Coob leej ntau tus hais tias yog yus txawj yus ntse thiab muaj nyiaj yus lub neej yuav nyob tso siab plhuav. Lawv kuj hais ntxiv tias cov uas kawm tiav qib siab thiaj ua haujlwm zoo, pab tau lawv tsev neeg thiab pab tau tej laj mej pejxeem. Tsis tas li ntawd tus uas kawm ntawv siab yuav tau ib txoj haujlwm uas them nyiaj zoo thiab yuav nyob kaj siab lug.

Ib tug txivneej hu ua Zees Tshees (Zhang Chen) nyob Suav teb hais li no, “Kuv xav tias yog kuv mus kawm ntawv qib siab thiab tau ib txoj haujlwm uas them nyiaj zoo, kuv yuav tsis txom nyem ntxiv lawm thiab yuav txaus siab rau kuv lub neej.”

Sawvdaws kub siab lug mus kawm ntawv hauv tej tsev kawm ntawv qib siab uas muaj koob muaj npe nyob rau lwm lub tebchaws. Tiamsis thaum muaj tus kab mob COVID-19 tibneeg thiaj tseg tsis mus kawm ntawv txawv tebchaws lawm. Kaum xyoo tas los no ib lub koom haum tau sau tias, “Tshaj li ib nrab ntawm cov neeg uas mus kawm ntawv txawv tebchaws yog neeg Axias.”

Cov niam cov txiv khwv tas zog thiaj xa tau lawv cov menyuam mus kawm ntawv qib siab rau lwm lub tebchaws. Ib tug txivneej hu ua Tshes Xees (Qixiang) nyob Tais Vam hais tias, “Txawm peb tsev neeg tsis muaj nyiaj los kuv niam thiab kuv txiv tseem xa peb 4 nus muag mus kawm ntawv tim tebchaws Amelikas (America).” Zoo li lwm tsev neeg uas tau mus txais nyiaj, Tshes Xees tsev neeg kuj tau mus txais nyiaj los them lawv tej nuj nqis kawm ntawv thiab.

Kev kawm ntaub kawm ntawv yeej pab tau lub neej thiab, tiamsis feem coob pom tias thaum kawg txhua yam tsis mus raws li siab xav. Ib txhia kawm ntawv tag tiv nuj tiv nqi nrhiav tsis tau txoj haujlwm uas lawv mus kawm los ua. Ib tug pojniam hu ua Laxees Mus (Rachel Mui) sau hauv ib zaj xov xwm tias: “Cov uas mus kawm ntawv tiav los nrhiav tsis tau haujlwm ua coob kawg li.” Ib tug txivneej hu ua Ntsias Ntse (Jianjie) nyob Tais Vam uas tau mus kawm tiav daim ntawv dov tawj (doctorate) hais li no tias, “Coob leej nrhiav tsis tau txoj haujlwm uas lawv mus kawm tiav los ua ces lawv lam tau lam txais tej haujlwm dog dig ua xwb.”

Txawm ib txhia nrhiav tau txoj haujlwm lawv kawm tiav los lawv lub neej tsis mus raws li lub siab xav. Ib tug txivneej hu ua Nileem (Niran) nyob Thaib teb uas tau mus kawm ntawv qib siab hauv tebchaws Askiv rov los tau hais tias, “Kuv yeej nrhiav tau txoj haujlwm uas kuv mus kawm tiav ntag thiab yeej them nyiaj zoo heev. Tiamsis yus yim tau nyiaj ntau yus yim ua haujlwm ntau xwb. Tom qab no qhov chaw ua haujlwm ntawd tseem muab peb coob tus rho tawm lawm thiab. Thaum ntawd kuv mam pom tias yus yeej tso siab tsis tau rau ib txoj haujlwm twg li.”

Txawm cov tau haujlwm zoo thiab muaj txiag nplua nuj lawm los tseem muaj teeb meem hauv vaj hauv tsev, muaj mob muaj nkeeg, thiab muaj kev txhawj xeeb txog yav tom hauv ntej. Ib tug txivneej hu ua Khaxutausim (Katsutoshi) uas nyob tebchaws Nyiv Pooj hais tias, “Kuv yeej muaj txhua yam raws li kuv lub siab ntshaw tiamsis kuv dhuav qhov uas luag nrog kuv sib tw, khib kuv thiab ua phem rau kuv.” Hos ib tug pojniam uas nyob Nyab Laj teb hu ua Las (Lam) hais tias, “Kuv pom coob leej ntau tus sib tw khwv nyiaj kom lawv nplua nuj tiamsis txog thaum kawg lawv tsuas ntsib kev nyuaj siab ntxhov plawv thiab muaj mob muaj nkeeg xwb.”

Zoo ib yam li Feeqeem coob leej ntau tus pom tias lawv lub neej tsis yog tag rau kev kawm ntaub kawm ntawv thiab kev khwv nyiaj. Lawv ntseeg tias yog lawv ua zoo rau lwm tus lawv yuav nyob kaj siab lug. Tiamsis qhov uas ua zoo rau luag puas yuav ua rau peb nyob tso siab plhuav? Zaj tom ntej mam piav ntxiv txog qhov no.