Yehausafa yog cov Yuda tus vajntxwv. Nws muab tus dab Npa-as tej thaj thiab tej dab mlom hauv lub tebchaws rhuav tshem tibsi. Nws xav kom cov pejxeem paub Yehauvas tej kevcai. Nws thiaj txib cov thawj thiab cov Levi mus qhia kevcai rau cov neeg Yuda.

Tej tebchaws uas nyob ib ncig tsis kav tuaj tawm tsam cov Yuda vim lawv paub tias Yehauvas nrog nraim cov Yuda. Lawv thiaj xa khoom tuaj pub rau Vajntxwv Yehausafa. Tiamsis cov Mau-a, cov Asmoo, thiab cov uas nyob ntawm lub Roob Xe-i xav tuaj ua rog rau cov Yuda. Yehausafa paub tias yuav tsum muaj Yehauvas pab nws xwb. Nws thiaj hais kom tej pojniam menyuam thiab cov txivneej tuaj sib sau ua ke hauv Yeluxalees. Yehausafa thiaj thov Vajtswv tias: ‘Yehauvas, yog tsis muaj koj pab ces peb yuav ntaus tsis yeej li. Peb tos ntsoov koj pab peb xwb.’

Yehauvas teb tias: ‘Tsis txhob ntshai. Kuv yuav pab nej. Cia li npaj txhij mus rau ntawm lub tshav rog, sawv twjywm, thiab ntsia seb kuv yuav cawm nej li cas.’ Yehauvas cawm lawv li cas?

Hnub tom qab thaum sawv ntxov, Yehausafa xaiv ib co neeg hu nkauj mus ua ntej pab tub rog. Lawv thiaj taug kev tawm hauv Yeluxalees mus rau lub tshav rog ntawm qhov chaw hu ua Thekhau-a.

Thaum cov uas hu nkauj tseem tabtom hu nrov nrov, Yehauvas twb ua ntej hlo mus pab lawv lawm. Nws ua rau cov Asmoo thiab cov Mau-a rov sib tua tuag tas. Yehauvas nrog nraim cov Yuda, lawv pab tub rog, thiab lawv cov pov thawj. Tej tebchaws uas nyob ib ncig kuj hnov txog tej uas Yehauvas tau ua thiab lawv paub tias Yehauvas yeej tiv thaiv Nws cov tibneeg tiag. Yog li ntawd, Yehauvas cawm nws cov tibneeg li cas? Nws siv ntau txojkev los pab lawv. Nws yeej muaj hwjchim tiv thaiv tau nws cov tibneeg tsis tas tibneeg pab tej cuab yeej li.