1-2. (1) Ib txhia nom tswv sawv tawm tsam Yehauvas cov tib neeg li cas, tiam sis Yehauvas cov tib neeg ho coj li cas? (2) Txawm raug kev tsim txom los vim li cas peb ho nyob kaj siab lug? (Piav txog daim duab ntawm lub khaum.)

 TAM SIM no nyob thoob plaws ntiaj teb hauv 30 lub teb chaws, peb tes hauj lwm raug txwv. Nyob rau hauv ib txhia teb chaws no, cov nom tswv kuj ntes peb cov kwj tij nkauj muam mus kaw. Yehauvas yeej paub tias lawv tsis tau ua ib yam dab tsi txhaum li. Lawv tsuas yog nyeem thiab kawm phau Vajlugkub, mus qhia lwm tus txog tej uas lawv tau nyeem thiab mus tej kev sib txoos. Lawv tsis kam nyob ib roog nom tswv twg tog. Txawm lawv raug kev tawm tsam npaum li no los lawv yeej tuav rawv kev ntseeg * rau Yehauvas thiab lawv yeej txaus siab hlo ua li ntawd.

² Tej zaud koj yeej pom cov duab uas ib txhia Yehauvas Cov Tim Khawv tau yees tseg thiab lawv yeej ua ntsej muag luag ntxhi. Tos lawv luag ntxhi yam li no los yeeb vim yog lawv paub tias Yehauvas txaus siab heev vim lawv tuav rawv kev ntseeg. (1 Xwmtxheej Vajntxwv 29:17, thawj kab) Yexus hais tias: “Cov uas raug tsim txom vim ua ncaj ua ncees yog cov uas zoo siab . . . Cia li zoo siab xyiv fab rau qhov Vajtswv yuav foom koob hmoov nplua mias rau nej.”​—Mathais 5:10-12.

3. Raws li Tes Haujlwm 4:19, 20, Yexus cov tub txib tau ua li cas thaum lawv raug kev tsim txom thiab vim li cas lawv ho ua li ntawd?

³ Tej uas peb cov kwv tij nkauj muam ntseeg raug zoo tib yam  li thaum ub Yexus cov tub txib raug thiab, vim lawv qhia txog Yexus. Cov txiav txim ntawm cov Yudais lub rooj sab laj loj tau hais tas zaj tas zog tias “txwv tsis pub lawv tuav Yexus lub npe qhia leejtwg li.” (Tes Haujlwm 4:18; 5:27, 28, 40) Cov tub txib yuav ua li cas xwb? (Nyeem Tes Haujlwm 4:19, 20.) Lawv paub hais tias muaj ib tug tseem muaj hwj chim tshaj txib kom lawv “mus qhia Txojmoo Zoo rau sawvdaws thiab ua timkhawv qhia” txog Khetos. (Tes Haujlwm 10:42) Yog li ntawd, Petus thiab Yauhas thiaj ua siab tawv qhawv hais tias lawv yeem mloog Vajtswv lus dua li cov txiav txim ntawd thiab lawv yuav qhia txog Yexus tsis tseg tsis tu li. Zoo ib yam li lawv hais rau tej nom tej tswv ntawd tias, ‘Nej xav tias nej tseem muaj cai tshaj Vajtswv no lov?’

4. Nyob rau hauv Tes Haujlwm 5:27-29 tau hais tias cov tub txib ua dab tsi, thiab peb xyaum tau lawv tus yam ntxwv li cas?

⁴ Cov tub txib tso tau ib tug yam ntxwv zoo kawg li rau txhua tus ntseeg uas los tom qab no tau xyaum vim lawv “mloog Vajtswv lus heev dua li mloog neeg lus.” (Nyeem Tes Haujlwm 5:27-29.) Lawv tuav rawv lawv txoj kev ntseeg, yog li ntawd lawv thiaj raug ntaus. Thaum cov tub txib ncaim ntawm cov Yudais lub rooj sab laj loj mus, “lawv zoo siab kawg li, rau qhov Vajtswv pom zoo cia cov uas qhia Yexus zaj raug kev txajmuag” thiab lawv yeej mus qhia txoj xov zoo tsis tseg tsis tu.​—Tes Haujlwm 5:40-42.

5. Peb yuav piav txog cov lus nug twg?

⁵ Tej zaum qhov uas cov tub txib ua yuav ua rau ib txhia xav tsis thoob. Xws li cov tub txib hais tias kom mloog Vajtswv lus heev dua li mloog neeg lus tiam sis nyob hauv phau Vajlugkub ho hais tias kom mloog nom tswv lus, es yog li cas lawm tiag? (Loos 13:1) Ua li niaj hnub niam no peb ho “mloog nomtswv lus” yam li Paulus tau hais thiab yuav tuav rawv peb txoj kev ntseeg rau Vajtswv li cas?​—Titus 3:1.

6. (1) Tej “nomtswv” uas hais nyob rau hauv Loos 13:1 yog leej twg, thiab peb saib lawv zoo li cas? (2) Tag nrho tib neeg tej nom tswv muaj hwj chim npaum li cas?

⁶ Nyeem Loos 13:1. Nyob rau nqe no,  thaum hais txog tej “nomtswv” yog hais txog cov muaj hwj chim thiab tswj hwm lwm tus. Cov ntseeg yuav tau mloog cov nom tswv no lus. Cov nom tswv yog cov tuav kom tej pej xeem nyob sib haum xeeb, coj raws li tej kev cai, thiab qee lub sij hawm lawv kuj pab tiv thaiv Yehauvas cov tib neeg. (Tshwmsim 12:16) Yog lawv yuav kom peb them se los peb yuav tau them se, hwm thiab saib taus lawv. (Loos 13:7) Yehauvas cia kom muaj tej nom tej tswv thiaj muaj. Yexus kuj hais meej meej txog qhov no thaum Loos tus Tswv Xeev Pauti-us Philaj kom nws. Thaum Philaj hais rau Yexus tias nws muaj peev xwm txuag los sis txo tau Yexus txoj sia, Yexus thiaj teb nws tias: “Koj yeej tsis muaj hwjchim loj dua kuv, tsuas yog Vajtswv pub hwjchim rau koj xwb.” (Yauhas 19:11) Tag nrho tib neeg tej nom tswv thiab tej thawj coj niaj hnub niam no nrog rau Philaj tsuas muaj hwj chim npaum li Vajtswv pub rau lawv xwb.

7. Thaum twg peb mam li tsis mloog tej nom tej tswv lus, thiab lawv yuav tau nco ntsoov li cas?

⁷ Cov ntseeg yuav tsum tau mloog tej nom tej tswv lus yog hais tias lawv txoj cai tsis cuam tshuam Vajtswv txoj. Tiam sis thaum tej nom tej tswv hais kom peb txhob ua tej yam Vajtswv xav kom peb ua ces peb yuav tsis mloog lawv lus. Xws li thaum lawv hais kom cov tub hluas mus ua tsov ua rog pab lawv lub teb chaws. * Los sis lawv ho txwv tsis pub peb nyeem Vajlugkub, tsis pub siv tej ntaub ntawv kawm Vajlugkub, tsis pub qhia txoj xov zoo, thiab tsis pub mus kev sib txoos. Thaum tej nom tej tswv siv lawv lub hwj chim los tsim txom Yexus cov thwj tim, Yehauvas yeej saib ntsoov thiab yuav suav txim rau lawv.​—Tej Lus Qhia 5:8.

8. Yehauvas thiab tib neeg tej nom tswv ho sib txawv txav li cas, thiab vim li cas peb yuav tau paub qhov txawv txav ntawd?

⁸ Tej “nomtswv” yeej muaj hwj chim ua tau ntau yam zoo thiab muaj hwj chim los tswj hwm lwm tus tiam sis qhov no tsis tau hais tias lawv ua tau zoo rau txhua fab thiab muaj hwj chim heev. Haj tseem muaj ib tug uas zoo tshaj thiab muaj hwj chim loj tshaj plaws txhua tus huv tib si. Nws yog Vajtswv Yehauvas. Nyob rau hauv phau Vajlugkub tau hais plaub zaug tias nws muaj “Hwjchim Loj kawg nkaus.”​—Daniyees 7:18, 22, 25, 27.

9. Daniyees ua yog toog pom dab tsi?

⁹ Daniyees tus uas cev Vajtswv lus ua yog toog pom tseeb tseeb tias Yehauvas muaj hwj chim tshaj txhua leej txhua tus. Daniyees pom plaub tug tsiaj loj loj uas piv txwv txog tej nom tswv yav tag los lawm thiab cov kav tam sim no. Xws li Npanpiloos, Medes thiab Pawxias, Kilis, Loos thiab Askiv nrog rau teb chaws Yunaithim Xatej (United States). (Daniyees 7:1-3, 17) Daniyees txawm pom Yehauvas zaum saum Nws lub zwm txwv ntawm qhov chaw txiav txim saum ntuj ceeb tsheej. (Daniyees 7:9, 10) Tej uas Daniyees pom no ceeb toom tau tej nom tswv niaj hnub niam no li cas?

10. Raws li Daniyees 7:13, 14, 27, Yehauvas tau muab hwj chim rau leej twg kav lub ntiaj teb, thiab qhov no qhia tau li cas txog Yehauvas?

¹⁰ Nyeem Daniyees 7:13, 14, 27. Vajtswv Yehauvas yuav dua rhe tib neeg tej nom tswv lub hwj chim kav mus thiab yuav muab rau cov uas tsim nyog kav los kav. Cov ntawd yog “ib tug zoo li tus neeg” uas yog Yexus Khetos thiab “Vajtswv uas loj dua ntais cov neeg dawb huv” uas yog cov 144,000 uas yuav kav “mus ib txhiab ib txhis.” (Daniyees 7:18) Yog li ntawd, Yehauvas yeej yog tus muaj “Hwjchim  Loj kawg nkaus” vim nws ib leeg xwb thiaj muaj hwj chim ua tau tej no.

11. Daniyees kuj tau sau li cas tias Yehauvas muaj hwj chim tshaj tej nom tej tswv?

¹¹ Tej yam uas Daniyees ua yog toog pom kuj muaj raws li tej nws tau hais dua los lawm. Daniyees hais tias: “Vajtswv tus uas nyob saum ntuj . . . tsa thiab txo tej vajntxwv . . . nws muaj hwjchim loj dua tej tebchaws uas neeg ua vajntxwv kav, thiab nws xav tsa leejtwg ua vajntxwv kav tej tebchaws ntawd los tau.” (Daniyees 2:19-21; 4:17) Yeej muaj ntau zaug uas Yehauvas tau muab cov nom tswv tsa los sis tshem tawm mus.

12. Piav seb yav tag los lawm Yehauvas tau muab tej nom tswv tshem tawm li cas. (Saib daim duab.)

¹² Cia peb mus piav txog peb tug yam ntxwv uas qhia tias Yehauvas yeej muaj hwj chim muab “tej nomtswv” tshem tawm. Xws li cov Iyiv tus nom Falaus tau muab Yehauvas cov tib neeg quab yuam ua cev qhev thiab tsis kam tso lawv dim. Tiam sis Yehauvas tso nws cov neeg dim thiab ua rau Falaus tuag rau ntawm tus dej Hiav Txwv Liab. (Khiav Dim 14:26-28; Phau Ntawv Nkauj 136:15) Npanpiloos tus Vaj Ntxwv Npesaxas pam noj pam haus thiab “txawm tsa [nws] tus kheej tawm tsam tus Tswv ntuj” thiab “qhuas tej dab mlom uas muab nyiaj muab kub” ua. (Daniyees 5:22, 23) Vajtswv txawm txo Npesaxas lub hwj chim. “Ces hmo ntawd,” Npesaxas txawm raug luag tua tuag thiab nws tus nom txawm poob mus rau cov Medes thiab Pawxias lawm. (Daniyees 5:28, 30, 31) Vaj Ntxwv Helauj Akipas Ib uas kav teb chaws Palexatees muab tus tub txib Yakaunpaus tua thiab muab tus tub txib Petus kaw thiab npaj siab xav muab nws tua pov tseg. Tiam sis Yehauvas tsis pub Helauj ua li ntawd. Yehauvas tus tub txib saum ntuj thiaj “rau txim rau Helauj” ces nws txawm tuag lawm.​—Tes Haujlwm 12:1-5, 21-23.

13. Piav seb Yehauvas tau tshem tawm ib tsoom nom tswv li cas.

¹³ Yehauvas tau qhia tej nom tswv uas sib koom siab tias nws muaj hwj chim npaum li cas. Nws pab cov Ixayees ntaus rog thiab pab lawv rhuav tshem 31 tug vaj ntxwv Kana-as. Ntxiv ntawd, nws pab lawv txeeb tau teb chaws ntau kawg li. (Yausuas 11:4-6, 20; 12:1, 7, 24) Yehauvas kuj pab cov Ixayees ntaus yeej Vaj Ntxwv Npeehadas thiab 32 tug nom Xilias.​—1 Vajntxwv 20:1, 26-29.

14-15. (1) Vaj Ntxwv Nenpukajnexales thiab Dali-us tau hais li cas txog Yehauvas txoj kev kav? (2) Tus uas sau phau ntawv nkauj tau hais li cas txog Yehauvas thiab Nws cov tib neeg?

 ¹⁴ Ib zaug tas ib zaug tuaj los Yehauvas yeej yog tus muaj hwj chim tshaj. Thaum Npanpiloos tus Vaj Ntxwv Nenpukajnexales khav txog nws ‘lub hwjchim, lub meejmom thiab lub koob lub npe,’ nws twb xam tsis muaj Yehauvas kiag li. Yehauvas thiaj ua rau nws vwm. Tom qab Nenpukajnexales zoo lawm, nws thiaj li qhuas tus uas “muaj Hwjchim Loj kawg nkaus” thiab nws thiaj zeem tias Yehauvas “yuav kav mus ibtxhis.” Nws hais ntxiv txog Yehauvas tias: “Tsis muaj leejtwg muaj cuabkav cheem tau tsis pub nws ua raws li nws lub siab nyiam.” (Daniyees 4:30, 33-35) Tom qab Daniyees raug sim thiab tau cawm hauv lub qhov tsov ntxhuav los lawm, Vaj Ntxwv Dali-us thiaj li tshaj tawm tias: “Txhua tus pejxeem uas kuv kav yuav tsum hwm thiab saib taus Daniyees tus Vajtswv. ‘Nws yog tus Vajtswv uas muaj sia nyob, thiab nws yuav kav mus ibtxhis. Nws lub tebchaws yuav tsis raug kev puastsuaj, thiab nws yuav muaj hwjchim nyob mus ibtxhis li.’”​—Daniyees 6:7-10, 19-22, 26, 27.

¹⁵ Tus sau phau ntawv nkauj xam pom li no tias: “[Yehauvas] muab txhua haivneeg tej kev npaj siab rhuav huv tibsi lawm, nws ua rau lawv tso lawv tej kev npaj siab povtseg. Haivneeg uas muaj [Yehauvas] ua lawv tus [Vajtswv] muaj kev kaj siab, cov neeg uas nws xaiv ua nws tug lawm, lawv tau zoo nyob kaj siab lug.” (Phau Ntawv Nkauj 33:10, 12) Yog li ntawd, cia peb nco ntsoov tuav rawv peb txoj kev ntseeg rau Yehauvas.

16. Thaum lub sij hawm “muaj kev txom nyem loj kawg nkaus,” peb tso siab tau li cas thiab vim li cas? (Saib daim duab.)

¹⁶ Peb yeej tau nyeem txog tej uas Yehauvas tau ua yav tag los lawm. Peb tso siab tau tias yav tom hauv ntej no Yehauvas yuav cawm nws cov tib neeg thaum “muaj kev txom nyem loj  kawg nkaus.” (Mathais 24:21; Daniyees 12:1) Ib tsoom teb chaws uas yog Nkos hauv teb chaws Mankos yuav sib koom siab tawm tsam Yehauvas cov tib neeg. Txawm tias lub koom haum ntiaj teb UN (United Nations) muaj li 193 lub teb chaws sib koom los yeej yuav kov tsis yeej Yehauvas thiab nws cov tub txib saum ntuj ceeb tsheej. Yehauvas cog lus hais tias: “Kuv ua li ntawd yog qhia rau lwm haivneeg paub hais tias kuv yog tus muaj hwjchim loj thiab yog tus uas dawbhuv. Lawv thiaj yuav paub hais tias kuv yog [Yehauvas].”​—Exekees 38:14-16, 23; Phau Ntawv Nkauj 46:10.

17. Nyob rau hauv phau Vajlugkub hais tias yav tom hauv ntej yuav muaj li cas rau tej nom tswv thiab cov uas tuav rawv lawv txoj kev ntseeg rau Yehauvas?

¹⁷ Nkos yuav tawm tsam Yehauvas cov tib neeg ces yuav muaj ntsuj rog zaum kawg uas yog Amankedoos. Yehauvas yuav rhuav tshem “txhua tus vajntxwv uas nyob hauv ntiajteb.” (Tshwmsim 16:14, 16; 19:19-21) Tom qab ntawd, tsuas tshuav “cov neeg ncaj ncees thiab ua zoo” thiab cov uas tuav rawv lawv txoj kev ntseeg lawm xwb.​—Pajlug 2:21.

18. Muaj coob leej ntau tus ntseeg yeem ua dab tsi thiab vim li cas? (Daniyees 3:28)

¹⁸ Tau ntau ntau pua xyoo tag los, muaj coob leej ntau tus ntseeg yeem tso ib puas tsav yam tseg tshuav tau ntseeg Yehauvas. Cov ntseeg no yeej tuav rawv lawv txoj kev ntseeg ib yam nkaus li thaum ub peb tug tub hluas Henplais tau raug muab pov rau hauv lub cub tawg. Vim cov hluas no tuav rawv lawv txoj kev ntseeg, Yehauvas thiaj cawm lawv tawm ntawm lub cub tawg.​—Nyeem Daniyees 3:28.

19. Yehauvas yuav txiav txim li cas rau nws cov tib neeg thiab peb yuav tau ua li cas tam sim no?

¹⁹ Daviv tau sau hais tias qhov uas peb tuav rawv txoj kev ntseeg rau Yehauvas tseem ceeb heev. Nws hais tias: “[Yehauvas], koj yog tus uas txiav txim rau noob neej. Thov koj cia li txiav txim ncaj ncees rau kuv, rau qhov koj paub hais tias kuv tsis tau ua txhaum dabtsi.” (Phau Ntawv Nkauj 7:8) Daviv sau txuas ntxiv tias: “Thov kom kuv tej haujlwm zoo thiab tej kev ncaj ncees tsomkwm kuv.” (Phau Ntawv Nkauj 25:21) Qhov uas zoo tshaj yog qhov uas peb yuav tau tuav rawv peb txoj kev ntseeg rau Yehauvas tab txawm yuav muaj ntau yam los txwv peb. Ces thaum ntawd peb yuav hais tau ib yam li tus sau phau ntawv nkauj tias: “Cov neeg uas lawv lub neej tsis muaj chaw thuam kuj tau nyob kaj siab lug, yog cov uas ua lub neej raws li [Yehauvas] txoj kevcai.”​—Phau Ntawv Nkauj 119:1.