Ua suab nrov suab yau. Thaum koj qhia txog ib lub ntsiab tseem ceeb uas koj xav kom luag khaws tau, ua suab kom nrov thiab tham kom muaj ceem zog. Thaum koj nyeem tej lus txiav txim hauv phau Vajlugkub, zoo rau koj ua suab nrov zog kom phim thiab. Yog koj tham txog tej yam uas txaus ntshai ces hais lub suab yau zog. Yog phim hais lus ntxhi los tau thiab. Ua li no thiaj raug sawvdaws siab.

Hloov suab. Thaum peb zoo siab peb lub suab yeej txawv hlo thaum peb nyuaj siab. Yog li ntawd, thaum koj tham txog tej yam uas tu tu siab ces ua lub suab ntshaus ntsho. Thaum koj tham txog tej yam zoo zoo siab ces ua lub suab luag ntxhi. Thaum koj tham txog tej yam nyob deb deb lossis muaj ntev ntev los lawm ces zoo ua lub suab nqee. Thaum koj nplig lwm tus lossis hais txog tej yam kho kho siab los kuj phim seev suab thiab.

Hais nrawm hais qeeb. Tej lub sijhawm yog koj ua siab kub lug tham nrawm nroos ces cov uas kawm yuav hajyam muaj siab mloog. Tiamsis thaum koj qhia txog tej lub ntsiab tseem ceeb ces hais ib nyuag qeeb zog lawv thiaj khaws tau.