ADAS thiab Evas tsis mloog Vajtswv lus, txojkev txhaum thiab kev tuag thiaj kis rau sawvdaws. Txawm li ntawd los, Vajtswv xav kom tibneeg nyob mus ibtxhis. Nyob rau hauv phau Vajlugkub, Vajtswv tau hais ntau zaug tias nws yeej yuav ua raws li nws lub ntsiab rau noobneej.

• “Cov ncaj ncees yuav . . . nyob hauv lub tebchaws [ntiajteb] ntawd mus ibtxhis li.”​—Phau Ntawv Nkauj 37:29.

• “[Yehauvas] uas kav ib puas tsav yam yuav rhuav txojkev tuag kom puastsuaj mus ibtxhis; nws yuav so txhua tus lub kua muag.”​—Yaxayas 25:8.

• “Txojkev tuag yog tus yeebncuab uas thaum kawg Vajtswv yuav muab rhuav kom puastsuaj mus.”​—1 Kauleethaus 15:26.

• “Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”​—Tshwmsim 21:4.

Vajtswv yuav “rhuav txojkev tuag” li cas? Phau Vajlugkub hais tias: “Cov ncaj ncees yuav . . . nyob hauv lub tebchaws [ntiajteb] ntawd mus ibtxhis li.” Tiamsis phau Vajlugkub kuj hais tias: “Nyob hauv lub ntiajteb no yeej tsis muaj ib tug ua zoo txhua lub sijhawm lossis tsis ua txhaum li.” (Tej Lus Qhia 7:20) Ua li Vajtswv puas hloov nws tej kevcai xwv tibneeg thiaj coj tau? Vajtswv yuav tsis hloov rau qhov nws “yeej tsis dag.” (Titus 1:2) Yog li ntawd, yuav ua li cas thiaj muaj raws li Vajtswv lub ntsiab rau noobneej?

Vajtswv Yehauvas them tus nqe txhiv thiaj cawm tau noobneej dim txojkev tuag. Thaum phau Vajlugkub hais txog tus nqe txhiv, yog hais txog them nqe sib npaug zos xwv thiaj npog tau yam uas muab ua puas lawm. Vim sawvdaws muaj kev txhaum thiab tsis dim txojkev tuag, phau Vajlugkub thiaj hais tias: “Tsis muaj leejtwg yuav rov cawm tau nws dim, nws tsis muaj peevxwm muas tau nws txojsia ntawm Vajtswv los, rau qhov tus nqi uas them neeg txojsia kim heev.”​—Phau Ntawv Nkauj 49:7, 8.

Thaum ib tug tibneeg tas simneej, nws dim lub txim txhaum. (Loos 6:7) Nws cawm tsis tau nws tus kheej lossis lwm tus ntawm txojkev txhaum thiab kev tuag. Yog li ntawd, yuav tsum muaj ib tug tsis muaj kev txhaum muab nws txojsia los txhiv noobneej.​—Henplais 10:1-4.

Vajtswv thiaj li txib nws tus Tub, Yexus, los rau hauv ntiajteb. Thaum Yexus yug los, nws tsis muaj ib qho txhaum li. (1 Petus 2:22) Yexus hais tias nws “muab nws txojsia los txhiv ntau leej.” (Malakaus 10:45) Nws los tuag theej txhoj kom peb dim txojkev tuag thiab tau txojsia nyob mus ibtxhis.​—Yauhas 3:16.

Phau Vajlugkub qhia tias niaj hnub no peb nyob rau lub caij “muaj kev ntxhov siab heev.” (2 Timautes 3:1) Tej no ua povthawj tias peb nyob rau lub sijhawm kawg lawm tiag. Phau Vajlugkub hais ntxiv tias thaum lub sijhawm kawg yuav xaus, ‘cov neeg ua phem yuav raug txiav txim thiab raug puastsuaj.’ (2 Petus 3:3, 7) Tiamsis cov uas muaj lub siab xib rau Vajtswv yuav dim thiab tau “txojsia ntev dhawv mus ibtxhis tsis kawg.”​—Mathais 25:46.

 Thaum cov neeg tsis paub Vajtswv sawv rov los, yog lawv teev tiam nws lawv yuav tau txojsia nyob mus ibtxhis. Phau Vajlugkub hais tias thaum Yexus mus rau lub nroog Na-is, nws tsa ib tug pojntsuam tus tub uas tas simneej lawm sawv rov qab los. Yexus tsa tus tub ntawd sawv vim nws muaj kev hlub. (Lukas 7:11-15) Tus tubtxib Paulus hais tias: “Kuv thiab lawv puavleej cia siab ib yam nkaus hais tias Vajtswv yuav tsa cov neeg uas tuag lawm txhua tus sawv rov qab los, tsis hais cov neeg ua phem lossis cov neeg ua zoo.” Txojkev cia siab no qhia tias Vajtswv hlub tibneeg kawg nkaus.​—Tes Haujlwm 24:15.

Tsheej plhom leej yeej tso siab tias lawv yuav tau nyob mus ibtxhis. Phau Vajlugkub hais tias: “Cov ncaj ncees yuav . . . nyob hauv lub tebchaws [ntiajteb] ntawd mus ibtxhis li.” (Phau Ntawv Nkauj 37:29) Thaum txog lub sijhawm ntawd, sawvdaws yuav zoo siab thiab xav li tus tubtxib Paulus tias: “Txojkev tuag, koj swb lawm lauj! Txojkev tuag, koj tej taug tsuag tas lawm lauj!” (1 Kauleethaus 15:55) Lub caij ntawd, Vajtswv twb rhuav txojkev tuag thiab yuav tsis muaj leejtwg tuag ntxiv li lawm!