•   “Suav teb tshaj tawm tias tsis tau pom dua ib xyoos uas ‘kub npaum li’ xyoo no. Tsis tas li ntawd, txij thaum sau keeb kwm los txog nim no tsuas muaj ob zaug uas teb chaws qhuav tshaj xyoo no xwb.”​—The Guardian, Lub 9 Hlis tim 7, 2022.

•   “Tau tsib lub xyoos no teb chaws Afikas qhuav nkig nkuav xwb.”​—UN News, Lub 8 Hli tim 26, 2022.

•   “Cov teb chaws nyob sab Yus Luv muaj ob feem peb tab tom txuag dej, tau 500 xyoo no tsis tau pom ntuj qhuav li no ib zaug li.”​—BBC News, Lub 8 Hli tim 23, 2022.

 Cov neeg txawj ntse ceeb toom tias lub ntiaj teb tsuas muaj yuav qhuav zuj zus lawm xwb. Peb puas tseem muaj kev cia siab rau yav tom ntej? Phau Vajlugkub hais li cas?

 Phau Vajlugkub qhia lawm tias tiam peb nyob no yuav zoo li cas:

•   “Yuav muaj kev tshaib kev nqhis . . . ib qho rau ib qho.”​—Lukas 21:11.

 Yog tsis muaj dej yuav tsis muaj zaub mov. Yog tsis muaj zaub mov ces yuav muaj kev tshaib kev nqhis thiab kev ploj kev tuag, raws nkaus li phau Vajlugkub tej lus faj lem.​—Tshwmsim 6:6, 8.

 Phau Vajlugkub qhia tias vim li cas ntuj ho qhuav zuj zus lawm. Phau Vajlugkub hais tias:

•   “Tsis yog neeg coj tau neeg tshais kauj ruam.”​—Yelemi 10:23.

 Qhov no txhais tias tib neeg tswj kav tsis tau tib neeg. Vim lawv txiav txim tsis zoo thiaj ua rau lub ntiaj teb qhuav nkig nkuav thiab dej thiaj tsis txaus haus.

•   Cov neeg tshawb txuj ci feem coob pom tias tib neeg ua rau lub ntiaj teb sov zuj zus tuaj lawm, twb yog li ntawd lub ntuj thiaj qhuav zuj zus thoob ntiaj teb.

•   Vim muaj cov neeg siab hlob thiab cov neeg tsim tsa tej kev cai lij choj uas tsis xam pom yav tom ntej, hav zoov nuj txeeg thiaj raug puas tsuaj, huab cua thiaj paug qias, thiab dej thiaj raug xuam pov tseg. Vim li no thiaj tsis muaj txaus rau sawv daws siv.

 Tiam sis phau Vajlugkub hais tias tseem muaj chaw vam.

 Phau Vajlugkub cog tseg tias Vajtswv yuav kho tej teeb meem no. Nws yuav kho li cas?

1.  1. Vajtswv “yuav rhuav cov neeg uas ua rau lub ntiajteb no puastsuaj kom lawv puastsuaj mus.” (Tshwmsim 11:18) Ib qho uas nws yuav ua yog tshem cov neeg lim hiam thiab cov neeg siab hlob kom thiaj tsis muaj leej twg ua rau lub ntiaj teb no puas tsuas ntxiv lawm.—2 Timautes 3:1, 2.

2.  2. “Lub tiaj suabzeb uas kub heev yuav ua pasdej.” (Yaxayas 35:1, 6, 7) Vajtswv yuav muab lub ntiaj teb qhuav nkig nkuav no kho ua ib lub vaj kaj siab zoo nkauj ntsuab xwb xiab.

3.  3. “Koj tso nag los ywg thaj av uas koj tsomkwm saib xyuas.” (Phau Ntawv Nkauj 65:9) Vajtswv yuav foom koob hmoov rau lub ntiaj teb kom muaj zaub mov nplua mias thiab muaj dej ntws nto ntshiab si rau sawv daws siv.