Tag nrho cov plig uas Yehauvas tau tsim los puavleej zoo huvsi. Tiamsis muaj ib tug tubtxib saum ntuj tig mus ua phem. Nws yog Xatas uas yog Ntxwg Nyoog. Xatas xav kom tibneeg ntiajteb pe hawm nws es tsis txhob pe hawm Yehauvas. Tej ntawd tau muaj tshwm sim li no:

Nyob hauv lub vaj Edee, muaj ntau yam txiv hmab txiv ntoo qab heev txi nrw niab. Yehauvas tau qhia rau Adas thiab nws tus pojniam Eva tias ob tug noj tau tej txiv ntawd huv tibsi. Tiamsis muaj ib tsob txiv ntoo uas Vajtswv hais tias ob tug yuav tsum tsis txhob noj. Nws hais tias yog ob tug noj cov txiv ntawm tsob ntoo ntawd, ces ob tug yeej yuav tuag.​—Chiv Keeb 2:9, 16, 17.

Muaj ib hnub thaum Eva nyob ib leeg xwb muaj ib tug nab hais lus rau nws. Tiamsis tsis yog tus nab ntawd nrog nws tham tiag. Xatas uas yog Ntxwg Nyoog ua txuj ua zoo li yog tus nab hais lus xwb. Xatas tau hais rau Eva tias yog nws noj tsob txiv uas Vajtswv txwv tsis pub noj, ces nws yuav txawj ntse ib yam li Vajtswv. Nws kuj hais rau Eva tias Eva yuav tsis tuag. Tej lus no puavleej yog lus dag xwb. Txawm li ntawd los, Eva cia li ntseeg Xatas tej lus thiab noj kiag cov txiv lawm. Tom qab ntawd, nws muab rau Adas, ces Adas kuj noj lawm thiab.​—Chiv Keeb 3:1-6.

Raws li zaj keeb kwm uas muaj tseeb no, peb kawm tau tias Xatas yog tus fav xeeb thiab yog tus uas dag. Nws hais rau Eva tias txawm yog Eva tsis mloog Vajtswv lus los, Eva yuav tsis tuag. Tej lus ntawd yog lus dag xwb. Thaum kawg, Eva thiab Adas ob tug tuag tas lawm. Xatas tsis tuag rau lub caij ntawd, tiamsis thaum kawg nws yeej yuav tuag vim nws tau ua txhaum. Niaj hnub nimno nws tseem muaj sia nyob thiab rau siab ntso dag ntxias  tibneeg kom yuam kev ntxiv. Nws tseem yog tus uas dag, thiab nws ntxias kom tibneeg hla Vajtswv tej kevcai.​—Yauhas 8:44.

Tom qab ntawd, lwm cov tubtxib saum ntuj tig mus ua phem. Cov tubtxib saum ntuj pom tias cov pojniam hauv ntiajteb zoo nkauj heev thiab lawv xav deev cov pojniam ntawd. Yog li ntawd lawv thiaj nqes los rau hauv ntiajteb thiab txia ua txivneej. Ces lawv txawm mus yuav cov pojniam ntawd. Qhov uas lawv ua li no tsis raws li Vajtswv lub ntsiab lawm.​—Chiv Keeb 6:1, 2; Yuda 6.

Tej no kuj ua teeb meem ntau heev rau noob neej. Cov pojniam uas yuav cov tubtxib ntawd yug tau menyuam, tiamsis lawv cov menyuam txawv heev. Thaum cov menyuam ntawd hlob tuaj lawv loj siab heev, lawv ua nruj ua tsiv thiab ua limhiam kawg li. Thaum kawg lub ntiajteb thiaj puv ntia tej kev ua nruj ua tsiv. Yehauvas thiaj li txiav txim siab tso dej los nyab kom rhuav tshem cov neeg limhiam ntawd. Cov tibneeg uas dim Dej Nyab tsuas yog Nau-a, tus uas yog neeg ncaj ncees, thiab nws tsev neeg xwb.​—Chiv Keeb 6:4, 11; 7:23.

Cov tubtxib limhiam ntawd tsis tuag; lawv rov qab mus ua lub cev plig li qub. Tiamsis Vajtswv yeej rau txim rau lawv. Vajtswv tsis pub lawv koom nrog nws cuab tubtxib saum ntuj uas ncaj ncees nyob ua ke lawm. Tsis tas li ntawd xwb, Yehauvas tsis pub kom lawv hloov cev ua tibneeg ntxiv lawm. Thiab thaum kawg lawv yuav tuag rau hnub uas txiav txim loj kawg nkaus.​—2 Petus 2:4; Yuda 6.

Thaum xyoo 1914 tau muaj kev tsov kev rog saum ntuj ceeb tsheej. Phau ntawv Qhia Tshwm hauv phau Vajlugkub tau piav tias: “Ces txawm ua rog saum ntuj, Mikha-ee [uas yog Yexus Khetos lub npe thaum nws sawv hauv qhov tuag rov los] thiab nws cov tubtxib saum ntuj [uas zoo] ua rog rau tus zaj [Xatas] ntawd, mas tus zaj thiab nws cov tubtxib saum ntuj [uas phem] kuj tawm tsam, tiamsis tus zaj tog swb lawm thiab tsis muaj chaw nyob saum ntuj dua li lawm. Tus niag zaj yog tus nab txwj nab laug thaum ub uas hu tias Ntxwg Nyoog thiab Xatas, yog tus uas dag ntxias neeg thoob ntiajteb. Nws raug muab pov los rau hauv lub ntiajteb, thiab nws cov tubtxib saum ntuj [uas phem] kuj raug muab pov nrog nws ua ke los thiab.”

Thaum kawg zoo li cas? Cov nqe Vajlugkub qhia ntxiv tias: “Vim li no, lub ntuj ceeb tsheej thiab sawvdaws uas nyob hauv’e, cia li zoo siab xyiv fab.” Cov tubtxib saum ntuj uas zoo muaj kev xyiv fab heev vim tias Xatas thiab nws cov tubtxib phem, lossis cov plig phem, tsis tau nyob saum ntuj ceeb tsheej lawm. Tiamsis yuav ua li cas rau cov tibneeg hauv ntiajteb? Phau Vajlugkub hais tias: “Tiamsis lub ntiajteb thiab dej hiavtxwv’e, nej yuav raug txom nyem vim Ntxwg Nyoog twb nqes los rau hauv nej ua npau taws vog, rau qhov nws paub tias nws lub sijhawm tshuav tsis ntev lawm.”​—Qhia Tshwm 12:7-9, 12.

Yog, Xatas thiab nws cov tubtxib limhiam tau coj tibneeg yuam kev thiab ua rau tibneeg raug kev txom nyem loj heev rau hauv ntiajteb. Cov tubtxib limhiam ntawd raug muab hu ua cov dab. Lawv yog Vajtswv cov yeeb ncuab. Lawv puavleej phem tas tus.