Ang kalabanan nga pamatan-on wala sing ginaatipan nga nagamasakit. Kay man, madugay pa antes magmasakit ang ila mga ginikanan.

 Pero ano abi kon nagmasakit si Papa ukon si Mama mo samtang tin-edyer ka pa? Ari ang duha ka pamatan-on nga nakaeksperiensia sina.

•  Istorya ni Emmaline

•  Istorya ni Emily

 Si Mama may Ehlers-Danlos syndrome (EDS). Isa ini ka balatian nga nagapalanakit ang imo lutalutahan, panit, kag mga kaugatan.

 Wala ini sang bulong, kag naglala ang sitwasyon ni Mama sa sulod sang nagligad nga pulo ka tuig. May mga bes gani nga nubonubo gid ang iya blood count kag diutayan lang sia mapatay. Kag may mga tion man nga grabe gid ang iya kasakit amo nga gusto niya na lang mapatay.

 Ako kag ang akon pamilya mga Saksi ni Jehova. Ang amon kongregasyon daku gid ang bulig sa amon! Halimbawa, sining karon lang may pamatan-on nga babayi nga kaedad ko nga nagpadala sing kard sa amon pamilya. Nagsiling sia nga palangga gid niya kami kag handa sia sa pagbulig sa amon. Kanami gid kon may amo ka sini nga klase sang abyan.

 Daku man ang nabulig sang Biblia sa akon. Halimbawa, ang isa sa paborito ko nga teksto amo ang Salmo 34:18 nga nagasiling: “Malapit si Jehova sa mga nagaantos.” Ang isa pa amo ang Hebreo 13:6, nga nagasiling: “Si Jehova ang akon manugbulig; indi ako magkahadlok.”

 Nanamian gid ako sa ikaduha nga teksto. Nahadlok gid ako nga mapatay si Mama. Palangga ko gid sia, kag ginapasalamatan ko ang kada adlaw nga ara sia. Ini nga bersikulo nakabulig sa akon nga indi ako dapat mahadlok bisan ano man ang matabo sa ulihi.

 Pero may ara pa ako ginakahadlukan. Ang EDS ginapanubli. Ang kay Mama napanubli niya kay lola, kag ang akon napanubli ko kay Mama. Huo​—may EDS man ako. Pero ginapasalig ako sang Hebreo 13:6 nga si Jehova “akon [man] manugbulig.”

 Sa subong, ginapasalamatan ko kon ano ang ara sa akon kag wala ginabalikan ang nagligad​—ukon ginakabalak-an ang buas. Ma-depress lang ako kon dumdumon ko ang mahimo ni Mama sang una. Ang Biblia nagsiling nga ang mga pagtilaw naton subong “umalagi [lang] kag mamag-an” kon ikumparar sa paglaum nga mabuhi sing wala katapusan kag indi na magmasakit.​—2 Corinto 4:​17; Bugna 21:​1-4.

 Binagbinaga ini: Ano ang nakabulig kay Emmaline nga mangin positibo? Paano ka makapabilin nga positibo bisan pa may mga kabudlayan?

 Sang hayskul ako, nag-atake ang depresyon ni Papa. Pamatyag ko nadula si Papa kag ginbuslan sia sang bag-o nga tawo. Sugod sadto, pirme na sia ginasubuan, nahadlok bisan wala sing rason, kag ginanerbios. Kinse ka tuig na sia nga nagaantos sini. Nagalalain ako nga makita sia nga nasubuan gid, bisan pa kabalo sia nga wala sing rason nga masubuan sia!

 Mga Saksi ni Jehova kami, kag ang amon kongregasyon daku gid ang nabulig sa amon. Kaayo gid sang amon mga kauturan kag ginaintiende nila kami. Wala gid nila ginapabatyag kay Papa nga wala sia sing pulos sa kongregasyon. Mas ginpalangga ko pa gid si Papa subong kay nakita ko kon paano niya ginabatas ini nga pagtilaw.

 Nahidlaw ako sa akon Papa sang una nga wala sing depresyon, wala ginanerbios, wala nagaantos, kag malipayon. Kalain pensaron nga nagapakigbato sia adlaw-adlaw sa indi makita nga kaaway nga ara lang sa iya pensar.

 Pero nagatinguha gid si Papa nga mangin positibo. Sang gin-atake sia sang grabe gid nga depresyon sining karon lang, ginatinguhaan gid niya nga makabasa sing Biblia bisan pila lang ka bersikulo kada adlaw. Nagpalig-on gid ini sa iya. Daku ang nabulig sini nga rutina sa iya. Nagdayaw gid ako kay Papa sa sining pinakamabudlay niya nga tion.

 Nanamian gid ako sang teksto sa Nehemias 8:​10, nga nagasiling: “Ang kalipay ni Jehova amo ang inyo pamakod.” Matuod gid ini. Ang kalipay nga akon nabatyagan kon upod ko ang mga kauturan nga nagahimo sang mga hilikuton sang kongregasyon, nagpaumpaw sa akon sa mga tion nga grabe ang akon kasubo ako. Nagapahalipay ini sa akon sa bilog nga adlaw. Ang halimbawa ni Papa nagtudlo sa akon nga bisan ano man nga mga kabudlayan ang imo ginaatubang, handa pirme si Jehova nga magbulig sa imo.

 Binagbinaga ini: Paano ni Emily ginbuligan ang iya Papa sang nagabalatian ini? Ano ang mabulig mo sa isa nga may depresyon?