Nej puas tau xav tias, yog tsis muaj lub hnub niaj tagkis tawm tuaj, peb lub neej yuav xaus li cas? Twb yog vim muaj lub hnub tawm tuaj, tej ntoo thiaj li txawj hlav, tawg paj txi txiv, thiab muaj taus noob qoob noob tsa. Lub hnub kuj ua rau tej cag ntoo nqus dej hauv av los yug tej nplooj ntoos kom ntxuav tau tej huab cua.

Vajtswv yog tus pub kom muaj dej muaj nag peb thiaj muaj qoob muaj loo noj. Vajtswv kuj pub kom muaj caij muaj nyoog xwv peb thiaj li sau tau ntau hom qoob loo los noj haus txaus siab puv npo.

Ntau leej txiv tsev yeej txhawj tias tsam tsis muaj txaus noj txaus hnav. Tiamsis Vajtswv Txojlus hais tias: “Nej sim ua tib zoo xav saib tej noog uas ya saum nruab ntug, cov noog ntawd tsis cog qoobloo, tsis hlais thiab tsis sau ntim rau hauv txhab; tiamsis nej Leej Txiv tus uas nyob saum ntuj ceebtsheej tseem yug cov noog ntawd! Nej tseem muaj nqis dua cov noog ntawd.”​—Mathais 6:25, 26.

“Nej sim saib tej paj ntoos tom tiaj nrag tawg li cas . . . txawm yog Vajntxwv Xalumoos muaj nyiaj txiag ntau kawg li los nws twb tsis tau hnav ib cev ris tsho zoo npaum li tej paj ntoos ntawd ib lub li . . . Vajtswv twb pub rau tej nroj tsuag ntawd zoo nkauj ua luaj, yog li ntawd, Vajtswv yimhuab yuav pub rau nej muaj hnav zoo dua tej roj tsuag ntawd.”​—Mathais 6:28-30.

Yog Vajtswv twb pub peb muaj txaus noj txaus hnav ces nws yeej yuav pub lwm yam ntxiv thiab. Yog peb ua raws li nws lub siab nyiam, nws yuav foom koob hmoov kom peb muaj taus qoob taus loo lossis mus nrhiav tau ib txoj haujlwm los yug peb lub cuab lub yig.​—Mathais 6:32, 33.

Raws li tau hais no, yeej tsim nyog rau peb ntseeg Vajtswv vim nws pub lub hnub, dej nag, tej nas noog, thiab tej paj ntoos rau peb txhua leej txhua tus. Nyeem txuas ntxiv seb yav thaum ub, Vajtswv nrog tibneeg sib txuas lus li cas.