Kon buksan mo ang Biblia, puro letra ang makita mo. Pero indi dayon madulaan sing gana sa pagbasa! Pamensara nga ang unod sang Biblia, daw pareho sang buffet nga may sarisari nga pagkaon. Indi mo makaon ang tanan nga makita mo. Pero puede mo pilion kon ano gid ang imo gusto.

 Para makabenepisyo ka sing maayo sa imo pagbasa sing Biblia, dapat magpokus ka sa imo ginabasa. Ini nga artikulo makabulig sa imo nga himuon ini.

Sa sini nga artikulo

•  Ngaa dapat ka magpokus sa imo ginabasa sa Biblia?

•  Paano ka makabenepisyo sing maayo sa pagbasa sing Biblia?

•  Ang ginasiling sang iban

 Kon ginatinguhaan mo gid nga magbasa sing Biblia, mas makabenepisyo ka man sa sini. Pamensara ini nga pagkumparar: Kon isawsaw mo sing makadali lang ang tsa sa mainit nga tubig, may gamay man ini nga sabor. Pero kon padugayon mo ini sa mainit nga tubig, masaboran mo gid sing maayo ang tsa.

 Amo man sina sa pagbasa sing Biblia. Imbes nga magpadali sa imo pagbasa sing Biblia, magtigana sang tion para mapamensaran mo ang imo nabasa. Amo gid sina ang ginhimo sang manunulat sang Salmo 119. Parte sa kasuguan sang Dios, sia nagsiling: “Ginapamalandungan ko ini sa bug-os nga adlaw.”—Salmo 119:97.

 Siempre, indi man buot silingon nga bilog nga adlaw mo nga basahon ang Biblia kag dayon pamensaran ang imo nabasa. Amo ini ang punto: Ang salmista nagtigana sang tion para pamensaran ang Pulong sang Dios. Nakabulig ini sa iya nga makahimo sang maayo nga mga desisyon.—Salmo 119:98-100.

 “Ginsilingan ako ni Nanay, ‘May pito ka adlaw sa isa ka semana, kag sa sina nga semana madamo ka sang ginahimo para sa imo kaugalingon. Ngaa indi mo paghatagan sing oras si Jehova? Dapat lang nga himuon mo ina!”—Melanie.

 Kon pamensaron mo ang mga prinsipio sa Biblia, makahimo ka sing maayo nga mga desisyon—halimbawa, kon nagapili ka sing mga abyan ukon kon ginasulay ka nga maghimo sing malain.

•   Magplano. “Maghimo sing iskedyul kon san-o mo basahon ang Biblia,” siling sang tin-edyer nga si Julia. “Hibalua kon ano ang imo basahon, kon san-o mo ini basahon, kag kon diin mo ini basahon.”

•   Magpangita sing paagi para makapokus. “Mangita sang malinong nga lugar,” siling sang pamatan-on nga si Gianna. “Isugid sa imo pamilya ang imo iskedyul sa pagbasa sang Biblia para indi ka nila pag-isturbohon.”

   Kon gadyet ang imo ginagamit, i-off ang tanan nga notification. Puede man nga naimprinta nga Biblia ang imo basahon. Ang matuod, ginapakita sang mga research nga kon naimprinta nga publikasyon ang imo ginabasa, mas maintiendihan mo ini. Pero kon sa gadyet ka nagabasa, mahimo nga mas mabudlayan ka magpokus.

   “Indi ako makapokus kon sa gadyet ako nagabasa kay kadamo sang notification. Kon kis-a nagaka-lowbat pa ukon nagakadula ang Internet. Pero kon naimprinta nga libro ang akon basahon, kinahanglan ko lang mangita sang masanag nga lugar.”—Elena.

•   Magpangamuyo anay. Pangabaya si Jehova nga buligan ka nga maintiendihan, madumduman, kag makatuon sa plano mo nga basahon sa Biblia.—Santiago 1:5.

   Para mahimo mo ang imo ginpangamuyo, tun-i sing maayo ang imo ginabasa. Paano mo ina himuon? Kon nagagamit ka sang JW Library app ukon nagabasa sang Biblia online, puede mo ma-click ang bersikulo para makita mo ang dugang nga mga impormasyon kag mga artikulo parte sa sini.

•   Magpamangkot. Halimbawa: ‘Ano ang ginasugid sini sa akon parte kay Jehova? Ginapakita bala sini ang iya kinaiya nga puede ko sundon?’ (Efeso 5:1) ‘Ano nga mga leksion sa sini ang puede ko magamit sa akon kabuhi?’ (Salmo 119:105) ‘Magamit ko bala ang akon nabasa para buligan ang iban?’—Roma 1:11.

   Pamangkuta man ang imo kaugalingon, ‘Ano ang koneksion sang ginabasa ko sa mensahe sang Biblia?’ Importante gid ina nga pamangkot. Ngaa? Kay ang tanan sa Biblia—halin sa Genesis asta sa Bugna—may koneksion sa panguna nga mensahe: Kon paano pakabalaanon ni Jehova ang iya ngalan paagi sa iya Ginharian sa langit kag pamatud-an nga may kinamatarong sia sa paggahom kag ang iya paggahom ang pinakamaayo.