Vajtswv Yehauvas a yog tus muab thawj tug pojniam thiab txivneej txis ua txij nkawm. Phau Vajlugkub qhia tias thaum Vajtswv coj tus pojniam los rau tus txiv, Adas zoo siab tshaj plaws li nws thiaj hais tias: “No lauj, tej txha no tawm hauv kuv txha los, tej nqaij no tawm hauv kuv nqaij los.” (Chiv Keeb 2:22, 23) Niaj hnub no, Yehauvas xav kom cov txij nkawm muaj kev zoo siab li ntawd thiab.

Thaum neb nyuam qhuav sib yuav tau, tej zaum koj yuav xav tias neb yuav hais lus sib haum tas mus li. Tiamsis, txawm yog ob niam txiv sib hlub npaum li cas los, nkawd yeej yuav ntsib qho ntsis teeb meem thiab. (1 Khaulee 7:28) Phau ntawv no muaj tej hauv paus ntsiab lus hauv phau Vajlugkub uas yuav pab tau koj txojkev txij nkawm thiab koj tsev neeg tibsi. Yog tias nej coj raws li cov nqe no, nej yuav muaj kev zoo siab.​—Ntawv Nkauj 19:8-11.

PHAU VAJLUGKUB QHIA TIAS: “Tus txiv yog tus pojniam lub taubhau.”​—Efexau 5:23.

Yehauvas xav kom nej cov txiv, hlub tshua nej tus pojniam. (1 Petus 3:7) Vajtswv tsim tus pojniam los pab los phim koj, xwv koj thiaj ua tiav koj tes haujlwm. Vajtswv xav kom koj hlub thiab saib taus nws. (Chiv Keeb 2:18) Yog tias koj hlub koj tus pojniam tiag tiag, koj yuav xam pom nws ua ntej koj tus kheej.​—Efexau 5:25-29.

Yehauvas xav kom nej cov ua niam, hwm nej tus txiv thiab txhawb kom nws ua tau lub taubhau. (1 Khaulee 11:3; Efexau 5:33) Thaum koj tus txiv txiav txim siab ua ib yam dabtsi twg, koj yuav tsum koom tes txhawb nws tiag tiag. (Khaulauxi 3:18) Yog tias koj ua li no, Yehauvas thiab koj tus txiv yuav saib koj rau nqe heev.​—1 Petus 3:1-6.

XYAUM UA LI NO:

• Zoo rau koj nug koj tus txij nkawm seb yuav ua li cas koj thiaj coj tau haum nws. Thaum nws qhia rau koj, ua tib zoo mloog thiab nrhiav kev los yoog nws

• Ua siab ntev rau qhov yuav ntev loo neb ib leeg mam li yoog tau ib leeg

PHAU VAJLUGKUB QHIA TIAS: Koj yuav tsum xam pom koj tus txij nkawm ua ntej. (Filipi 2:3, 4) Saib koj tus txij nkawm rau nqe thiab nco ntsoov tias Vajtswv xav kom nws cov tub qhe “muaj lub siab hlub txhua tus.” (2 Timaute 2:24) Tseem ceeb rau koj ua tib zoo xaiv tej lus uas koj hais. Phau Vajlugkub hais tias: “Tus neeg ncauj sai tej lus mas zoo yam nkaus li rab ntaj chob, tiamsis tus neeg ntse tus nplaig yog tshuaj kho zoo.” (Paj Lug 12:18) Yehauvas lub hwj huam yuav pab kom koj muaj tswvyim, txawj hais lus mos lus muag, thiab ua tau txhua yam haujlwm zoo.​—Khaulauxi 4:6; Yakaunpau 3:17.

XYAUM UA LI NO:

• Ua ntej koj yuav nrog koj tus txij nkawm tham txog ib yam tseem ceeb twg, thov Vajtswv pab koj ua lub siab tus yees, thiab kom koj tsis txhob yuav koj lub tswvyim xwb

• Npaj ua ntej seb koj yuav tham txog dabtsi thiab ua tib zoo xaiv koj cov lus

PHAU VAJLUGKUB QHIA TIAS: Thaum koj muaj txij nkawm, koj thiab koj tus txij nkawm “koom ua ib lub cev” lawm. (Mathai 19:5) Txawm li ntawd los, yuav tsis yoojyim rau qhov neb nyias muaj nyias ib txojkev xav thiab nyias muaj nyias tswvyim. Yog li ntawd, ib leeg yuav tau yoog ib leeg, neb thiaj koom tau ib lub siab thiab mus tau ua ke. (Filipi 2:2) Txhua yam uas neb ua, neb yuav tsum koom siab thiaj txiav txim tau zoo. Phau Vajlugkub qhia tias tej ‘haujlwm yuav tsum yog sablaj thiaj tiav.’ (Paj Lug 20:18) Ua ntej neb yuav txiav txim siab ua ib yam tseem ceeb twg, neb yuav tsum ntsuas seb neb puas txiav txim raws li phau Vajlugkub tej hauv paus ntsiab lus.​—Paj Lug 8:32, 33.

XYAUM UA LI NO:

• Txawm koj zoo siab nyuaj siab li cas los, qhia rau koj tus txij nkawm paub

• Ua ntej koj txiav txim siab ua ib yam tseem ceeb twg, nrog koj tus txij nkawm sablaj tso