imo mga role model:

•  Katubotubo. “Gusto ko mangin pareho sa akon best friend. Concern gid sia sa iban kag may time sia para sa ila. Mas bata sia sa akon, pero may ’nami sia nga mga batasan nga wala sa akon, gani gusto ko sia sundon.”​—Miriam.

•  Adulto. Lakip sa ila ang imo mga ginikanan ukon mga kauturan sa kongregasyon. “Role model ko gid ang akon mga ginikanan. Kanami gid sang ila mga kinaiya. Nakita ko nga may mga kakulangan man sila, pero matutom sila gihapon. Kon pareho na ang akon edad sa ila, gusto ko amo man sina ang ihambal sang iban sa akon.”​—Annette.

•  Karakter sa Biblia. “Nagpili ako sing pila ka role model sa Biblia, pareho nanday Timoteo, Rut, Job, Pedro, kag ang Israelinhon nga bata nga babayi kay may gusto ako sundon sa kada isa sa ila. Samtang ginatun-an ko ang mga karakter sa Biblia, mas nakilala ko pa gid sila sing maayo. Nanamian gid ako sa pagtuon sang libro nga Iluga ang Ila Pagtuo, pati na ang ‘Role Model Index’ sa duha ka volume sang libro nga Questions Young People Ask​—Answers That Work.”​—Melinda.

 Tip: Indi lang isa ka role model ang dapat mo pilion. Si apostol Pablo nagsiling sa iya kaupod nga mga Cristiano: “Talupangda ninyo ang mga nagalakat sa paagi nga nahisanto sa halimbawa nga ginpahamtang namon sa inyo.”​—Filipos 3:17.

 Nahibaluan mo bala? Puede ka man mangin role model sang iban. Ang Biblia nagsiling: “Mangin halimbawa ka sa mga matutom sa imo paghambal, paggawi, gugma, pagtuo, kag katinlo.”​—1 Timoteo 4:12.

 “Bisan may mga dapat ka pa pauswagon, puede ka gihapon makabulig sa iban nga mangin mas maayo nga tawo. Wala ka lang kabalo pero posible may nagatan-aw sa imo, kag mahimo ang imo ginahambal may daku nga epekto sa iya.”​—Kiana.