Yexus yog tus Vajntxwv uas kav Vajtswv lub Nceeg Vaj.

Lukas 1:31-33: “Koj yuav tis nws lub npe hu ua Yexus. Nws yuav ua tus tseemceeb, thiab sawvdaws yuav hu nws lub npe hais tias, yog Vajtswv tus uas muaj hwjchim loj kawg nkaus tus Tub. [Yehauvas] uas yog Vajtswv yuav tsa nws ua vajntxwv, ib yam li nws yawgkoob Daviv, nws yuav ua vajntxwv kav Yakhauj cov xeebntxwv mus ibtxhis; thiab nws lub tebchaws [Nceeg Vaj] yuav nyob mus tsis paub kawg li!”

Lub ntsiab Yexus tshaj tawm txog yog lub Nceeg Vaj

Mathais 9:35: “Yexus mus txhua nrho hauv tej nroog thiab hauv tej zos. Nws qhuab qhia hauv tej tsev sablaj, nws qhia Txojmoo Zoo uas hais txog Vajtswv lub Tebchaws [Nceeg Vaj], thiab kho tej neeg uas muaj mob, txawm yog tus mob li cas los Yexus kho tau zoo huv tibsi.”

Yexus qhia cov thwjtim txog tej uas yuav muaj tshwm sim kom lawv paub tias lub Nceeg Vaj yuav los rau thaum twg.

Mathais 24:7: “Ib lub tebchaws yuav sawv tawmtsam ib lub tebchaws; thiab ib haivneeg yuav sawv tawmtsam ib haivneeg. Yuav muaj kev tshaib kev nqhis thiab av yuav qeeg txhua qhov.”

Niaj hnub no, Yexus cov thwjtim thoob qab ntuj tshaj tawm txog Vajtswv lub Nceeg Vaj.

Mathais 24:14: “Thaum muaj neeg mus qhia Txojmoo Zoo uas hais txog Ntuj Ceebtsheej [lub Nceeg Vaj] mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg.”