Kon kaisa, ang pila sa mga sumilimba sang Dios nagapamensar kon bala insakto gid man nga sundon ang mga prinsipio sa Biblia. (Salmo 73:2, 3) Basi testingan pa gani nila nga maghimo sang mga butang nga supak sa kasuguan ni Jehova. Dayon, ginatago nila ang ila malain nga paggawi sa mga kauturan sa kongregasyon para paguaon nga maayo sila.

 Ini nga artikulo makabulig sa mga tawo nga doble ang pagkabuhi pero gusto na nga untatan ini.

Sa sini nga artikulo

•  Ano ang doble nga pagkabuhi?

•  Malain na bala ako nga tawo bangod doble ang akon pagkabuhi?

•  Paano ko mauntatan ang doble nga pagkabuhi?

•  Ang ginasiling sang iban

 Doble ang pagkabuhi mo kon ginahimo mo ang malain nga mga butang kon ang imo mga upod wala nagasimba kay Jehova. Pero kon upod mo gani ang matutom nga mga kauturan sa kongregasyon, ginapagua mo nga gusto mo gid alagaron si Jehova. Daw pareho lang nga duha ang imo kabuhi, kag nagasuksok ka sang maskara bangod may ginatago ka.

 “Kon doble ang imo pagkabuhi, may ginatago ka sa mga kauturan kag may ginatago ka man sa imo mga barkada, gani wala sang may tuod nga nakahibalo kon sin-o ka gid. Kon doble ang imo pagkabuhi, ginatunto mo ang tanan.”—Erin.

 Nahibaluan mo bala? Nalakip man sa doble nga pagkabuhi kon may ginahimo ka nga mga butang nga indi gusto ni Jehova bisan pa ikaw lang isa.

 “Sang 14 ang akon edad, nagsugod ako sa pagtan-aw sa imoral nga mga piktyur kag mga video sa Internet. Kon kaupod ko ang iban, ginapakita ko nga daw ginakaugtan ko ang pornograpiya, pero ang matuod nanamian ako sa sini.”—Nolan.

 Prinsipio sa Biblia: “Wala sing tawo nga makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa.”—Mateo 6:24.

 Indi man. Siempre, may pila ka tawo nga indi gusto magsunod sa mga prinsipio sa Biblia. Amo ka gid bala sina? Ukon may iban ka pa nga rason, pareho sang:

•   Nahadlok ka nga maggua nga lain ka sa imo mga kaupdanan.

•   Pamatyag mo mas nagasahuay kamo sang imo mga schoolmate sangsa mga kauturan sa kongregasyon.

•   Pamatyag mo indi mo masarangan sundon ang tanan nga sugo sang Dios.

 “Siguro ang pila ka tin-edyer nga may doble nga pagkabuhi nanamian magpakig-upod sa mga tawo nga wala nagasunod sa mga prinsipio sang Biblia bangod gusto lang nila may kaupdanan sila, bisan sin-o lang.”—David.

 Siempre, indi ini mga rason para mangin doble ang imo pagkabuhi. Pero, ginapakita sini nga bisan ang maayo nga mga tawo puede magkabuhi sing doble. Kon amo sina ang imo sitwasyon, ano ang puede mo himuon?

1.  1. Usisaa ang imo pagkabuhi subong. Pamangkuta ang imo kaugalingon: ‘Amo gid bala sini nga kabuhi ang gusto ko? Kon padayunon ko ini, ano ayhan ang mangin resulta?’

    Prinsipio sa Biblia: “Makita sang tawo nga maalamon ang katalagman . . . , apang ang kulang sing kinaalam nagadiretso lang kag nagaantos sang malain nga resulta.”—Hulubaton 27:12.

2.  2. Isugid ang matuod. Isugid ang imo sitwasyon sa imo mga ginikanan ukon sa hamtong nga abyan nga nagasunod sa mga kasuguan ni Jehova. Mahimo nga malipay sila nga nagpabulig ka. Kag proud sila nga makita nga gusto mo magbag-o!

    “Ang pag-aku sang akon mga sala sa iban amo ang isa sa pinakamabudlay nga ginhimo ko, pero sang ginhimo ko ini, nagmag-an gid ang pamatyag ko.”—Nolan.

    Prinsipio sa Biblia: “Ang tawo nga nagatago sang iya mga sala indi magmadinalag-on, apang ang nagatu-ad sang iya mga sala kag nagatalikod sa sini kaluy-an.”—Hulubaton 28:13.

3.  3. Batuna ang resulta sang imo ginhimo. Dumduma, nga kon may gintago ka sa imo mga ginikanan ukon sa kongregasyon, ginguba mo ang ila pagsalig sa imo. Bilang resulta sang imo ginhimo, posible nga hatagan ka sang pila ka restriksion sang imo mga ginikanan ukon sang mga elder sa kongregasyon. Batuna ini, kag siguraduha nga sugod subong tinguhaan mo na gid nga “magkabuhi sing bunayag sa tanan nga butang.”—Hebreo 13:18.

    Prinsipio sa Biblia: “Pamatii ang laygay kag batuna ang disiplina, agod sa ulihi mangin maalamon ka.”—Hulubaton 19:20.

4.  4. Magpati nga palangga ka gid sang Dios. Palangga kita ni Jehova, kag nahibaluan niya ang tanan naton nga ginahimo. Gani bal-an niya kon doble ang imo pagkabuhi, kag nasubuan gid sia sa sini. Pero, bangod ‘nagaulikid sia sa imo,’ gusto gid niya nga buligan ka nga tadlungon ang imo kabuhi.—1 Pedro 5:7.

    Prinsipio sa Biblia: “Ang mga mata ni Jehova nagatan-aw sa bug-os nga duta agod ipakita ang iya kusog para sa ila nga ang tagipusuon bug-os sa iya.”—2 Cronica 16:9.