Zaj Kawm 9

Vajtswv Cov Tub Txib Yuav Tsum Huv

Vim li cas peb yuav tsum huv nyob txhua txhua txojkev? (1)

Nws pes tau li cas tias yuav tsum huv rau kev ntseeg? (2) ua neej? (3) huv lajlim plawv? (4) huv lub cev? (5)

Tej lus tham qias dabtsi peb yuav tsum tau zam? (6)

1. Vajtswv Yehau-vas yog ib tug huv thiab ntshiab. Nws kom cov neeg teev tiam nws nyob huv​—kev ntseeg, lub neej, lajlim plawv, thiab lub cev. (1 Petus 1:16, NW ) Yuav siv zog kawg kiag thiaj ua tau qhov huv rau ntawm Vajtswv lub qhovmuag. Peb nyob rau lub qabntuj tsis huv. Peb kuj muaj ib qho sib ntswj zog nrog peb tus kheej ib txwm nyiam ua kev phiv. Tab sis peb yuav tsum tsis txhob tso tseg.

2. Kev Ntseeg Huv Si: Yog tias peb xav tiam Yehau-vas, peb yuav tuav tsis tau ib txojkev qhia lossis kevcai ntawm txojkev ntseeg cuav. Peb yuav tsum khiav tawm ntawm kev ntseeg cuav thiab tsis txhob pab txhawb ib qho li. (2 Kaulinthaus 6:14-18; Tshwm Sim 18:4) Thaum peb kawm tau qhov tseeb txog Vajtswv lawm, peb yuav tsum ceevfaj tsam raug cov neeg qhia qhov tsis ncaj ntxias.​—2 Yauhas 10, 11.

3. Ua Neej Huv Si: Yehau-vas xav kom cov neeg teev tiam nws coj tus cwjpwm zoo li cov tseem Khetias txhua lub sijhawm.  (1 Petus 2:12) Nws pom txhua yam peb ua, txawm tias yuav zais twjywm. (Henplais 4:13) Peb yuav tsum zam txojkev nkauj nraug sib deev thiab lwm yam kev xyaum tsis huv nyob rau lub qabntuj no.​—1 Kaulinthaus 6:9-11.

4. Lajlim Plawv Huv Si: Yog peb muab tej yam huv thiab ntshiab tso nyob hauv peb lub siab, peb tej kev coj kev ua kuj huv tib yam. (Filipis 4:8) Tiamsis yog peb pheej xav rau tej yam tsis huv, thaum kawg peb yuav ua tshwm kev phem. (Mathais 15:18-20) Peb yuav tsum zam tej yam kev lom zem uas yuav paug rau peb lub siab. Peb yuav muab tau qhov huv rau lub siab yog kawm Vajtswv Lo Lus.

5. Cev Nqaij Huv Si: Vim lawv sawv nres Vajtswv, Khetias yuav tsum tu lawv lub cev thiab tej khaubncaws kom huv. Peb yuav tsum ntxuav tes tom qab siv taubplob tas, thiab peb yuav tau ntxuav tes ua ntej noj mov los yog npaj zaubmov. Yog tias koj tsis muaj qhov chaw yaug quav mus, koj yuav tau khawb av faus. (Kevcai 23:12, 13, NW ) Tu cev huv si yuav pab tau muaj kev noj qab nyob zoo. Ib tug Khetias lub tsev yuav tsum tu kom huv du lug sab hauv thiab sab nraud tibsi. Nws lub tsev yuav tsum txawv nyob rau zej zog tam ib tug qauv zoo.

6. Hais Lus Huv Si: Vajtswv cov tub txib yuav tsum hais lus tseeb tas li xwb. Cov neeg dag yuav nkag mus tsis tau rau Vajtswv lub Nceeg Vaj. (Efexaus 4:25; Tshwm Sim 21:8) Khetias yuav tsum tsis txhob siv lus phem. Lawv tsis txhob mloog lossis tso dag hais lus dev lossis piav zaj lus tsis huv. Vim rau qhov lawv tej lus huv, lawv ua neeg txawv nyob rau lajkam lossis nyob rau tsev kawm ntawv thiab nyob nruab zej zog.​—Efexaus 4:29, 31; 5:3, NW.

[Duab nyob sab 18, 19]

Vajtswv cov tub txib yuav tsum huv rau txhua yam