Vajtswv tsis xaiv leejtwg ntsej muag thiab nws npaj siab yuav foom koob hmoov rau tibneeg.

Vajtswv cog lus tseg rau Anplahas tias: “Kuv yuav foom koob hmoov ntawm koj mus rau txhua haivneeg uas nyob thoob plaws ntiajteb.”​—Chivkeeb 12:3.

Peb kawm tias Vajtswv hlub peb kawg nkaus li thiab nws yuav foom koob hmoov rau txhua tus uas mloog nws lus.

Vajtswv khuvleej sawvdaws nws thiaj foom koob hmoov rau cov uas muaj lub siab xib rau nws.

Txawm Vajtswv pub Mauxes muaj hwjchim ua ntau yam txujci phimhwj los Mauxes tseem thov Vajtswv tias: “Thov qhia tej uas koj npaj siab yuav ua ntawd rau kuv paub, kuv thiaj yuav ua tau tej uas haum koj siab.” (Khiav Dim 33:13) Vajtswv txaus siab heev rau Mauxes tej lus thov, nws thiaj foom koob hmoov kom Mauxes muaj laj lim tswvyim, paub Nws tej yeeb yam, thiab paub coj raws li Nws lub siab nyiam. Ib yam uas Mauxes kawm tau yog Vajtswv “muaj lub siab . . . hlub thiab tshua.”​—Khiav Dim 34:6, 7.

Peb kawm tias yog peb muaj lub siab xib Vajtswv tiag, nws yeej yuav foom koob hmoov rau peb. Vajtswv twb qhia tseg hauv nws Txojlus seb yuav tau pe hawm nws li cas, thiab nws tos rawv yuav foom koob hmoov rau peb.

Yog peb kawm txog Yexus thiab ua raws li nws tau qhia tseg, peb yuav tau Vajtswv tej koob hmoov mus ib txhis.

Yexus lub neej thiab tej yam uas nws tau qhia tseg nyob hauv Vajtswv Txojlus. Vajtswv muab hwjchim rau Yexus uas ntau yam txujci phim hwj heev. Xws li, kho cov neeg tsis pom kev, tsis hnov lus, thiab mus tsis taus kev. Nws kuj tsa tau cov neeg uas tag simneej lawm rov muaj sia dua. Txhua yam Yexus tau ua qhia txog tej yam zoo uas Vajtswv yuav ua yav tom ntej rau tibneeg. Yexus qhia ntxiv seb peb yuav tau ua li cas thiaj txais tau tej koob hmoov ntawd. Nws hais tias: “Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los.”​—Yauhas 17:3.

Yexus muaj siab mos siab muag thiab siab dawb siab zoo. Vim li ntawd, coob leej thiaj tuaj cuag Yexus thaum nws caw tias: “Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so.” (Mathais 11:29) Lub sijhawm uas Yexus nyob, muaj coob leej txivneej ua saib tsis taus tej pojniam. Tiamsis Yexus saib taus thiab ua zoo rau cov pojniam.

Peb kawm tias Yexus muaj kev hlub heev rau tibneeg. Peb yuav tau xyaum nws es coj cwjpwm zoo rau txhua tus.

Vajtswv Txojlus hais tias “tsuas muaj tib tug Vajtswv xwb,” thiab hais tias Yexus Khetos yog ib tug cev Vajtswv lus. (1 Kauleethaus 8:6) Yexus yeej hais meej lawm tias Vajtswv muaj hwjchim dua nws thiab Vajtswv yog tus txib nws los rau hauv ntiajteb.​—Yauhas 11:41, 42; 14:28. *