Txawm tias Yehauvas tsis tau muab ib txoj cai txwv tsis pub pe dab mlom los, Yakhauj paub tias nws yuav tau pe hawm Yehauvas tib leeg xwb. (Khiav Dim 20:3-5) Vim li ntawd, tom qab Yehauvas hais kom nws rov mus rau Npethees, Yakhauj thiaj qhia kom sawvdaws muab lawv tej mlom pov tseg kom tas. Lawv muab lawv tej qhws ntsej tibsi rau Yakhauj muab pov tseg vim tej yam ntawd kuj txuam nrog kev teev dab thiab. (Chivkeeb 35:1-4) Peb ntseeg tias qhov uas Yakhauj ua li ntawd yeej ua rau Yehauvas txaus siab kawg li.

Niaj hnub no, peb ua li cas peb thiaj qhia tias peb pe hawm Yehauvas tib leeg xwb? Ib qhov peb ua tau yog peb yuav tau muab tej uas txuam nrog kev teev dab pov tseg, thiab ua tib zoo xaiv tej kev lomzem peb xav ua. Yog li ntawd, xav seb tej ntawv peb nyeem lossis tej yeeb yaj kiab peb saib puas txuam nrog kev teev dab thiab ua dab? Puas yog ua txog dab tom neeg haus ntshav, poj ntxoog, lossis neeg tuag mus ua tsov? Tej ntawd puas muab yees siv thiab khawv khoob los ua kev lomzem yam li tsis muaj teeb meem dabtsi? Nco ntsoov tias peb yuav tsum tsis txhob ua ib yam dabtsi ua Yehauvas ntxub.​—Phau Ntawv Nkauj 97:10.

SAIB ZAJ YEEB YAJ KIAB “TAWM TSAM NTXWG NYOOG,” TOM QAB NTAWD TEB COV LUS NUG NO:

• Ib tug uas kawm Vajlugkub hu ua Palesa raug teeb meem dabtsi?

• Vim li cas zoo rau peb mus thov cov txwj laus pab, yog tias peb paub ib tug uas tso tsis tau kev teev dab tseg?

• Yog tias peb xav kom Yehauvas tiv thaiv peb, peb yuav tsum muab tej yam twg tso pov tseg?

• Palesa txiav txim siab ua dabtsi?

• Ntawm thaj chaw koj nyob, ib txhia tau tso kev teev dab tseg li cas?