1. Yehauvas kom cov niam cov txiv ua dabtsi?

YEHAUVAS tsim thawj thawj nkawm niam txiv kom nkawd paub ntshaw menyuam. Phau Vajlugkub hais tias: ‘Tej tub ki yog qub txeeg qub teg ntawm Yehauvas.’ (Phau Ntawv Nkauj 127:3, TT ) Qhov no txhais li cas? Piv xam tias koj ib tug phoojywg zoo muab tau ib pob nyiaj rau koj pab khaws cia. Tej zaum koj yuav zoo siab tias nws ntseeg thiab tso siab rau koj. Tiamsis koj yeej yuav txhawj tias yuav ua li cas pob nyiaj ntawd thiaj tsis ploj. Yehauvas yog peb tus Phoojywg zoo tshaj plaws, nws muab ib yam uas tseem ceeb tshaj nyiaj txiag rau cov niam cov txiv. Nws kom cov niam cov txiv saib xyuas thiab ua zoo tu lawv cov menyuam kom noj qab nyob zoo.

2. Peb yuav teb 2 lo lus nug twg?

² Leejtwg thiaj yog cov uas yuav txiav txim siab tias ob niam txiv yuav tsum muaj menyuam los tsis muaj thiab thaum twg mam muaj? Thiab cov niam cov txiv yuav ua li cas lawv cov menyuam thiaj noj qab nyob zoo? Cia peb kawm txog ib co ntsiab lus hauv phau Vajlugkub uas yuav pab cov niam txiv Khixatia txawj txiav txim siab zoo.

3. (1) Leejtwg thiaj yog cov uas yuav txiav txim siab tias ob niam txiv yuav muaj menyuam los tsis muaj? (2) Ob niam txiv tsev neeg thiab tej phoojywg yuav tsum nco ntsoov nqi Vajlugkub twg?

³ Muaj tej haiv neeg xav tias thaum ob niam txiv sib yuav lawm, nkawd yuav tsum muaj menyuam tsuag tsuag. Nkawd tsev neeg thiab lwm leej lwm tus yuav txhob kom nkawd kav tsij muaj  menyuam. Yethoos (Jethro) yog ib tug kwvtij nyob sab Axia hais tias: “Hauv lub koom txoos cov uas twb muaj menyuam lawd pheej txhob kom cov uas tsis muaj menyuam kav tsij muaj.” Ntsefili (Jeffrey) yog ib tug kwvtij uas nyob rau sab Axia kuj hais li no thiab: “Muaj ib txhia hais rau cov niam txiv tias yog lawv tsis muaj menyuam ces tsam lwm hnub lawv laus lawm yuav tsis muaj leejtwg tu lawv.” Txawm li ntawd los ob niam txiv yuav tsum txiav txim siab seb nkawd yuav muaj menyuam los tsis muaj. Qhov no nyob ntawm nkawd xwb. (Kalatias 6:5) Nkawd tsev neeg thiab tej phoojywg sawvdaws yeej xav kom nkawd muaj kev zoo siab. Tiamsis txhua tus yuav tsum nco ntsoov tias qhov uas nkawd yuav muaj menyuam los tsis muaj nyob ntawm nkawd ob niam txiv xwb.​—1 Thexalaunikes 4:11.

4, 5. (1) Ob niam txiv yuav tsum tham txog 2 yam twg? (2) Nkawd yuav sib tham li no thaum twg thiab vim li cas?

⁴ Ob niam txiv uas txiav txim siab tias nkawd xav muaj menyuam yuav tsum tham txog 2 yam no ua ntej: Yam 1, thaum twg nkawd mam muaj menyuam? Thiab yam 2, nkawd yuav muaj pes tsawg tus? Nkawd yuav sib tham li no thaum twg? Thiab vim li cas nkawd yuav tsum tau tham txog 2 yam no?

⁵ Muaj ib txhia mas lawv tham ua ntej lawv sib yuav saib lawv puas yuav muaj menyuam los tsis muaj. Vim li cas zoo rau lawv tham ua ntej lawv sib yuav? Rau qhov nkawd ob leeg yuav tsum xav ib yam nkaus tias nkawd yuav muaj menyuam los tsis muaj. Tsis tas li ntawd xwb, nkawd yuav tsum xyuas seb yog nkawd xav muaj menyuam no nkawd puas tau npaj txij. Ib txhia niam txiv tos xyoo puav tom qab nkawd sib yuav tso mam li muaj menyuam rau qhov nkawd paub tias ua niam ua txiv yuav siv sijhawm thiab siv dag siv zog ntau heev. Thiab nkawd xav kom nkawd sib swm thiab sib paub zoo ua ntej muaj menyuam.​—Efexus 5:33.

6. Vim peb nyob rau tiam uas muaj kev ntxhov siab heev, ib co niam txiv thiaj txiav txim siab li cas?

⁶ Muaj ib txhia Khixatia xyaum ua li Nau-es 3 txwg tub nyab. Ua ntej dej dag nyab ntiajteb 3 txwm niam txiv no tsis muaj menyuam li. (Chivkeeb 6:18; 9:18, 19; 10:1; 2 Petus 2:5) Yexus hais tias tiam peb nyob no “yuav zoo ib yam li tej uas tshwmsim rau tiam Nau-es nyob.” Thiab peb yeej paub tias peb nyob rau tiam uas “muaj kev ntxhov siab heev.” (Mathais 24:37; 2 Timautes 3:1) Twb yog vim li no, ib co niam txiv thiaj xav tias lawv yuav to ib ntu tso mam li muaj menyuam, lawv thiaj muaj sijhawm los ua Yehauvas tes haujlwm.

7. Cov ntsiab lus hauv Lukas 14:28, 29 thiab Pajlug 21:5 pab tau cov niam txiv li cas?

⁷ Muaj ib txhia ua li hais hauv Lukas 14:28, 29  thaum lawv txiav txim siab seb lawv yuav muaj menyuam los tsis muaj thiab yuav muaj pes tsawg tus. (Nyeem.) Zoo ib yam li ib tug uas yuav ua ib lub chaw tsom faj nws yuav tsum xyuas seb nws puas muaj nyiaj txaus ua ntej nws pib. Cov uas twb muaj menyuam lawd paub tias yuav siv nyiaj txiag, siv sijhawm, thiab siv dag siv zog ntau heev thiaj tu tau menyuam loj hlob. Yog li ntawd, cov niam txiv uas xav muaj menyuam yuav tsum ua zoo xav li no: ‘Wb ob leeg puas xav ib yam txog tej uas wb tsev neeg cheem tsum? Wb ob leeg puas yuav tsum tau mus ua haujlwm los yug wb tsev neeg? Yog wb ob leeg yuav tsum mus ua haujlwm leejtwg yuav zov wb cov menyuam? Wb xav kom lwm hnub wb cov menyuam loj lawv coj li leejtwg?’ Cov niam txiv uas ua zoo tham txog cov lus nug no ua li Pajlug 21:5 hais.​—Nyeem.

8. (1) Yuav nyuaj rau cov uas muaj menyuam ua dabtsi? (2) Tus txiv uas txawj xav yuav ua dabtsi?

⁸ Metub menyuam ntshaw niam ntshaw txiv. Yog li ntawd cov niam cov txiv yuav tsum siv sijhawm thiab dag zog los nrog lawv cov menyuam nyob. Tiamsis tsis yoojyim rau cov niam txiv uas muaj menyuam tuab tuab muab sijhawm los nrog txhua tus menyuam nyob. Ib co niam txiv uas muaj menyuam coob tus hais tias muaj tej zaum mas lawv tsis paub xyov yuav ua li cas li. Leej niam los yeej sab kawg nkaus. Ua rau nws lim lim tsis muaj siab kawm Vajlugkub, thov Vajtswv, lossis mus tshaj tawm. Thaum mus kev sib txoos los nws yuav tsis tau zoo mloog thiab kawm tsis tau ntau. Thaum menyuam xav tau niam thiab txiv, tus txiv uas txawj xav yuav los pab nws tus pojniam tsis hais tom tsev lossis tom kev sib txoos. Tej zaum leej txiv yuav tau pab nws tus pojniam ua haujlwm hauv vaj hauv tsev. Nws yuav tsum ua zoo npaj rau txhua txhua hmo tsev neeg pe hawm Vajtswv ua ke thiaj txhawb tau lawv txojkev ntseeg. Thiab nws yuav tsum nrog nws tsev neeg mus tshaj tawm txoj xov zoo ua ke.

9, 10. Cov niam cov txiv yuav tsum ua li cas lawv thiaj pab tau lawv cov menyuam?

⁹ Cov niam cov txiv yuav pab lawv cov menyuam kom paub hlub Yehauvas li cas? Lawv yuav tiv thaiv lawv cov menyuam ntawm tej kev phem hauv lub ntiajteb no li cas? Cia peb kawm seb cov niam cov txiv yuav tau ua li cas.

¹⁰ Thov Yehauvas pab. Saib seb Manau-as thiab nws tus pojniam nkawd ua li cas thaum nkawd muaj Xaxoos. Thaum Manau-as paub tias nkawd yuav tau ib tug tub, nws thov Yehauvas pab kom nkawd paub cob qhia nkawd tus menyuam.

11. Muaj ob niam txiv xyaum Manau-as tus qauv hauv Cov Thawjtswj 13:8 li cas?

¹¹ Ib nkawm niam txiv hu uas Niham (Nihad) thiab Alimas (Alma) uas nyob tebchaws Npau  Xinia thiab Hawxi Nkovina (Bosnia and Herzegovina) xyaum ua li Manau-as. Nkawd hais tias: “Ib yam li Manau-as, wb thov Yehauvas pab kom wb txawj ua zoo niam zoo txiv. Yehauvas siv phau Vajlugkub, tej ntaub ntawv Vajlugkub, tej kev sib txoos, thiab tej rooj sib txoos los pab wb ntau yam.”​—Nyeem Cov Thawjtswj 13:8.

12. Yauxej thiab Malis tso tau tus qauv zoo li cas rau nkawd cov menyuam xyaum?

¹² Ua qauv zoo rau menyuam xyaum. Koj hais koj cov menyuam qas txhiab qas pua zaus los tsis cuag li koj ua ib tug qauv zoo rau koj cov menyuam xyaum. Yauxej thiab Malis ua qauv zoo heev rau nkawd cov menyuam xyaum. Yexus los kuj xyaum nkawd tus qauv thiab. Yauxej khwv heev los yug nws tsev neeg thiab pab kom lawv nyiam teev tiam Yehauvas. (2 Kevcai 4:9, 10) Mauxes Txoj Kevcai tsis hais kom txhua tus txiv tsev coj tag nrho nws tsev neeg mus ua Kevcai Hla Dhau hauv Yeluxalees tiamsis Yauxej “niaj xyoo” coj nws tsev neeg mus. (Lukas 2:41, 42) Tej zaum muaj ib txhia txiv tsev xav tias yuav nyuaj heev yog lawv coj tag nrho lawv tsev neeg mus, tsis tas li ntawd yuav siv sijhawm ntev thiab siv nyiaj txiag ntau. Txawm li ntawd los Yauxej pom tias txojkev teev tiam Yehauvas tseem ceeb heev nws thiaj niaj xyoo coj nws cov menyuam mus thiab cob qhia lawv teev tiam Yehauvas ib yam li nws. Malis los kuj ua ib tug qauv zoo rau nws cov menyuam xyaum. Nws paub Vajtswv Txojlus zoo thiab cob qhia kom nws cov menyuam nyiam Vajtswv Txojlus.

13. Ib nkawm niam txiv xyaum ua li Yauxej thiab Malis nkawd tus qauv li cas?

¹³ Niham thiab nws tus pojniam uas peb tham tag los lawm xyaum ua li Yauxej thiab Malis nkawd tus qauv. Qhov no pab tau nkawd cob qhia nkawd tus tub los hlub thiab teev tiam Yehauvas li cas? Nkawd hais tias: “Wb ua wb lub neej kom wb tus tub pom tias ua neej raws li Yehauvas lub siab nyiam yeej zoo tshaj plaws.” Niham hais ntxiv tias: “Yog koj xav kom koj tus menyuam hlub Yehauvas koj yuav tsum hlub Yehauvas ua ntej.”

14. Ua cas cov niam cov txiv yuav tsum paub nkawd cov menyuam cov phoojywg?

¹⁴ Pab cov menyuam xaiv phoojywg zoo. Cov niam cov txiv yuav tsum paub tias nkawd cov menyuam cov phoojywg yog leejtwg thiab lawv ua dabtsi. Nkawd kuj yuav tsum paub tias cov menyuam nrog leejtwg tham hauv tej vej xaij ntaus phoojywg thiab hauv lawv lub xov tooj. Rau qhov menyuam cov phoojywg yuav cob tau lawv xav li lawv cov phoojywg xav thiab ua li lawv cov phoojywg ua.​—1 Kauleethaus 15:33.

15. Cov niam cov txiv xyaum tau Ntsexi tus qauv li cas?

¹⁵ Cov niam cov txiv yuav ua li cas yog lawv tsis paub kov tej koos pis tawj (computer) lossis tej twj ntawm tes? Ntsexi (Jessie) uas yog ib leej txiv nyob tebchaws Fis Liv Pis (Philippines) hais tias: “Wb tsis tshua paub siv tej twj koos pis tawj. Txawm li ntawd los wb yeej cob qhia wb cov menyuam kom lawv paub ceev faj thaum lawv siv.” Txawm Ntsexi tsis paub siv tej twj koos pis tawj los nws tsis txwv nws cov menyuam kom txhob siv. Nws hais tias: “Kuv txhawb kom kuv cov menyuam siv lawv tej twj ntawm tes los kawm lwm yam lus, kawm tej ntaub ntawv Vajlugkub ua ntej mus kev sib txoos, thiab nyeem phau Vajlugkub txhua txhua hnub.” Yog koj muaj menyuam koj puas tau nrog lawv nyeem thiab tham txog tej zaj ntsig txog kev ntaus ntawv thiab tso duab hauv Is Taws Nej uas muaj nyob hauv jw.org^® lub ntsiab me “Cov Hluas”? Koj puas tau nrog lawv saib thiab tham txog zaj yeeb yaj kiab Tej Twj Ntawm Tes Puas Tswj Koj Lub Neej? thiab zaj hu ua Ceev Faj Thaum Siv Tej Vej Xaij Ntaus Phoojywg? * Tej no yuav pab tau koj heev thaum koj qhia koj cov menyuam kom txawj siv tej twj koos pis tawj.​—Pajlug 13:20.

16. Muaj ib txhia niam thiab txiv ua li cas xwb? Thiab ho pab tau lawv cov menyuam li cas?

 ¹⁶ Muaj ib txhia niam thiab txiv caw tej tug uas teev tiam Yehauvas thiab coj tau tus qauv zoo tuaj nrog lawv cov menyuam ua ke. Xws li Edenis (N’Déni) thiab nws tus pojniam hu ua Npaumis (Bomine) uas nyob tebchaws Khauj Devua (Côte d’Ivoire), nkawd nco ntsoov caw tus saib xyuas thaj tsam los so hauv nkawd tsev. Edenis hais tias: “Qhov no pab tau wb tus tub hlob heev kawg li. Nws ua ib tug tho kev thiab nimno nws yog ib tug pab tus saib xyuas thaj tsam.” Koj puas ua tau li no los pab koj cov menyuam thiab?

17, 18. Cov niam cov txiv yuav pib cob qhia lawv cov menyuam thaum twg?

¹⁷ Pib cob qhia menyuam thaum lawv tseem yau. Yog cov niam cov txiv pib cob qhia lawv cov menyuam kom ntxov los hajyam zoo xwb. (Pajlug 22:6) Xav txog Timautes, nws niam hu ua Enikes thiab nws niam tais hu ua Lau-is. Nkawd cob qhia Timautes “txij thaum [nws] tseem yau” los. (2 Timautes 1:5; 3:15) Thaum Timautes loj lawm, Paulus thiaj coj nws nrog Paulus mus tshaj tawm ua ke.

¹⁸ Muaj dua ob niam txiv uas nyob tebchaws Khauj Devua uas cob qhia nkawd 6 tus menyuam hlub thiab teev tiam Yehauvas. Nkawd cob qhia nkawd cov menyuam li cas? Nkawd xyaum Timautes niam thiab niam tais tus qauv. Ob niam txiv ntawd hais tias: “Thaum nyuam qhuav yug tau xwb wb twb pib qhia wb cov menyuam txog Vajtswv Txojlus lawm.”​—2 Kevcai 6:6, 7.

19. Cov niam cov txiv yuav qhia Vajtswv Txojlus rau lawv cov menyuam li cas?

¹⁹ Hauv 2 Kevcai 6:7 qhia tias cov niam cov txiv yuav qhia Vajtswv Txojlus rau lawv cov menyuam li cas. Lawv yuav tsum “niaj hnub hais txog” Vajtswv Txojlus, hais tag los hais dua thiab rau lawv cov menyuam. Yog li no, cov niam cov txiv yuav tsum siv sijhawm los nrog lawv cov menyuam nyob. Tej thaud cov niam cov txiv yuav laj laj hais yog lawv pheej niaj hnub hais qhov qub xwb. Tiamsis cov niam cov txiv yuav tsum siv lub sijhawm no los pab lawv cov menyuam kom to taub Vajtswv Txojlus thiab paub muab los siv hauv lawv lub neej.

20. Piav seb Phau Ntawv Nkauj 127:4 pab tau cov niam cov txiv cob qhia lawv cov menyuam li cas.

²⁰ Paub neb cov menyuam kom zoo. Phau Ntawv Nkauj 127 muab cov menyuam piv rau cov xib xub. (Nyeem Phau Ntawv Nkauj 127:4.) Ib yam li cov xib xub, yeej tsis muaj ob  tug menyuam uas zoo ib yam nkaus. Yog li ntawd cov niam cov txiv yuav cob qhia lawv cov menyuam ib yam nkaus tsis tau. Ib nkawm niam txiv hauv tebchaws Yixalayees niaj hnub nimno cob qhia tau nkawd 2 tug menyuam los teev tiam Yehauvas. Nkawd hais tias: “Wb ib leeg qhia Vajlugkub rau ib tug.” Tiamsis txhua tus txiv tsev yuav tsum txiav txim siab seb kawm Vajlugkub li no puas yuav pab tau nkawd cov menyuam lossis nkawd puas yuav kawm tau Vajlugkub li no nrog nkawd cov menyuam tiag.

21. Yehauvas yuav pab cov niam cov txiv li cas?

²¹ Muaj tej thaud cov niam cov txiv xav tias tsis yoojyim rau lawv cob qhia lawv cov menyuam kiag li. Tiamsis nco ntsoov tias menyuam yog koob hmoov los ntawm Vajtswv Yehauvas los. Yehauvas yeej yuav pab cov niam cov txiv. Nws yuav mloog lawv tej lus thov thiab siv phau Vajlugkub, tej ntaub ntawv Vajlugkub, thiab tej qauv zoo ntawm cov niam cov txiv uas txawj cob qhia lawv cov menyuam hauv lub koom txoos los teb lawv tej lus thov.

22. Tej uas zoo tshaj plaws uas cov ua niam ua txiv muab tau rau lawv cov menyuam yog dabtsi?

²² Ib txhia neeg hais tias yuav siv li 20 xyoo thiaj tu tau ib tug menyuam loj hlob. Txawm cov menyuam twb laus lawm los lawv niam thiab lawv txiv yeej tseem txhawj txog lawv. Tej uas zoo tshaj plaws uas cov ua niam ua txiv muab tau rau lawv cov menyuam yog lawv txojkev hlub, lawv cov sijhawm thiab tej kev cob qhia los ntawm Vajtswv Txojlus. Cov menyuam yuav kawm tsis tau ib yam nkaus. Txawm li ntawd los cov menyuam uas lawv niam lawv txiv hlub Yehauvas yeej xav ib yam li ib tug muam hu ua Ntsau-anas Mes (Joanna Mae) uas nyob sab Axia hais: “Thaum kuv xav txog tej uas kuv niam kuv txiv cob qhia kuv, ua rau kuv ris nkawd txiaj ntsim kawg li uas nkawd qhuab qhia thiab cob kom kuv hlub Yehauvas. Tsis yog nkawd yug tau kuv los xwb, tiamsis nkawd tseem muab lub neej zoo tshaj plaws rau kuv.” (Pajlug 23:24, 25) Peb cov kwvtij nkauj muam thoob qab ntuj los xav ib yam li ntawd thiab.