Tau ntau xyoo Yehauvas nrhiav kev los pab cov neeg Yuda tiamsis lawv tas zog mus teev tiam tej vajtswv cuav xwb. Nws thiaj txib cov cev lus mus ceeb toom lawv, tiamsis lawv tsis mloog li. Lawv tseem luag thuam cov cev Vajtswv lus thiab. Yog li ntawd, Yehauvas yuav rhuav tshem lawv li cas?

Npanpiloo tus vajntxwv Nenpukhanexa tuaj ntaus yeej ntau lub tebchaws. Thawj zaug uas nws ntaus yeej Yeluxalees, nws ntes tau Vajntxwv Yehauyakhee, cov thawj, tej tub rog, thiab cov uas txawj ua txhua yam haujlwm mus rau hauv Npanpiloo lawm. Nenpukhanexa kuj coj tag nrho tej nyiaj txiag tej kub huvsi hauv Yehauvas lub tuam tsev mus lawm thiab. Ces Nenpukhanexa tsa Xedekhiya ua cov Yuda tus vajntxwv.

Thaum xub thawj, Xedekhiya kuj mloog Nenpukhanexa lus. Tiamsis tej tebchaws uas nyob ze thiab cov cev lus cuav hais kom Xedekhiya fav xeeb rau Npanpiloo. Yelemi ceeb toom rau nws tias: ‘Yog koj fav xeeb, yuav muaj kev tshaib nqhis, kab mob kis, thiab coob tus yuav tuag hauv tebchaws Yuda.’

Thaum Xedekhiya kav tau 8 xyoo lawm, nws sawv tawm tsam Npanpiloo. Xedekhiya thiaj hais kom cov tub rog Iyi tuaj pab nws. Nenpukhanexa txawm txhij tub rog mus tsuam chaw ib ncig Yeluxalees. Yelemi hais rau Xedekhiya tias: ‘Yehauvas hais tias yog koj zwm rau Npanpiloo, koj thiab lub nroog no yuav dim. Tiamsis yog koj tsis zwm, lawv yuav muab Yeluxalees hlawv thiab ntes koj mus kaw.’ Xedekhiya hais tias: ‘Kuv tsis zwm!’

 Ib xyoos thiab 6 lub hlis tom qab ntawd, Npanpiloo cov tub rog mam txeem tau rau hauv lub nroog Yeluxalees thiab muab hlawv pov tseg. Lawv hlawv lub tuam tsev, tua ntau leej tuag, thiab coj txhiab txhiab leej mus ua qhev.

Xedekhiya txawm khiav tawm hauv Yeluxalees mus tiamsis cov Npanpiloo caum qab mus ntes tau nws ze lub moos Yelikhau thiab coj nws los cuag Nenpukhanexa. Vajntxwv Nenpukhanexa txawm muab Xedekhiya cov tub tua tab meeg Xedekhiya ntsia. Tom qab ntawd, Nenpukhanexa muab Xedekhiya qhov muag kaus pov tseg thiab muab Xedekhiya kaw mus txog thaum nws tuag lawm. Tiamsis Yehauvas cog lus rau cov neeg Yuda tias: ‘Tom qab 70 lub xyoos, kuv yuav coj nej rov qab los nyob hauv Yeluxalees dua.’

Ua li cas rau cov hluas uas raug ntes coj mus rau Npanpiloo? Lawv puas yuav muaj lub siab npuab Yehauvas?