1, 2. Vajtswv tau pub peb muaj peevxwm ua dabtsi, thiab vim li cas qhov ntawd ho tseem ceeb rau peb niaj hnub no?

VAJTSWV tau tsim kom tibneeg muaj tswvyim thiab muaj tus yam ntxwv zoo li nws. (Chiv Keeb 1:27) Vim Vajtswv pub lub peevxwm no rau noob neej, peb thiaj paub ntsuam xyuas seb peb yuav muab phau Vajlugkub tej hauv paus ntsiab lus coj los siv li cas hauv peb lub neej. Qhov no yuav pab kom peb loj hlob ntawm sab kev ntseeg. Peb yuav hajyam muaj kev hlub rau Yehauvas thiab “txawj cais tias yam twg zoo yam twg phem.”​—Henplais 5:14.

² Niaj hnub no, peb yuav tsum hajyam paub ntsuam xyuas phau Vajlugkub tej hauv paus ntsiab lus, vim tsis muaj kevcai txhua fab los pab peb. Muaj ntau tsav ntau yam los raug peb; xws li thaum peb raug mob, puas zoo rau peb txais tej kev kho mob uas yuav siv ntshav? Yog tias peb xav ua raws li Yehauvas lub siab nyiam, peb yuav tsum paub txiav txim zoo txog qhov no. Yog tias peb paub coj raws li phau Vajlugkub tej hauv paus ntsiab lus, ces peb lub siab yuav tsis nkaug peb, thiab peb yuav nyob ruaj hauv Vajtswv txojkev hlub. (Paj Lug 2:6-11) Cia peb kawm txog cov hauv paus ntsiab lus uas qhia txog qhov no.

3, 4. Piav txog thawj zaug uas Yehauvas qhia tias ntshav dawb huv, thiab tej hauv paus ntsiab lus twg qhia tias ntshav dawb huv tiag?

³ Thawj thawj zaug uas peb kawm tias ntshav dawb huv, yog tom qab Khayee tua Anpee tuag lawm. Yehauvas hais rau Khayee tias: “Koj tus kwv cov ntshav quaj qw hauv cov av tuaj txog kuv lawm.” (Chiv Keeb 4:10) Yehauvas hais li ntawd vim Nws suav tias Anpee cov ntshav piv txog Anpee txojsia ntag. Qhov uas Anpee cov ntshav quaj qw rau Yehauvas piv txwv tias, Khayee yuav tau ris lub txim ntawd vim nws ua rau Anpee nqaij ntuag ntshav nrog.​—Henplais 12:24.

⁴ Tom qab Dej Dag Nyab ntiajteb, Vajtswv kuj hais rau Nau-a tias: “Tsis txhob noj cov nqaij nrog cov ntshav uas yog nws txojsia. Cov ntshav uas yog nej txojsia kuv yuav tsob.” (Chiv Keeb 9:4, 5) Yog li, Vajtswv tso cai rau neeg noj nqaij tiamsis nws txwv tsis pub lawv noj ntshav. Raws li lub hauv paus ntsiab lus no, ntshav piv txog txojsia ntag, ib yam li Vajtswv tau hais rau Khayee. Cov lus no kuj qhia meej tias Yehauvas yog Tus Pub txojsia rau txhua tsav txhua yam. Nws yuav suav txim rau cov uas saib txojsia thiab ntshav tsis rau nqe. Niaj hnub no, peb txhua tus yuav tsum coj raws li tej lus nkaw no thiab.​—Ntawv Nkauj 36:9.

5, 6. Mauxe Txoj Kevcai qhia tias ntshav dawb huv thiab muaj nqes li cas? (Nyeem lub ntsiab me “ Saib Tsiaj Txhu Muaj Nqes.”)

⁵ Mauxe Txoj Kevcai kuj qhia raws li ob lub hauv paus ntsiab lus saum no thiab, rau qhov Levi Tej Kevcai 17:10, 11 qhia tias: “Cov Yixayee lossis lwm haiv neeg . . . leejtwg noj ntshav, kuv yuav tsom ntsoov tawm tsam tus uas noj ntshav ntawd thiab muab nws txiav tawm hauv nws haiv neeg mus. Rau qhov txhua yam uas ciaj sia txojsia yog nyob hauv cov  ntshav. Kuv pub cov ntshav rau nej siv saum lub thaj ua kevcai ntxuav nej tus kheej kev txhaum, rau qhov cov ntshav yog yam uas ntxuav tau kev txhaum vim ntshav yog txojsia.” *​—Nyeem lub ntsiab me “ Ntshav Ntxuav Tau Kev Txhaum.”

⁶ Cov Yixayee tsuas siv ntshav tsiaj los ua kevcai xyeem xwb. Dua li ntawd, lawv yuav tsum muab nchuav pov tseg. Qhov no piv txwv tias lawv muab txojsia cob rov qab rau Vajtswv, rau qhov nws yog Tus Pub txojsia. (Kevcai 12:16; Exekhee 18:4) Thiab raws li Mauxe Txoj Kevcai, thaum cov Yixayee tua tsiaj noj, tsis tas lawv yuav txhawj tias yuav tsum tso txhua ncos ntshav tawm hauv tus tsiaj mus. Yog tias lawv tua tsiaj thiab tso ntshav raws li Yehauvas pom zoo, yuav qhia tias lawv saib taus Vajtswv. Ces tsis txhaum rau lawv noj cov nqaij.

7. Davi saib ntshav muaj nqes li cas?

⁷ Davi yog ib tug neeg uas “ua txhua yam raws li [Vajtswv] lub siab xav.” (Tubtxib Tes Haujlwm 13:22) Davi yeej nkag siab Vajtswv tej hauv paus ntsiab lus ntsig txog ntshav. Muaj ib zaug thaum Davi nqhis dej heev, nws peb tug tub rog txeem dhau plaws yeeb ncuab lub yeej, mus ntaus dej los rau Davi haus. Davi xav li cas xwb? Nws hais li no: “Kuv yuav haus cov neeg uas sev nyog txojsia mus ntawd cov ntshav lov?” Yog li, txawm tias nws nqhis dej heev los, nws tsis haus tiamsis nws muab “hliv xyeem rau [Yehauvas].”​—2 Xamuyee 23:15-17.

8, 9. Thaum Vajtswv tsa lub koom txoos Khixatia, Vajtswv puas hloov nws txoj kevcai txog txojsia thiab ntshav? Piav seb.

 ⁸ Raws li peb tau kawm, Yehauvas txwv tsis pub Nau-a noj ntshav. Ces 900 xyoo tom qab ntawd, Mauxe Txoj Kevcai rov hais dua kom txhob noj ntshav. Ces 1,500 xyoo tom qab Mauxe Txoj Kevcai, los Yehauvas tseem tshoov kom pab uas ntaus thawj ntawm lub koom txoos Khixatia, sau li no: “[Lub hwj huam dawb huv] thiab peb pom zoo tsis txhob muab lub nra hnyav rau nej ris tsuas yog tej yam uas cheem tsum xwb, yog tseg tsis txhob noj tej uas xyeem rau dab mlom, tsis txhob noj ntshav, tsis txhob noj tej tsiaj uas zawm caj dab tuag thiab tsis txhob ua nkauj ua nraug.” (Tubtxib Tes Haujlwm 15:28, 29) Nqe no hais tias “txhob noj ntshav,” tiamsis muaj dua lwm phau Vajlugkub muab nqe ntawd txhais tias: “Caiv ntshav.”​—Hauj Lwm [Tubtxib Tes Haujlwm] 15:29, NN.

⁹ Raws li nqe no, pab uas ntaus thawj thaum ub, yeej nkag siab tias ntshav yog yam dawb huv; yog tias siv tsis raws kevcai, ces yeej txhaum loj npaum nkaus li kev teev dab teev mlom thiab kev ua nkauj ua nraug ntag. Niaj hnub no cov tseem Khixatia yuav tsum saib ntshav muaj nqes li ntawd thiab. Yuav muaj tej lub sijhawm uas lawv yuav tsum tau txiav txim siab txog txojkev siv ntshav. Yog tias lawv coj raws li phau Vajlugkub tej hauv paus ntsiab lus, ces lawv yuav txiav txim tau zoo raws li Yehauvas lub siab nyiam.

10, 11. (1) Yehauvas Cov Timkhawv puas ntxiv ntshav rau lawv lub cev? Lawv puas kam muab plaub feem ntshav loj, ib qho los txhab rau lawv lub cev? (2) Cov Khixatia nyias yuav tsum txiav txim nyias txog tej kev kho mob twg?

¹⁰ Yehauvas Cov Timkhawv “caiv ntshav” li cas?  Lawv tsis kam ntxiv ntshav rau lawv lub cev. Lawv tsis kam muab lawv cov ntshav khaws cia ua ntej, es lwm lub caij mam li rov muab tso rau lawv lub cev. Thiab lawv tsis kam muab lawv cov ntshav mus txhab rau lwm tus. Pom tias ntshav muaj plaub feem loj, uas yog ntshav liab (red cells), ntshav dawb (white cells), ntshav cam (platelets) thiab ntshav dej (plasma). Yehauvas Cov Timkhawv yeej tsis kam txais plaub feem loj no thiab, vim lawv tsis xav hla Vajtswv txoj kevcai.

¹¹ Niaj hnub no, tibneeg muaj peevxwm muab plaub feem ntshav loj ntawd faib ua tej feem me tshaj ntawd los ua tshuaj thiab. Puas zoo rau ib tug Khixatia txais tej feem me me ntawd? Nws puas suav tias tej feem me ntawd tseem yog “ntshav”? Nyias yuav tau txiav txim rau nyias tus kheej txog qhov no. Kuj muaj lwm txojkev kho mob los txuag kom ntshav txhob sem; xws li, txojkev lim ntshav (hemodialysis), txojkev muab dej tov ntshav (hemodilution), lossis siv lub tshuab nqus ntshav rov los rau hauv lub cev (cell salvage). Cov kev kho mob no tsis yog siv luag lwm tus cov ntshav, thiab kuj tsis yog siv yus cov ntshav uas twb muab khaws tseg cia ua ntej lawd. Nyias yuav tsum tau txiav txim nyias txog cov kev kho mob no.​—Mus nyeem zaj hu ua “Tej Feem Ntshav Thiab Kev Phais Mob” hauv Cov Lus Qhia Ntxiv.

12. Peb yuav tsum txiav txim siab rau peb tus kheej li cas?

¹² Zoo li tau hais no, muaj tej yam uas peb yuav tau txiav txim rau peb tus kheej. Yehauvas xav paub seb peb xav li cas hauv nruab siab tiag. (Nyeem Paj Lug 17:3; 24:12.) Yog li, ua ntej koj xaiv ib txojkev kho mob twg, koj yuav tsum thov Yehauvas; thiab ua tib  zoo tshawb nrhiav yam ntawd. Tom qab ntawd, txiav txim raws li koj lub siab tso cai, thiab raws li phau Vajlugkub tej hauv paus ntsiab lus. (Loos 14:2, 22, 23) Lwm tus tsis muaj cai yuam kom koj coj li lawv lub siab xav. Thiab txhob nug lwm tus tias: “Yog koj ne, koj ho yuav txiav txim siab li cas?” Nco ntsoov tias, ntsig txog tej kev kho mob zoo li no, cov Khixatia  nyias yuav tsum tau “ris nyias lub nra.” *​—Kalatia 6:5; Loos 14:12; nyeem lub ntsiab me “ Kuv Puas Suav Tias Ntshav Dawb Huv?”

13. Yehauvas tej kevcai thiab tej hauv paus ntsiab lus ua pov thawj li cas txog nws? Piav seb.

¹³ Yehauvas tej kevcai thiab tej hauv paus ntsiab lus ua pov thawj tias nws yog tus muaj tswvyim tsa kevcai lij choj rau peb coj, thiab nws yog ib Leej Txiv uas mob siab nws cov menyuam heev. (Ntawv Nkauj 19:7-11) Yehauvas txoj kevcai kom peb “caiv ntshav,” tsis yog tsa los tiv thaiv kev mob nkeeg, tiamsis yeej pab tau peb rau seem ntawd thiab. Peb yuav zam tau tej kev mob kev nkeeg uas los ntawm txojkev ntxiv ntshav. (Hauj Lwm [Tubtxib Tes Haujlwm] 15:20, NN) Niaj hnub no tej kws kho mob pom tias, txojkev phais mob uas tsis ntxiv ntshav, yog txoj uas zoo tshaj. Tej uas lawv tshawb nrhiav no, ua pov thawj tias Yehauvas yeej yog tus muaj tswvyim thiab muaj kev hlub tiag.​—Nyeem Yaxaya 55:9; Yauhas 14:21, 23.

14, 15. (1) Vim Vajtswv hlub nws cov tibneeg, nws muab tej kevcai twg rau lawv coj? (2) Cov hauv paus ntsiab lus ntawm tej kevcai no pab tau koj li cas?

¹⁴ Tej kevcai uas Vajtswv muab rau cov Yixayee thaum ub, ua pov thawj tias Vajtswv yeej hlub lawv tiag. Xws li, Vajtswv hais kom cov Yixayee xov puag ncig txheej tsev sab saud, neeg thiaj tsis poob, vim lawv kheev nyob saum ru tsev. (Kevcai 22:8; 1 Xamuyee 9:25, 26; Nehemi 8:16; Tubtxib Tes Haujlwm 10:9) Vajtswv kuj tsa kevcai kom saib xyuas lawv tej nyuj, tsam nrau tibneeg raug mob. (Khiav Dim 21:28, 29)  Cov neeg uas tsis quav ntsej tej kevcai no, ua saib tsis taus lwm tus txojsia thiab lawv yuav tau ris lwm tus cov ntshav.

¹⁵ Niaj hnub no, cov hauv paus ntsiab lus ntawm tej kevcai no tseem pab tau peb. Xav txog cov lus nug no: Koj puas kho koj lub tsheb kom zoo? Koj puas ua tib zoo tsav tsheb? Koj puas kho koj lub tsev thiab koj qhov chaw haujlwm kom zoo? Yog koj yug tsiaj, koj puas saib xyuas cov tsiaj ntawd? Thiab koj koom nrog tej kev lomzem ua si zoo li cas? Nyob rau tej lub tebchaws, vim cov hluas tsis xyuam xim thiab pheej phov siav ua li ub li no, ua rau cov hluas raug kev ploj tuag heev tshaj. Tiamsis cov hluas uas xav nyob ruaj hauv Vajtswv txojkev hlub yeej saib lawv txojsia muaj nqes. Lawv tsis lam phov siav mus koom  nrog tej kev lomzem ua si uas yuav ua rau lawv raug kev piam sij. Lawv tsis xav yuam kev tias lawv lub zog yuav tsis txawj tas. Tiamsis lawv zoo siab rau lawv lub neej hluas, thiab zam tej yam uas yuav txo lawv txojsia.​—Laj Lim Tswvyim 11:9, 10.

16. Lub hauv paus ntsiab lus twg txwv txojkev rho menyuam? (Saib cov lus hauv qab taw qhia.)

¹⁶ Tus menyuam nruab thiab txojsia kuj muaj nqes heev rau Yehauvas thiab. Cov Yixayee thaum ub, yog leejtwg ua rau ib tug pojniam nchuav menyuam, txawm tus pojniam tsis tuag los tus neeg ntawd yuav tsum raug nplua “siav pauj siav.” * (Khiav Dim 21:22, 23, NW) Niaj hnub no muaj tsheej vam tus pojniam txhob txwm muab menyuam rho pov tseg kom lawv txhob tau tu menyuam. Thiab ntau zaus, twb yog lawv coj lub neej ua plees ua yi lossis lawv tseem ntshaw ua nkauj ua nraug, lawv thiaj rho menyuam. Thaum Yehauvas pom tej no, yeej mob nws siab kawg li.

17. Peb yuav nplig ib tug pojniam uas twb rho menyuam ua ntej nws los paub qhov tseeb li cas?

¹⁷ Ua li Vajtswv puas yuav zam txim rau tus pojniam uas twb rho menyuam ua ntej nws los paub qhov tseeb? Yog tias nws ntxeev dua siab tshiab lawm tiag, ces Vajtswv yeej yuav zam txim rau nws vim Yexus cov ntshav ntxuav tau kev txhaum. (Ntawv Nkauj 103:8-14; Efexau 1:7) Khetos tus kheej kiag tau hais tias: “Kuv tsis yog los hu cov neeg ncaj ncees, tiamsis yog los hu cov  neeg muaj txim kom ntxeev dua siab tshiab.”​—Luka 5:32.

18. Raws li phau Vajlugkub qhia, kev sib ntaus sib tua pib qhovtwg tuaj?

¹⁸ Yog tias peb saib taus txojsia, puas yog peb tsis ua rau lwm tus raug mob raug nkeeg xwb? Tsis yog. Tus tubtxib Yauhas hais tias: “Txhua tus uas ntxub nws tus kwvtij kuj yog tus uas tua neeg.” (1 Yauhas 3:15) Yog li, Yehauvas tsis xav kom peb muaj ib nplooj siab ntxub ntxaug peb cov kwvtij nkauj muam. Thaum ib tug twg ntxub nws tus kwvtij lawd, tsis yog nws lam tsis nyiam tus kwvtij ntawd xwb, tiamsis nws yeej xav kom tus kwvtij ntawd txojsia tu. Tej zaum ntev mus ntev tuaj nws yuav ua timkhawv dag txog tus kwvtij ntawd. Nws yuav iab hiam tias tus kwvtij ntawd ua txhaum loj li ub li no, tsim nyog Vajtswv teem txim hnyav rau nws. (Levi Tej Kevcai 19:16; Kevcai 19:18-21; Mathai 5:22) Yog tias peb muaj ib nplooj siab uas ntxub ntxaug peb tus kwvtij, tseem ceeb heev rau peb kho peb lub siab tamsim no!​—Yakaunpau 1:14, 15; 4:1-3.

19. Tus neeg uas coj li phau Vajlugkub tej hauv paus ntsiab lus yuav xav li cas txog Ntawv Nkauj 11:5 thiab Filipi 4:8, 9?

¹⁹ Yog tias peb saib txojsia muaj nqes ib yam li Vajtswv saib, thiab xav nyob hauv Vajtswv txojkev hlub, ces peb yuav tsum zam txhua yam kev sib ntaus sib tua. Ntawv Nkauj 11:5 qhia tias: “[Yehauvas] lub siab ntxub cov uas nyiam ua limhiam.” Nqe no tsis yog qhia tias Yehauvas nyiam li cas xwb, tiamsis nqe no kuj cob kom peb paub ua peb lub neej; thiab txhawb kom cov uas hlub Vajtswv zam tej kev lomzem uas txw kom neeg ua nruj ua tsiv. Phau Vajlugkub kuj qhia tias Vajtswv yog tus “uas pub txojkev siab tus.”  Yog li ntawd, tsim nyog peb xav txog tej yam ntxim hlub, tej yam zoo kawg nkaus, thiab tej yam uas tsim nyog qhuas. Tej ntawd yuav pab kom peb muaj lub siab tus.​—Nyeem Filipi 4:8, 9.

20-22. Cov Khixatia puas koom nrog lub qab ntuj thiab yog vim li cas?

²⁰ Vajtswv suav tias Xatas lub qab ntuj yuav tau ris neeg tej ntshav. Tej kev nom kev tswv tau muab Vajtswv cov tub qhe thiab tsheej plhom leej tua pov tseg. Phau Vajlugkub thiaj muab tej kev nom kev tswv piv rau tej tsiaj uas nyaum heev. (Daniyee 8:3, 4, 20-22; Qhia Tshwm 13:1, 2, 7, 8) Tej tub lag tub luam thiab tej tub txawg tub ntse, tau koom tes nrog tej nom tswv tsim riam phom, hoob pob mos txwv uas muaj zog heev tsis tau pom dua li. Lawv muab tej riam phom ntawd muag tau nyiaj ntau kawg li. Yog li yeej muaj tseeb raws li nqe Vajlugkub no hais: “Lub ntiajteb huvsi nyob hauv tus uas Phem qab hwjchim”!​—1 Yauhas 5:19.

²¹ Yexus cov thwjtim tsis nrog tej nom tswv ris neeg tej ntshav, rau qhov lawv “tsis yog ntiajteb li.” Lawv yeej tsis koom nrog tej kev nom kev tswv thiab kev tsov kev rog hauv lub qab ntuj no kiag li. * (Yauhas 15:19; 17:16) Thaum lawv raug tsim txom, lawv tsis ua phem pauj phem vim lawv xyaum coj li Yexus Khetos. Lawv tseem hlub thiab thov Vajtswv rau lawv cov yeeb ncuab.​—Mathai 5:44; Loos 12:17-21.

²² Cov tseem Khixatia yuav tsum hajyam khiav deb ntawm lub “tuam ceeb Npanpiloo.” Lub tuam ceeb ntawd piv txog kev ntseeg cuav, thiab yog lub koom haum uas tua tibneeg coob tshaj plaws li. Vajtswv Txojlus qhia tias hauv lub nroog Npanpiloo ntawd, “luag pom cov xibhwb cev Vajtswv lus thiab cov xov dawb [lossis cov dawb huv] thiab txhua tus uas raug tua hauv lub ntiajteb tej ntshav.” Yog li ntawd, phau  Vajlugkub thiaj ceeb toom tias: “Kuv haiv neeg, cia li tawm hauv lub nroog ntawd.”​—Qhia Tshwm 17:6; 18:2, 4, 24.

23. Peb yuav tawm hauv lub nroog Npanpiloo mus li cas?

²³ Peb yuav tawm hauv lub nroog Npanpiloo mus li cas? Tsis yog peb yuav rho npe tawm tsis ua tswv cuab rau kev ntseeg cuav lawm xwb; tiamsis peb yuav tsum ntxub tej yam uas kev ntseeg cuav qhia thiab ua. Rau qhov lawv pom zoo rau kev nkauj kev nraug, kev nom kev tswv, thiab kev siab hlob huas ntshis nyiaj txiag. (Nyeem Ntawv Nkauj 97:10; Qhia Tshwm 18:7, 9, 11-17) Twb yog tej kev ntseeg cuav coj li no, thaum kawg thiaj muaj kev sib ntaus sib tua ntag!

24, 25. (1) Vim li cas Vajtswv thiaj zam tau tus uas ris luag tej ntshav? (2) Yav thaum ub, Vajtswv tau npaj txojkev twg los pab tus ua raug lwm tus tuag?

²⁴ Peb txhua leej txhua tus kuj ris neeg cov ntshav thiab. Vim li cas? Ua ntej peb tsis tau los teev tiam Yehauvas,  peb txhua tus tau koom tes txhawb Xatas lub qab ntuj, tsis hais tej yam loj tej yam me. Tiamsis nimno peb twb hloov peb lub neej los ua raws li Vajtswv lub siab nyiam lawm. Peb kuj muaj kev ntseeg rau tus nqe txhiv, thiab peb twb muab peb tus kheej cob rau Vajtswv lawm. Vajtswv thiaj khuvleej peb thiab tiv thaiv peb ntawm sab kev ntseeg. (Tubtxib Tes Haujlwm 3:19) Cov Yixayee tej moos cawm siav twb yog piv txwv txog txojkev tiv thaiv no ntag.​—Xwm Txheej Taug Kev 35:11-15; Kevcai 21:1-9.

²⁵ Vim li cas ho muaj tej moos cawm siav ntawd? Yog tias ib tug Yixayee ua raug lwm tus tuag, tiamsis tsis yog nws txhob txwm tua, ces nws yuav tsum khiav mus nkaum hauv ib lub moos cawm siav. Yog cov txwj laus txiav txim tias tsis yog nws txhob txwm tua tiag, ces nws yuav tsum nyob hauv lub moos ntawd mus txog thaum tus pov thawj hlob tuag. Tom qab ntawd nws mam li tawm mus nyob lwm qhov los tau. Tej no qhia tias Vajtswv saib txojsia muaj nqes, thiab nws muaj lub siab khuvleej neeg npaum li cas tiag! Niaj hnub no, peb txhua tus zoo ib yam li tus uas tua neeg yuam kev ntawd ntag, vim yav tas los peb tau ua tej yam uas hla Vajtswv txoj kevcai ntsig txog txojsia thiab ntshav. Tiamsis vim muaj tus nqe txhiv, Yehauvas thiaj npaj kev los tiv thaiv peb ntawm sab kev ntseeg. Tej uas nws npaj ntawd zoo nkaus li lub moos cawm siav uas peb mus nkaum rau hauv, peb thiaj yuav dim peb lub txim. Yog tias koj saib qhov no rau nqe tiag, koj yuav tsum caw tibneeg los nyob hauv lub moos cawm siav no thiab. Rau siab ntso mus caw tibneeg los, vim lub caij uas muaj “kev ceeblaj txom nyem loj kawg li” twb los ze lawm.​—Mathai 24:21; 2 Khaulee 6:1, 2.

26-28. Tiam no zoo ib yam li tiam uas Exekhee nyob li cas, thiab peb yuav nyob hauv Vajtswv txojkev hlub li cas?

²⁶ Peb tiam no zoo ib yam li tiam uas tus tub qhe Exekhee nyob thiab. Yehauvas tau txib Exekhee mus ua tus faj xwm, cev Vajtswv lus rau cov neeg Yixayee. Vajtswv hais tias: “Koj hnov kuv tej lus ntawm kuv lub qhov ncauj thaum twg, koj cia li hais kuv tej lus ceeb toom rau lawv.” Yog tias Exekhee tsis ua nws tes haujlwm, es tibneeg tsis hnov cov lus ceeb toom ho tuag thaum Yeluxalees raug txim, ces Vajtswv yuav muab lawv cov ntshav rau Exekhee ris ntag. (Exekhee 33:7-9) Tiamsis vim Exekhee mloog, nws thiaj tsis tau ris lub txim ntawd.

²⁷ Tshuav tsis ntev xwb, Xatas lub qab ntuj yuav raug rhuav tshem. Yehauvas Cov Timkhawv niaj hnub tshaj tawm txog “hnub uas . . . Vajtswv ua pauj,” thiab txog Vajtswv lub Nceeg Vaj. Peb paub tias peb yuav tsum ua txoj haujlwm no kom tiav thiab peb suav tias yog ib qho koob hmoov zoo kawg nkaus li. (Yaxaya 61:2; Mathai 24:14) Koj puas mob siab ua tes haujlwm no? Tus tubtxib Povlauj saib nws tes haujlwm tseem ceeb kawg nkaus li. Nws thiaj hais tau tias: “Kuv yuav tsis ris nej sawvdaws tej ntshav lawm, rau qhov kuv tsis tseg qhov uas hais txhua yam uas Vajtswv xav tseg lawd rau nej mloog.” (Tubtxib Tes Haujlwm 20:26, 27) Povlauj tso tau tus qauv zoo kawg li rau peb xyaum!

²⁸ Tiamsis yuav kom peb nyob ruaj hauv Yehauvas txojkev hlub, tsis yog peb yuav saib txojsia thiab ntshav muaj nqes xwb. Tseem ceeb rau peb coj lub neej dawb huv li Vajtswv pom zoo. Peb tseem yuav kawm ntxiv txog qhov no nyob rau Tshooj 8.