Sa sini nga artikulo

•  Ngaa kinahanglan makig-istorya sing face-to-face?

•  Paano sugdan ang pag-istoryahanay

•  Ang ginasiling sang iban

 Ang iban nagasiling nga ang face-to-face nga pagpakig-istorya mabudlay kag makapa-stress, kag mas mahapos kon mag-text ka na lang.

 “Mas kululbaan kon mag-istorya ka sing face-to-face kay indi mo ma-edit ukon ma-delete ang bisan ano nga ginhambal mo.”—Anna.

 “Ang pag-text daw pareho sa programa nga narekord na nga daan, pero kon nagapakig-istorya ka sing face-to-face daw isa ini ka live nga programa. Kon nagapakig-istorya ako, ginadumdom ko pirme nga dapat ako maghalong kag indi ako dapat magsala sa akon ginahambal!”—Jean.

 Pero sa ulihi, kinahanglan mo matun-an kon paano makig-istorya sa iban sing face-to-face. Halimbawa, kinahanglan mo ini para makakita ka sang bag-o nga mga abyan, makakita sang obra, ukon mangita sang nobya ukon nobyo kon handa ka na magsulod sa relasyon.

 Indi makulbaan kon magpakig-istorya ka sing face-to-face. Masarangan mo ini, bisan pa mahuluy-on ka.

 “Kon kaisa, tanan kita makahambal sang indi amo kag mahuy-an. Indi lang gid naton pagseriosohon ini.”—Neal.

•   Mamangkot. Mamensar sang topiko nga makapainteres sa iban, dayon gamita ini nga topiko para makasugod ka sa pag-istoryahanay. Halimbawa:

   “Diin ka nagbakasyon sang summer?”

   “Kanami bala sini nga website. Nakita mo na ’ni?”

   “Kabalo ka na nga . . . ?”

   Para mas manami ang inyo pag-istoryahanay, pamensara ang pareho ninyo nga mga eksperiensia ukon ang mga butang nga nanamian ninyo himuon. Halimbawa, pareho bala kamo sang eskwelahan ukon obra? Dayon puede ka makapamangkot parte sa mga butang nga pareho kamo.

   “Mamensar sang mga pamangkot nga nanamian ka gid kag gusto mo gid sabton sang mga tawo.”—Maritza.

   Paandam: Indi mangin imbestigador paagi sa sobrasobra nga pagpamangkot. Kag indi man mamangkot sang sobra ka personal amo nga mahuy-an ang imo kaistorya. Posible masaw-ahan sia sa mga pamangkot pareho sang “Ano ang nahadlukan mo gid?” ukon “Ngaa blue lang pirme ang ginasuksok mo?” Ang ikaduha nga pamangkot mahimo pa gani magpabatyag sa iya nga daw ginapakalain mo sia.

   Puede mo malikawan nga mangin daw imbestigador kon isugid mo sa iya kon ano ang imo ginapensar ukon ginabatyag sa pamangkot mo antes ukon pagkatapos sia magsabat. Kon himuon mo ini, mangin maayo ang inyo pag-istoryahanay kag indi sia magbatyag nga daw ginainterbyu mo sia.

   Prinsipio sa Biblia: “Ang panghunahuna sang tawo kaangay sang madalom nga tubig, apang ginatungkad ini sang tawo nga may paghangop.”—Hulubaton 20:5.

•   Magpamati sing maayo. Mangin manami kag magapadayon ang inyo pag-istoryahanay kon magpamati ka sing maayo sa imo kaistorya imbes nga ikaw lang ang magsige hambal.

   “Ginatinguhaan ko nga may matun-an ako nga bag-o sa kaistorya ko. Dayon, ginadumdom ko ang iya ginsugid sa akon para makapamensar ako sang akon ipamangkot kon mag-istoryahanay kami liwat.”—Tamara.

   Paandam: Indi mabalaka kon ano ang isugpon mo sa istorya. Kon magpamati ka sing maayo, makasugpon ka sa ginasiling sang kaistorya mo.

   Prinsipio sa Biblia: “Mangin maabtik sa pagpamati, mahinay sa paghambal.”—Santiago 1:19.

•   Magpakita sing sinsero nga interes. Mas ma-enjoy mo ang pag-istoryahanay kon magpakita ka sing sinsero nga interes sa imo kaistorya.

   “Kon ipabatyag mo sa imo kaistorya nga interesado ka gid sa iya ginasiling, mangin maayo ang inyo pag-istoryahanay, bisan pa may mga tion nga daw wala na kamo sang istoryahan.”—Marie.

   Paandam: Indi mangusisa sing sobra. Mahimo masaw-ahan ang imo kaistorya kon amo sini ang ipamangkot mo: “Kanami sang imo bayo. Tagpila ’na?”

   Prinsipio sa Biblia: ‘Pangitaa indi lamang ang inyo personal nga kaayuhan, kundi ang iya man sang iban.’—Filipos 2:4.

 Paano mo tapuson ang pag-istoryahanay? “Tapusa ang pag-istoryahanay paagi sa paghambal sing positibo,” siling sang pamatan-on nga si Jordan. “Ang pagsiling pareho sang, ‘Kanami kay nakaistoryahanay ’ta’ ukon ‘Sige sa dason naman’ makabulig nga mapadayon ang inyo pag-istoryahanay sa dason ninyo nga pagkit-anay.”