“Thaum nej thov Vajtswv, nej tsis txhob hais mus hais los tej lus uas tsis muaj qabhau.”​—Mathais 6:7.

Yehauvas tsis xav kom peb npais mus npais los lossis muab sau tseg es mam li nyeem. Nws xav kom peb thov tawm plaws puag hauv nruab siab tuaj. Muab xav li no, nej puas xav mloog thaum nej ib tug phoojywg pheej npais mus npais los lo qub tas zog? Yuav ua rau nej tsis xav mloog. Yog li ntawd, thaum nej thov Vajtswv, tsis txhob npais mus npais los lo qub.

“Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb.”​—Yakaunpaus 4:3.

Yog tibneeg thov raws li lawv lub siab ntshaw ces Vajtswv yuav tsis teb. Xws li, thov kom raug nyiaj ntau ntau. Phau Vajlugkub hais tias kom tsis txhob saib txoj hmoo thiab ua neeg siab hlob. (Yaxayas 65:11; Lukas 12:15) Yog nej coj li no es Vajtswv tsis teb ces tsis txhob chim. Ua ntej nej thov, ua tib zoo xaiv nej cov lus seb Vajtswv puas yuav pom zoo tso.

 “Yog koj tsis ua raws li kevcai, Vajtswv yuav ntxub thiab dhuav koj tej lus thov.”​—Pajlug 28:9.

Txawm yav puag thaum ub los Vajtswv twb tsis mloog cov tibneeg uas tsis coj raws li nws tej kevcai. (Yaxayas 1:15, 16) Niaj hnub nimno, Vajtswv tseem yog tus qub, nws yeej tsis tau hloov li. (Malakis 3:6) Yog li ntawd, nej yuav tau txaus siab coj raws li Vajtswv tej kev lig kevcai xwv nws thiaj mloog nej tej lus thov. Txhob txhawj txhawj txog tej yam tsis zoo nej tau ua yav tas los. Yog nej hloov nej lub neej ua raws li Vajtswv pom zoo ces nws yeej yuav mloog nej tej lus thov.​—Tes Haujlwm 3:19.