Tshuav Tsis Ntev Twb Yuav Txog
1. Hnov me kab me noog quaj zom zaws,
Thiab huab ya sib tshooj pes daws.
Koj tawm rooj li plaws mus ua si,
Cas hnub no es yuav tshav ntuj qas nrig.
Koj tos rawv tus koj hlub tshua,
Zaum no tau rov los sib cuag.
Peb ib txwm pheej hais li no,
Tias: “Tshuav tsis ntev twb yuav txog.”
2. Tsev nyob puv ntia qhov txhia qhov chaw,
Tsis hais saum roob los nram dawm.
Hnov suab nkauj seev yees tej kwj ha,
Yog lub kwj ha ntawm tus dej tsaws tsag.
Tej nplej tab tom siav daj rhuv,
Cia li sau los pawv ua phuv.
Peb ib txwm pheej hais li no,
Tias: “Tshuav tsis ntev twb yuav txog.”
(HLOOV SUAB)
Yam zoo peb ua hauv ntiajteb
Nrog tej phoojywg hmov tshua ua ke.
Txhua tus tsis muaj kev nyuaj siab ntxiv,
Hauv ntiajteb tshiab mus tag ib txhis.
3. Mus txog twg los yuav tsw qab ntxiag,
Thiab txhua tus yeej yuav zoo siab.
Koj txawm tsa ncauj hu koj tsev neeg,
Hnub no mas txhua yam puav leej zoo heev.
Peb ua Vajtswv Yehauvas tsaug,
Nws saib xyuas peb zoo kawg nkaus.
Ua tiag tos tej koob hmoov no,
Vim tshuav tsis ntev twb yuav txog.
(HLOOV SUAB)
Kuv luag lis ntxhi thiab yuav hais tias,
“Zaum no wb tau ua ke lawm tiag!”
Yav tas los saib yam li npau suav,
Zaum no kuv nrog koj tsis txawj dhuav.
4. Ntiajteb tshiab los yuav txog,
Yog lub ntuj tshiab kuv nyob tos.
Yog Yehauvas cog lus tseg lawm,
Yeej yuav muaj tshwm sim yam nkaus li ntawd.
Peb cia li zoo siab thiab tso siab,
Rau txhua yam hauv ntiajteb tshiab.
Yog lub ntuj tshiab kuv nyob tos,
Ces tshuav tsis ntev twb yuav txog.
