1, 2. Thaum tibneeg ua kevcai raus dej, leejtwg nrog zoo siab thiab?

YOG tias koj pe hawm Yehauvas tau ntau ntau xyoo lawm, ces koj twb pom coob leej ntau tus ua kevcai raus dej hauv tej rooj sib txoos lawm. Txawm li ntawd los, thaum koj pom koj cov kwvtij sawv ntsug hais tab meeg sawvdaws tias lawv xav ua kevcai raus dej, yeej ua rau koj kub siab lug, puas yog? Thaum ntawd, sawvdaws npuaj teg zom zaws, zoo siab xyiv fab kawg li. Thaum koj pom lawv txiav txim siab tuaj Yehauvas tog, tej zaum koj yeej tauv tsis taus koj lub kua muag li, puas yog? Lub caij ntawd yeej ua rau peb zoo siab kawg li!

² Peb tsuas pom cov uas ua kevcai raus dej nyob rau peb thaj tsam xwb. Tiamsis cov tubtxib saum ntuj pom coob leej ntau tus ua kevcai raus dej thoob plaws ntiajteb. Thaum lawv pom ntau txhiab leej los koom nrog Yehauvas lub koom haum txhua txhua lub lim tiam, koj xav lawv puas muaj kev “xyiv fab saum ntuj ceeb tsheej”? (Luka 15:7, 10) Lawv yeej xyiv fab kawg nkaus li thaum lawv pom lub koom haum huam vam coob zuj zus ntxiv!​—Hakai 2:7.

3. Vim li cas Xatas ho zoo li tus “tsov ntxhuav,” thiab nws xav ua dabtsi?

³ Thaum tibneeg ua kevcai raus dej, kuj muaj ib co  plig uas npau taws heev. Xatas thiab nws cov dab chim kawg li thaum lawv pom txhiab txhiab leej txiav txim siab tso lub qab ntuj phem no tseg. Xatas twb khav ntxhias tias tsis muaj ib tug neeg twg hlub Yehauvas tiag tiag. Nws liam tias tibneeg yuav tso Vajtswv tseg yog tias lawv raug tsim txom hnyav. (Nyeem Yauj 2:4, 5.) Tiamsis thaum txhiab txhiab leej muab lawv tus kheej cob rau Yehauvas txhua lub lim tiam, qhov ntawd zoo ib yam li lawv cem taw tes nki rau Xatas lub ntsej muag tias lawv yuav tsis tuaj Xatas tog lawm. Tej no qhia tias Xatas cov lus nkaug ntawd tsis muaj tseeb. Twb yog vim li ntawd Xatas thiaj “ncig mus ncig los zoo yam nkaus li tus tsov ntxhuav nyooj laws nrhiav tus uas yuav tom tau noj.” (1 Petus 5:8) Tus “tsov ntxhuav” ntawd xav muab peb tom noj ntawm sab kev  ntseeg, kom peb plam txojkev sib raug zoo nrog Vajtswv.​—Ntawv Nkauj 7:1, 2; 2 Timaute 3:12.

4, 5. (1) Yehauvas txwv tsis pub Xatas ua ob yam dabtsi? (2) Cov tseem Khixatia tso siab tau li cas?

⁴ Txawm tias peb muaj ib tug yeeb ncuab uas tsiv tsaim kawg li los, peb tsis tas yuav txhawj ntshai. Vim li cas? Rau qhov muaj ob yam uas Yehauvas txwv tsis pub Xatas ua. Ob yam ntawd yog dabtsi? Ib, Xatas tsis muaj peevxwm dag ntxias tau tag nrho Vajtswv cov tibneeg yuam kev. Peb paub li no rau qhov Yehauvas twb qhia tseg lawm tias yuav muaj “ib pab neeg coob coob” uas yog cov tseem Khixatia, dim lub caij muaj kev ceeblaj txom nyem loj kawg li. (Qhia Tshwm 7:9, 14) Vajtswv tej lus faj lem yeej yuav muaj tiav raws li nws tau hais, tsis muaj ib los poob li.

⁵ Ob, Xatas tsis muaj peevxwm kov yeej tus uas muab siab npuab Vajtswv. Tus cev Vajtswv lus hu ua Axaliya twb hais li no rau Vajntxwv Axa: “[Yehauvas] nrog nraim nej rau thaum nej nrog nraim nws.” (2 Vaj Keeb Kwm 15:2; nyeem 1 Khaulee 10:13) Muaj ntau zaj hauv phau Vajlugkub tau ua pov thawj tias Vajtswv yuav tsis pub kom Xatas kov yeej tus ntseeg uas nrog nraim Vajtswv. (Henplais 11:4-40) Niaj hnub no, yog tias ib tug Khixatia nrog nraim Vajtswv, ces nws yuav muaj peevxwm tawm tsam yeej Ntxwg Nyoog. Vajtswv Txojlus cog tseg li no rau peb tias: “Cia li tawm tsam Ntxwg Nyoog, Ntxwg Nyoog thiaj li khiav ntawm nej mus.”​—Yakaunpau 4:7.

6. Xatas tawm tsam cov Khixatia ib tug zuj zus li cas?

⁶ Peb paub tias Xatas kov tsis yeej Yehauvas li, tiamsis peb yuav tsum ceev faj rau qhov lub caij tamsim no  Xatas tabtom kub siab lug nrhiav kev los tawm tsam Vajtswv cov tibneeg ib tug zuj zus. Xatas paub tias yog nws txo tau peb txojkev sib raug zoo nrog Yehauvas, ces nws yuav kov yeej peb. Nws yuav tawm tsam peb li cas? (1) Nws ua nruj ua tsiv heev los tawm tsam peb; (2) nws tawm tsam peb ib tug zuj zus; thiab (3) nws siv tej tswvyim phem los haub ntxias kom peb yuam kev. Cia peb kawm ntxiv txog peb txojkev tawm tsam no.

7. Vim li cas Xatas ua nruj ua tsiv ua luaj li rau Yehauvas cov tibneeg?

⁷ Ua nruj ua tsiv heev los tawm tsam peb. Tus tubtxib Yauhas ceeb toom cov tseem Khixatia li no: “Lub ntiajteb huvsi nyob hauv tus uas Phem qab hwjchim.” (1 Yauhas 5:19) Xatas twb muab lub qab ntuj neeg phem no nqos kheej lawm. Tiamsis tshuav Yehauvas cov tibneeg, nws ntxias tsis tau xwb. Zaum no nws thiaj tig los ua nruj ua tsiv heev rau peb. (Mikha 4:1; Yauhas 15:19; Qhia Tshwm 12:12, 17) Xatas npau taws heev rau qhov nws paub tias nws lub sijhawm tshuav tsis ntev lawm. Nws thiaj hajyam ua phem los haub ntxias peb yuam kev. Peb yuav tau thev tej kev kub ntxhov thiab kev limhiam uas Xatas ua rau zaum kawg no. Yog li ntawd, cia peb yimhuab ua neeg “tab fab dav” thiab “paub caij paub nyoog.”​—1 Vaj Keeb Kwm 12:32.

8. Vim li cas Povlauj thiaj hais tias peb “tawm tsam” tej dab phem?

⁸ Tawm tsam ib tug zuj zus. Tus tubtxib Povlauj ceeb toom rau cov Khixatia li no: “Peb . . . tawm tsam tej dab phem saum nruab ntug huvsi.” (Efexau 6:12) Lo lus “tawm tsam” no qhia tias peb sib tawm tsam tim ntsej tim muag, siv tes taw sib mos sib qhau ntag. Thaum Povlauj siv lo lus ntawd, nws qhia tias tej dab  ntawd yuav tawm tsam peb txhua leej txhua tus, ib tug zuj zus. Txawm peb nyob lub tebchaws uas nyiam teev dab lossis tsis nyiam los xij, peb yuav tsum nco ntsoov tias thaum peb muab peb tus kheej cob rau Yehauvas lawm, ces zoo ib yam li peb yuav pib sib qhau nrog Xatas thiab nws cov dab ntag. Txij hnub uas koj ua kevcai raus dej, koj yuav tau tawm tsam tej dab limhiam ntawd. Povlauj thiaj li txhawb cov ntseeg hauv Efexau peb zaug tias, lawv yuav tsum “nyob ruaj khov”!​—Efexau 6:11, 13, 14.

9. (1) Vim li cas Xatas thiab nws cov dab ho npaj ntau yam “tswvyim phem” los ntxias peb? (2) Vim li cas Xatas ho ntxias kom peb xav txog tej yam phem, thiab peb yuav ua li cas thiaj tawm tsam yeej nws? (Nyeem lub ntsiab me “ Ceev Faj Xatas Lub Tswvyim Dag!”) (3) Peb yuav kawm txog Xatas lub tswvyim phem twg?

⁹ Siv tej tswvyim phem los haub ntxias. Povlauj txhawb kom cov Khixatia sawv ruaj nreeg thaum Xatas siv “tej tswvyim phem” los ntxias peb. (Efexau 6:11) Tsis yog Xatas thiab cov dab sim peb ib zaug xwb ces txawm tso tseg lawm, tiamsis lawv yeej npaj tswvyim tas zog los txo peb. Povlauj thiaj hais tias Xatas muaj “tej” tswvyim phem. Vim li cas lawv npaj tswvyim tas zog los ntxias peb? Tej zaum ib txhia Khixatia sawv khov kho thaum lawv raug kev nyuaj siab. Tiamsis ua cas thaum lawv raug lwm yam teeb meem, lawv txawm qaug rau yam ntawd lawm. Yog li ntawd, Dab Ntxwg Nyoog thiab cov dab yeej soj ntshis peb, seb yam twg yuav txo tau peb txojkev ntseeg; ces lawv mam siv yam ntawd los ntxias peb. Tiamsis peb zoo siab kawg li tias Vajtswv twb muab Ntxwg Nyoog lub qe nthuav tawm hauv phau Vajlugkub rau peb paub lawm. (2 Khaulee 2:11) Hauv phau ntawv no, peb twb kawm lawm tias, Ntxwg Nyoog siv txojkev ntshaw  nyiaj txiag qhov txhia chaw, kev phoojywg, thiab kev plees kev yi los ntxias peb. Cia peb ho kawm seb, Xatas siv kev teev dab los ntxias tibneeg li cas.

10. (1) Kev teev dab yog li cas? (2) Yehauvas xav li cas txog kev teev dab, thiab koj ho xav li cas thiab?

¹⁰ Cov tibneeg uas teev dab yeej nrog tej dab phem ntawd sib txuas lus ntag. Txojkev saib hmoov, ua khawv koob yees siv, tso dab tom neeg, thiab txheev cov tuag puavleej yog kev teev dab. Peb twb paub lawm tias, tej kevcai dab qhuas ntawd puavleej “qias vuab tsuab” rau Yehauvas. (Kevcai 18:10-12; Qhia Tshwm 21:8) Yog tias peb “ntxub yam uas phem” ib yam li Yehauvas ntxub, peb yeej yuav tsis nrhiav kev los nrog dab sib txuas lus ib zaug li. (Loos 12:9) Yog tias peb raus tes nrog kev teev dab, ces twb yog peb ntxeev siab tawm tsam peb Leej Txiv Yehauvas ntag!

11. Thaum ib tug Khixatia qaug rau kev teev dab, vim li cas Xatas ho suav tias nws yeej lawm? Piav seb.

¹¹ Xatas paub tias yog peb raus tes nrog tej kev teev dab ces twb yog peb ntxeev siab tawm tsam Vajtswv Yehauvas lawm. Xatas thiaj tas zog nrhiav kev los haub ntxias kom peb mus koom nrog tej ntawd. Txhua zaus uas nws ntxias tau ib tug Khixatia twg, Xatas suav tias nws yeej lawm. Vim li cas? Muab ua piv txwv li no: Yog ib tug thawj tub rog twg lam ntxias tau nws tus yeeb ncuab ib tug tub rog los tuaj nws tog lawm, nws yuav zoo siab kawg li. Tej zaum nws yuav ua ib tug khav ntxhias coj tus tub rog uas ntxeev siab ntawd, mus qhia rau teb rau chaw. Nws txhob txwm ua tej no los tuam mom nws tus yeeb ncuab xwb. Ib yam li  ntawd, yog ib tug Khixatia twg qaug rau kev teev dab, ces twb yog nws txhob txwm tso Yehauvas tseg thiab mus nyob hauv qab Xatas txojkev tswjhwm ntag. Xatas yuav khav ntxhias tias nws ntxias tau Vajtswv ib tug tub qhe lawm tiag! Peb puas xav kom Xatas khav txog peb li ntawd? Peb yeej tsis xav kom Xatas tau lus khav li ntawd ib zaug li! Peb yeej tsis ntxeev siab rau peb tus Vajtswv Yehauvas li ntawd.

12. Xatas ntxias peb li cas kom peb qaug rau kevcai teev dab?

¹² Yog tias peb ntxub tej kev teev dab, ces Xatas yeej siv tsis tau tej kevcai ntawd los ntxias peb. Twb yog vim li ntawd, Xatas thiaj nrhiav kev los ntxeev ntxias kom cov Khixatia xav yuam kev, kom peb “hu qhov phem ua qhov zoo, thiab hu qhov zoo ua qhov phem.” (Yaxaya 5:20) Nws siv tib co lus nug qub puag thaum ub los ntxias peb, kom peb txhob ntseeg qhov tseeb.

13. Xatas tau siv tej lus nug los ntxias kom lwm tus txhob ntseeg qhov tseeb li cas?

¹³ Puag thaum chiv keeb, hauv lub vaj Edee Xatas siv tej lus nug los ntxeev ntxias Eva li no: “Vajtswv hais tias tsis txhob noj txhua yam txiv ntoo hauv lub vaj no tiag lov?” Tiam uas Yauj nyob, thaum cov tubtxib saum ntuj sib sau ua ke nrog Vajtswv Yehauvas, Xatas kuj nug li no thiab: “Yauj hwm thiab paub ntshai koj dawb dawb xwb lov?” Tom qab no thaum Yexus pib qhia txoj xov zoo hauv ntiajteb, Xatas sim Yexus li no: “Yog koj yog Vajtswv tus tub cia li hais kom tej pob zeb no ntxeev ua ncuav los maj.” Xatas cov lus ntxias Yexus ntawd yeej hais saib tsis taus Yehauvas kiag li! Xatas twb paub lawm tias, tau rau lub lim tiam ua ntej ntawd  xwb, Yehauvas tus kheej kiag tau hais saum ntuj tuaj li no: “Tus no yog kuv tus tub uas kuv hlub, kuv txaus siab rau nws heev”!​—Chiv Keeb 3:1; Yauj 1:9; Mathai 3:17; 4:3.

14. (1) Dab Ntxwg Nyoog ntxeev ntxias li cas, kom peb qaug rau kev teev dab? (2) Peb yuav kawm txog dabtsi ntxiv?

¹⁴ Niaj hnub no, Dab Ntxwg Nyoog siv tib lub tswvyim qub los ntxeev ntxias tibneeg, kom peb xav yuam kev txog kev teev dab. Tu siab kawg li uas Ntxwg Nyoog tseem ntxias tau cov ntseeg ib txhia pib xav yuam kev tias, muaj tej hom kevcai teev dab tsis phem ua luaj twg. (2 Khaulee 11:3) Peb yuav ua li cas pab tau cov ntawd thim rov qab los? Thiab peb yuav npaj peb lub siab li cas peb thiaj tsis qaug rau Xatas tej lus ntxeev ntxias ntawd? Yuav kom peb paub teb ob lo lus nug no, cia peb kawm seb Xatas siv tej kevcai teev dab los txuam rau kev lomzem ua si thiab kev kho mob li cas, xwv peb thiaj paub ceev faj.

15. (1) Hauv tej lub tebchaws zoo li Amelikas lossis Askiv teb, coob leej xav li cas txog kev teev dab? (2) Ntsig txog kev teev dab, cov Khixatia ib txhia pib xav yuam kev li lub qab ntuj no li cas?

¹⁵ Nyob hauv tej lub tebchaws zoo li tebchaws Amelikas lossis Askiv teb, feem coob suav tias tej kevcai teev dab, lossis tej kevcai dab qhuas, tsis phem ua luaj twg. Niaj hnub no tej yeeb yaj kiab, tej this vis, tej nkees, thiab tej ntaub ntawv qhia tias kev teev dab tsuas yog kev ua si xwb, tsis tsim teeb meem rau tibneeg tiag. Tej yeeb yaj kiab thiab tej ntaub ntawv ntsig txog kev teev dab nto moo tshaj plaws li lawm. Coob leej siab tuag nthi rau tej ntawd, lawv thiaj sib sau ua pab ua pawg  los tham txog tej ntawd. Yog li ntawd, Xatas thiab nws cov dab muaj tswvyim kawg li. Lawv twb ntxias tau coob leej xav yuam kev tias kev teev dab tsis phem ua luaj twg. Cov Khixatia puas qaug rau lub tswvyim dag no thiab? Ib txhia kuj pib xav yuam kev li ntawd lawm thiab. Muaj ib tug Khixatia tau mus saib ib zaj yeeb yaj kiab ntsig txog kev teev dab. Tom qab nws saib tas, nws hais li no: “Kuv saib zaj yeeb yaj kiab ntawd, tiamsis kuv twb tsis nqes tes teev dab kiag ne.” Xav seb, vim li cas tsis zoo rau peb xav li nws hais ntawd?

16. Vim li cas tsis zoo rau peb koom tej kev lomzem ua si uas muaj feem nrog kev teev dab?

¹⁶ Qhov uas peb saib tej yam ntsig txog kev teev dab yeej txawv ntawm qhov uas peb koom tes nrog kev teev dab. Tiamsis peb tsis txhob xav yuam kev tias tej uas peb saib ntawd yuav tsis tsim teeb meem rau peb. Vim li cas thiaj hais li no? Muab xav li no: Vajtswv Txojlus qhia tias Xatas thiab nws cov dab tsis paub tej uas peb xav hauv nruab siab. * Zoo li peb nyuam qhuav kawm, yuav kom Xatas thiab nws cov dab paub tias yam ntxiab twg thiaj mag peb, lawv yuav tsum soj ntshis seb peb coj li cas thiab nyiam tej kev lomzem ua si zoo li cas. Yog tias ib tug Khixatia nyiam saib tej yeeb yaj kiab lossis nyeem tej ntawv ntsig txog kev teev dab, ua khawv koob yees siv, ntsig txog cov neeg raug dab, lossis lwm yam zoo li ntawd, ces zoo ib yam li nws qhia rau cov dab ntawd paub tias tej ntxiab twg thiaj mag tau nws. Thaum cov dab pom tej yam uas nws  pheej saib, lawv yimhuab yuav siv tej ntawd los haub ntxias nws. Lawv yuav hajyam nrog nws sib ntsuas zog mus txog thaum nws swb kiag. Twb yog vim ib txhia saib tej yeeb yaj kiab thiab tej ntaub ntawv zoo li ntawd, lawv thiaj pib qaug siab rau tej kev teev dab. Thaum kawg cov ntawd kuj nqes tes teev dab lawm thiab.​—Nyeem Kalatia 6:7.

17. Xatas siv tswvyim li cas los ntxias cov uas muaj mob?

¹⁷ Xatas xav siv tej kev lomzem ua si los ntxias peb, tiamsis nws kuj siv tej kev kho mob thiab. Nws ua li ntawd li cas? Muab ua piv txwv li no, tej zaum ib tug Khixatia muaj mob muaj nkeeg, nws twb nrhiav ntau yam tshuaj los kho kawg tas los tsis zoo. (Malakau 5:25, 26) Thaum Xatas thiab nws cov dab pom li no, tej zaum lawv yuav siv lub caij no los sim nws. Tej zaum cov dab yuav sim seb nws puas kam txais tej kev kho mob uas muaj kev teev dab lossis khawv koob txuam rau. Yog tias dab ntxias tau ib tug ntseeg li ntawd, ces yuav txo tau tus ntseeg ntawd txojkev sib raug zoo nrog Vajtswv lawm ntau. Ua cas thiaj hais li no?

18. Cov Khixatia yuav tsum ceev faj tej tshuaj thiab kev kho mob zoo li cas?

¹⁸ Thaum cov Yixayee koom nrog tej kevcai teev dab, Yehauvas ceeb toom rau lawv tias: “Thaum nej tsa tes thov, kuv yuav fee plhu ntawm nej, txawm yog nej yuav thov ntau ntau, kuv yuav tsis mloog.” (Yaxaya 1:13, 15) Peb tsis xav kom muaj ib yam dabtsi txwv tau peb tej lus thov rau Vajtswv thiab nws txojkev pab. Thaum peb muaj mob muaj nkeeg peb hajyam xav tau Vajtswv txojkev pab. (Ntawv Nkauj 41:3) Yog li ntawd, cov tseem Khixatia yuav tsum tsis txhob txais tej tshuaj  kho mob, lossis tej kev kho mob uas muaj feem nrog kev teev dab lossis khawv koob. Peb yuav tau zam tej ntawd huvsi. * (Mathai 6:13) Yog tias peb zam tej ntawd, peb yeej yuav tau txais Yehauvas txojkev pab mus li.​—Nyeem lub ntsiab me “ Puas Yog Kev Teev Dab Tiag?”

19. (1) Dab Ntxwg Nyoog dag ntxias kom coob leej ntau tus ntseeg li cas txog nws? (2) Tsis zoo rau cov Khixatia tham txog dabtsi?

¹⁹ Hauv tej lub tebchaws zoo li Amelikas thiab Askiv teb, feem coob ntseeg tias Xatas tsis muaj hwjchim tiag. Tiamsis lwm cov tebchaws, tibneeg ho ntshai dab heev. Hauv cov tebchaws ntawd, Dab Ntxwg Nyoog tau dag ntxias coob leej ntau tus kom lawv ntseeg tias nws muaj hwjchim loj tshaj plaws. Ib txhia noj tsis qab pw tsis tsaug zog vim lawv ntshai nrhw dab. Lawv ib tug nyiam piav rau ib tug txog dab tej tswvyim thiab tej txujci, ua rau coob leej ntau tus xav mloog heev. Tiamsis, puas tsim nyog peb tham txog dab li ntawd rau lwm tus? Yeej tsis tsim nyog. Muaj ob yam tseem ceeb heev uas pab  kom Vajtswv Yehauvas cov tub qhe txhob tham txog dab li ntawd.

20. Yog tias peb tsis ceev faj, peb yuav txhawb Xatas tej lus dag li cas?

²⁰ Ib, yog tias peb nyiam tham txog tej txujci uas Xatas thiab nws cov dab ua, ces twb yog peb txhawb nqa Dab Ntxwg Nyoog tes haujlwm xwb. Ua cas thiaj hais li ntawd? Vajtswv Txojlus qhia tias Xatas muaj hwjchim ua ntau yam txujci, tiamsis nws kuj txawj ua tej yam “phimhwj dag ntxias” kawg li. (2 Thexalaunika 2:9, 10) Xatas yog tus txawj ntxeev ntxias tshaj plaws li. Yog tias ib tug twg muaj ntsis xib rau kev teev dab, ces Xatas txawj ntxias kom nws hajyam ntseeg tej yam uas tsis muaj tseeb. Tej zaum tus ntawd yuav piav rau tus ub tus no tias nws pom thiab hnov li ub li no. Thaum ib tug tham dhau ib tug, lawv yuav muab tham muaj ceem heev dua qub. Yog tias ib tug Khixatia piav tej zaj zoo li  ntawd, ces twb yog nws ua li Dab Ntxwg Nyoog lub siab nyiam. Thiab twb yog nws xyav Xatas tej tswvyim dag xwb.​—Yauhas 8:44; 2 Timaute 2:16.

21. Peb yuav tsum tham txog tej yam zoo li cas?

²¹ Ob, txawm tias ib tug Khixatia twb raug dab tsim txom lawm tiag los, tsis zoo rau nws muab piav ua si rau cov ntseeg mloog. Yog vim li cas? Vajtswv Txojlus sam hwm li no rau peb: “Cia li ntsia ntsoov Yexus uas yog peb lub hauv paus kev ntseeg thiab yog tus uas ua kom txojkev ntseeg tiav.” (Henplais 12:2) Yog li ntawd, tsim nyog peb ntsia ntsoov Yexus Khetos xwb. Tsis txhob muab Xatas tej tswvyim phem los tham tas zog. Thaum Yexus los hauv ntiajteb no, nws yeej tsis qhia nws cov thwjtim txog tej zaj ntsig txog cov dab limhiam. Yog tias Yexus xav tham txog tej ntawd, nws yeej paub ntau yam txog Xatas thiab txog tej yam uas Xatas ua tsis tau. Tiamsis Yexus tsis tham txog tej ntawd. Nws tau hau ntsoov rau nws tes haujlwm tshaj tawm txog lub Nceeg Vaj xwb. Yog li ntawd, cia peb xyaum Yexus thiab nws cov tubtxib. Zoo dua rau peb piav “tej lus hais txog Vajtswv tej haujlwm loj.”​—Tubtxib Tes Haujlwm 2:11; Luka 8:1; Loos 1:11, 12.

22. Yuav muaj kev “xyiv fab saum ntuj ceeb tsheej” yog tias peb ua dabtsi?

²² Xatas yeej siv tej tswvyim phem zoo li kev teev dab los rhuav peb txojkev sib raug zoo nrog Yehauvas. Tiamsis yog tias peb ntxub tej kev limhiam thiab tuav rawv yam uas zoo, Ntxwg Nyoog yuav ntxeev ntxias tsis tau peb mus koom nrog tej kev teev dab. (Nyeem Efexau 4:27.) Xav seb yuav muaj kev “xyiv fab saum ntuj ceeb tsheej” npaum li cas, yog tias peb “tawm tsam yeej Ntxwg Nyoog tej tswvyim phem” mus txog ntua lub sijhawm uas tsis muaj Dab Ntxwg Nyoog lawm!​—Efexau 6:11.