Estrikto nga mga maestra kag maestro. Peer pressure. Makapa-stress nga mga exam kag damudamo nga asaynment. Gani mahimo may mga rason gid kon ngaa wala ka nanamian mag-eskwela. a Ang tin-edyer nga si Rachel b nagsiling:

 “Mas gusto ko pa magkadto sa iban nga lugar sangsa eskwelahan. Mas gusto ko pa magkadto sa baybay ukon mag-upod sa akon mga abyan ukon magbulig sa akon mga ginikanan sa pagluto ukon pagpaninlo!”

 Kon pareho kay Rachel ang imo ginabatyag, basi mamensar ka nga kon ara ka sa eskwelahan daw ginapriso ka kag kinahanglan mo ini antuson asta makagua ka kon mag-graduate ka na. Paano mo mabag-o ang imo ginabatyag parte sa imo pag-eskwela?

 Nahibaluan mo bala? Kon bag-uhon mo ang imo ginabatyag parte sa imo pag-eskwela, mas may kontrol ka sa imo sitwasyon kag makita mo nga ang pag-eskwela wala nagapaantos sa imo. Sa baylo, makabulig ini sa imo nga matun-an kag mapanami ang mga skills ukon ikasarang nga kinahanglan mo kon mangin adulto ka na.

 Para mabag-o ang imo ginabatyag parte sa imo pag-eskwela, testingi nga magpokus sa masunod:

 Sa imo edukasyon. Kon madamo ka sang natun-an, mangin mas mahapos para sa imo nga solbaron ang mga problema sa ulihi sa imo obra kag sa iban pa nga bahin sang imo kabuhi. Makabulig man ini para indi ka pirme magsalig sa iban. Pamangkuta ang imo kaugalingon, ‘Bisan pa may mga wala ako nanamian sa eskwelahan, ano nga mga benepisyo ang makuha ko sa akon pag-eskwela?’

 Prinsipio sa Biblia: “Tipigi ang praktikal nga kaalam kag ang ikasarang sa paghunahuna sing maayo.”—Hulubaton 3:21.

 Sa imo batasan. Ang maayo nga batasan nga matun-an mo sa eskwelahan makabulig sa imo nga magamit sing maayo ang imo tion, mangin mapisan sa obra, kag may disiplina sa kaugalingon. Kinahanglan mo ini nga mga kinaiya kon mangin adulto ka na. Pamangkuta ang imo kaugalingon: ‘Paano ako nabuligan sang pag-eskwela nga matun-an ang disiplina sa kaugalingon kag mangin mapisan? Ano ang kinahanglan ko pauswagon parte sa sini?’

 Prinsipio sa Biblia: “May kaayuhan sa tanan nga sahi sang pagpangabudlay.”—Hulubaton 14:23.

 Sa imo relasyon sa iban. Ang pagpakig-istorya sa imo mga classmate sa eskwelahan makabulig sa imo nga magpakita sang kaluoy kag respeto sa iban. “Ang pagtuon kon paano makigkomunikar sa iban, pareho man ka importante sa pagtuon sang history kag science,” siling sang isa ka pamatan-on nga si Joshua. “Isa ini ka skill nga magamit mo sa bilog mo nga kabuhi.” Pamangkuta ang imo kaugalingon, ‘Ano nga mga leksion ang natun-an ko sa eskwelahan parte sa pagpakigbagay sa iban, bisan sa mga tawo nga lain ang ginhalinan ukon pagpati sangsa akon?’

 Prinsipio sa Biblia: “Tinguhai ninyo ang pagpakighidait sa tanan nga tawo.”—Hebreo 12:14.

 Sa imo palaabuton. Ang pag-eskwela makabulig sa imo nga mabal-an ang imo mga abilidad ukon ikasarang kag makahimo ka sang mga goal base sa sini. Ang pamatan-on nga babayi nga si Brooke nagsiling: “Pareho sa akon, posible makabaton ka pa gani sang training parte sa isa ka skill, para kon mag-graduate ka, kalipikado ka mag-obra.” Pamangkuta ang imo kaugalingon: ‘Paano ko masuportahan ang akon kaugalingon kon maka-graduate na ako? Paano ko masigurado nga ang ginatun-an ko magamit ko sa pag-obra?’

 Prinsipio sa Biblia: “Hunahunaa gid sing maayo ang tanan mo nga pagahimuon.”—Hulubaton 4:26, Ang Pulong sang Dios, APD.