NOOB NEEJ

Phau Vajlugkub qhia tias: Vajtswv “tsis tau tsim lub ntiajteb los nyob do cuas tsis muaj dabtsi, tiamsis nws tsim los rau neeg nyob.”​—YAXAYAS 45:18.

LUB NTIAJTEB

Phau Vajlugkub qhia tias: “Ib tiam dua tag mus, ib tiam tshwm tuaj, tiamsis lub ntiajteb nyob ruaj mus ib txhis.”​—TEJ LUS QHIA 1:4, TT.

QHOV NO TXHAIS LI CAS: Raws li phau Vajlugkub qhia, lub ntiajteb yeej yuav tsis raug puas tsuaj thiab yeej yuav muaj neeg nyob mus li. Yog li ntawd, qhov uas lub ntiajteb yuav kawg yog li cas tiag?

MUAB XAV LI NO: Phau Vajlugkub muab tiam uas peb nyob no piv rau tiam uas Nau-es nyob. Lub sijhawm Nau-es nyob “muaj kev limhiam ntais ntuj puv nkaus lub ntiajteb.” (Chivkeeb 6:13, TT ) Txawm li ntawd los Nau-es yog ib tug neeg ncaj ncees. Yog li thaum Vajtswv tso dej los nyab ntiajteb nws thiaj cawm Nau-es thiab Nau-es tsev neeg. Phau Vajlugkub hais tias lub sijhawm ntawd “cov neeg uas nyob txheej thaum ub thiaj li tuag tas huv tibsi lawm.” (2 Petus 3:6) Lub ntiajteb thiaj kawg li ntawd rau tiam uas Nau-es nyob. Yam twg raug puas tsuaj xwb? Tsuas yog cov neeg phem xwb. Lub ntiajteb tseem nyob los txog niaj hnub niam no. Thaum phau Vajlugkub hais tias lub ntiajteb yuav kawg, tsis yog tias lub ntiajteb yuav ploj mus tiamsis tsuas txhais tias cov neeg phem thiab tej kev phem uas lawv tau tsim yuav ploj mus xwb.

KEV PHEM KEV LIMHIAM

Phau Vajlugkub qhia tias: ‘Cov neeg siab phem nyob ib ntu xwb lawv yuav puas tsuaj mus, nej xav nrhiav lawv, tiamsis yuav tsis pom lawv, tiamsis cov neeg txo hwjchim yuav muaj teb muaj chaw, muaj kev thaj yeeb thiab kev tau zoo nyob kaj siab lug.’​—PHAU NTAWV NKAUJ 37:10, 11.

QHOV NO TXHAIS LI CAS: Txawm tias dej dag los kuav cov neeg phem tuag tag lawm los, tseem rov muaj tibneeg ua phem dua. Yog li tsis ntev tom ntej no Vajtswv yuav rhuav tshem tag nrho cov neeg phem mus thiab. Tos li ntawd phau Vajlugkub thiaj hais tias “cov neeg siab phem nyob ib ntu xwb.” Vajtswv yuav siv nws lub Nceeg Vaj lossis nws txoj kev kav uas nyob saum ntuj los rhuav tshem tag nrho cov neeg phem, thiab yuav kav cov neeg uas mloog nws lus lawm xwb.

MUAB XAV LI NO: Tej nom tej tswv uas kav tamsim no puas yuav zwm rau Vajtswv txoj kev kav? Phau Vajlugkub qhia tias lawv yuav tsis zwm tiamsis lawv yuav tawm tsam Vajtswv. (Phau Ntawv Nkauj 2:2) Yog li thaum kawg yuav muaj li cas xwb? Vajtswv lub Nceeg Vaj yuav rhuav tshem tagnrho tibneeg tej tseem fwv. Nws lub Nceeg Vaj yuav yog tib lub uas kav lawm xwb, thiab “yuav nyob ruaj khov mus ib txhis.” (Daniyees 2:44, TT ) Vim li cas Vajtswv yuav muab tej nom tswv hauv ntiajteb no rhuav tshem mus?

Phau Vajlugkub qhia tias: “Neeg lub neej tsis yog nyob ntawm nws tus kheej, thiab paub tias tsis yog neeg coj tau neeg tshais kauj ruam.”​—YELEMIS 10:23, TT.

QHOV NO TXHAIS LI CAS: Vajtswv tsis tau tsim kom tibneeg rov kav tibneeg. Txawm tibneeg kav los lawv yeej tsis txawj kav thiab yuav kho tsis tau tag nrho tej teeb meem hauv ntiajteb no.

MUAB XAV LI NO: Phau ntawv Britannica Academic sau tias tej tseem fwv hauv ntiajteb no yeej “tshem tsis tau kev txom nyem, kev tshaib kev nqhis, kab mob kev nkeeg, tej huab cua phem, kev tsov kev rog lossis lwm yam kev limhiam.” Phau ntawv no hais ntxiv tias: “Ib txhia . . . xav tias yuav tsum cia ib lub tseem fwv hauv ntiajteb no kav xwb thiaj yuav kho tau tibneeg tej teeb meem.” Tiamsis txawm tibneeg koom siab cia ib lub tseem fwv kav xwb los, yeej tseem yuav muaj teeb meem qees vim tibneeg yog noob txog neeg txhaum. Tsuas yog Vajtswv lub Nceeg Vaj xwb thiaj yuav kho tau txhua yam teeb meem hauv ntiajteb no mus li.

Yog li thaum phau Vajlugkub hais tias lub ntiajteb yuav kawg, tsuas yog hais txog qhov uas Vajtswv yuav rhuav tshem lub qab ntuj phem no xwb. Yog tias peb hwm thiab teev tiam Vajtswv kawg siab kawg ntsws lawm, tsis tas peb yuav txhawj yuav ntshai li. Tsim nyog peb zoo siab xwb vim Vajtswv yuav muab lub qab ntuj phem no hloov dua tshiab!

Thaum twg mam muaj li no? Saib zaj tom ntej seb phau Vajlugkub hais li cas ntxiv.