MUAJ IB HNUB ob tug ntxhais hluas taug kev ua ke hauv Npankiyaus Xiti tebchaws Fis Liv Pis (Baguio City, Philippines). Nkawd pom cov Timkhawv teeb laub. Tus muam Heleem (Helen) sawv ntawm lub laub ib sab luag ntxhi rau nkawd. Txawm nkawd tsis nrog lawv tham los nkawd nco ntsoov Heleem lub ntsej muag luag ntxhi.

Thaum nkawd caij npav (bus) mus tsev nkawd pom ib lub Tsev Nceeg Vaj muaj daim paib jw.org. Nkawd nco tias nkawd twb pom cov npe ntawv ntawm lub laub uas cov Timkhawv teeb. Nkawd thiaj nqis npav mus rau ntawm lub Tsev Nceeg Vaj thiab xyuas seb lawv muaj kev sib txoos thaum twg.

Thaum nkawd mus kev sib txoos thawj zaug nkawd txawm pom Heleem hauv lub Tsev Nceeg Vaj. Nkawd nco dheev tias nws yog tus uas luag ntxhi rau nkawd. Heleem hais tias: “Thaum kuv pom nkawd los rau ntawm kuv, kuv cav ntshai tias nyab tsam kuv ua dabtsi txhaum nkawd lawm.” Tiamsis nkawd qhia Heleem tias nkawd pom nws sawv ntawm lub laub luag ntxhi.

Nkawd nyiam txojkev sib txoos thiab nyiam cov kwvtij nkauj muam uas nkawd ntsib hnub ntawd kawg li. Thaum nkawd pom lawv tu lub Tsev Nceeg Vaj los nkawd kuj xav pab thiab. Nimno ib tug ntxhais hluas ntawd tsis nyob Fis Liv Pis teb lawm tiamsis tus uas tseem nyob pib mus kev sib txoos thiab kawm Vajlugkub. Tos muaj li no los twb vim yog muaj ib tug luag ntxhi xwb!