•  Ano ang flirting?

•  Ngaa ginahimo ini sang iban?

•  Ngaa delikado ini?

•  Ang ginasiling sang iban

 Para sa iban, ang flirting amo ang pagpakita nga naluyag ka sa isa nga opposite sex paagi sa imo ginahambal kag ginahimo. Sala bala nga ipakita sa isa nga may gusto ka sa iya? Indi man. “Kon handa ka na sa pagdeyt kag may gusto ka sa isa,” siling sang pamatan-on nga si Ann, “paano mo abi mabal-an kon may gusto man sia sa imo?”

 Pero sa sini nga artikulo istoryahan naton ang klase sang flirting nga ginahimo mo para paguaon nga may gusto ka sa isa pero ang matuod wala.

 “OK lang nga magpakita ka sing espesyal nga atension sa isa kon may gusto ka gid man sa iya. Pero lain na nga istorya kon ginapapati mo sia nga may luyag ka kag kon mahulog na ang iya buot, gulpi ka lang nga mag-untat sa pagpakita sing interes sa iya.”​—Deanna.

 Ang iban naga-flirt kay nagadugang ang ila kompiansa sa kaugalingon. “Kon mabatyagan mo nga makuha mo ang atension sang iban, manamian ka pa gid nga himuon ini,” siling sang pamatan-on nga si Hailey.

 Pero kon hungod mo nga ipakita sa isa nga may luyag ka pero ang matuod wala, ginapakita mo nga wala ka sing konsiderasyon sa iya balatyagon. Ginapakita mo man kon ano ka nga klase sang tawo. Ang Biblia nagsiling: “Ginakalipay sang kulang sa maayo nga paghangop ang kabuangan.”​—Hulubaton 15:21.

 Amo gani nga si Hailey nagsiling, “Ang pag-flirt sa umpisa daw wala lang sing kaso, pero sa ulihi ang resulta sini indi maayo.”

•   Ang pag-flirt nagaguba sang imo reputasyon.

   “Ang tawo nga naga-flirt insecure kag immature. Indi sia honest sa imo kag interesado lang sia sa makuha niya sa imo.”​—Jeremy.

   Ang Biblia nagsiling: ‘Ang gugma wala nagapangita sang kaugalingon nga kaayuhan.’—1 Corinto 13:4, 5.

   Binagbinaga ini: Ano ang ginahambal mo kag ginahimo nga puede ka bansagan nga flirt?

•   Ang pag-flirt nagasakit sa balatyagon sang isa.

   “Kon may makilala ako nga naga-flirt, indi ko gusto mag-istorya sa iya. Kay pamatyag ko, nagaistorya lang sia sa akon kay babayi ako. Ang mga tawo nga naga-flirt wala naga-care sa akon; interesado lang sila sa ila kaugalingon.”​—Jaqueline.

   Ang Biblia nagsiling: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”​—1 Corinto 10:24.

   Binagbinaga ini: Nakaagi ka bala nga ginpapati sang isa nga may gusto sia sa imo, pero sang ulihi nabal-an mo nga wala man gali? Kon huo, ano ang ginbatyag mo? Paano mo malikawan nga pabatyagon man sing amo sini ang iban?

•   Ang pag-flirt may malain nga epekto sa imo pagpangita sing matuod nga gugma sa ulihi.

   “lndi gid ako magpakasal ukon bisan magdeyt lang sa isa nga flirt. Paano ko makilala sing maayo, ukon ngaa abi masalig ako sa isa nga may ginatago?”​—Olivia.

   Sa Biblia, ang nagsulat sang Salmo nga si David nagsiling: “Ginalikawan ko ang mga nagapakunokuno.”​—Salmo 26:4.

   Binagbinaga ini: Ano nga klase sang mga tawo ang nanamian sa flirt? Amo na bala nga klase sang tawo ang gusto mo nga manamian sa imo?