1. Tej uas tus txiv tsev coj nrog nws tsev neeg nws kawm qhov twg los?

TUS txiv tsev yuav tsum coj zoo li cas nrog nws tsev neeg? Muaj ib txhia coj li lawv poj koob yawm txwv lossis li lawv tej neeg nruab zej nruab zos ib txwm coj. Tus muam Yanita nyob sab Yus Luv hais tias: “Thaj tsam uas peb nyob, lawv saib pojniam li tus qhev xwb.” Hos ib tug kwvtij hu ua Luj (Luke) nyob Mekas teb hais tias: “Ib txhia txivneej qhia lawv cov tub tias lus pojniam tsis tseem ceeb tsis tas mloog lawv.” Tiamsis Yehauvas tsis xav kom cov txiv tsev coj li ntawd. (Muab piv rau Malakaus 7:13.) Yog li ntawd, tus txiv yuav ua li cas nws thiaj ua tau ib tug txiv tsev zoo?

2. Tus txiv tsev yuav tsum paub txog dabtsi thiab yog vim li cas?

² Yuav kom tus txiv ua tau ib tug txiv tsev zoo nws yuav tsum paub seb Yehauvas xav kom nws ua dabtsi. Nws yuav tsum to taub tias vim li cas Yehauvas thiaj tsa ib co los saib xyuas lwm tus. Thiab nws yuav kawm tau li cas los ntawm Yehauvas thiab Yexus. Vim li cas nws yuav tsum paub li ntawd? Rau qhov Yehauvas yog tus tsa cov txiv los saib xyuas lawv tsev neeg. Yog li ntawd lawv yuav tsum saib xyuas lawv tsev neeg kom zoo.​—Lukas 12:48.

3. Ib Kauleethaus 11:3 qhia li cas rau peb txog Yehauvas tsev neeg?

³ Nyeem 1 Kauleethaus 11:3. Nqi no qhia rau peb tias Yehauvas coj nws tsev neeg uas nyob saum ntuj thiab hauv ntiajteb no li cas. Yehauvas yog tus kav ib puas tsav yam tiamsis nws kuj tsa ib co los ua cov saib xyuas nws tsev neeg thiab coj lawv. Lawv yuav tsum ua lawv tes haujlwm  kom zoo vim Yehauvas saib ntsoov lawv. (Loos 14:10; Efexus 3:14, 15) Yehauvas tsa Yexus ua tus saib xyuas lub koom txoos. Tiamsis Yexus yuav tsum saib xyuas lawv li Yehauvas lub siab nyiam. (1 Kauleethaus 15:27) Yehauvas kuj tsa tus txiv los saib xyuas nws tus pojniam thiab nws cov menyuam tiamsis yog tus txiv tsis saib xyuas lawv zoo ces Yehauvas thiab Yexus nkawd yuav tsis txaus siab rau nws.​—1 Petus 3:7.

4. Yehauvas thiab Yexus muaj cai ua dabtsi?

⁴ Yehauvas yog tus kav ib puas tsav yam. Yog li ntawd, nws yeej muaj cai rhawv kevcai rau nws tsev neeg coj. (Yaxayas 33:22) Yexus yog tus saib xyuas lub koom txoos ces nws kuj rhawv tau kevcai rau peb coj thiab.​—Kalatias 6:2; Kaulauxais 1:18-20.

5. Tus txiv tsev muaj cai ua dabtsi xwb?

⁵ Ib yam li Yehauvas thiab Yexus nkawd, tus txiv muaj cai tswjhwm nws tsev neeg. (Loos 7:2; Efexus 6:4) Tiamsis nws yuav tsum ua raws li Yehauvas txojcai hauv phau Vajlugkub xwb. (Pajlug 3:5, 6) Thiab nws tsis muaj cai tswjhwm lwm tus uas tsis yog nws tsev neeg. (Loos 14:4) Txawm yog nws tus tub thiab tus ntxhais kiag los thaum lawv mus nyob lawv lawm ces lawv tsis nyob hauv nws qab kev tswjhwm lawm tiamsis lawv yeej tseem hwm nws.​—Mathais 19:5.

6. Vim li cas Yehauvas thiaj tsa ib co los saib xyuas thiab coj nws tsev neeg?

⁶ Yehauvas tsa ib co ua cov coj nws tsev neeg vim nws hlub lawv thiab xav kom lawv muaj kev thaj yeeb. (1 Kauleethaus 14:33, 40) Yog tsis muaj ib tug coj lawv es nyias ua raws li nyias lub siab nyiam xwb ces lawv yuav tsis muaj kev thaj yeeb. Muab piv txwv li no, yog lawv tsis paub hais tias leejtwg yog tus coj lawv thiab yog tus ntaus thawj ces lawv yuav tsis paub ua dabtsi.

7. Raws li Efexus 5:25, 28, Yehauvas puas xav kom cov txiv ua nruj ua tsiv rau lawv tus pojniam?

⁷ Yog hais tias qhov uas Vajtswv cia tus txiv ua tus coj ntawm nws lub cuab lub yig zoo ua luaj, ua cas ho muaj cov pojniam coob tus hais tias lawv tus txiv tsis hlub lawv? Tos muaj li ntawd los yog vim hais tias coob tus txivneej ua li lawv lub siab nyiam thiab ua li tej kwvtij zej zog ua xwb. Lawv tsis ua raws li Vajtswv tej kevcai, lawv thiaj ua nruj ua tsiv rau lawv tus pojniam. Lawv xav hais tias lawv ua li ntawd ces lawv tus pojniam yuav saib taus lawv thiab tebchaws yuav qhuas tias lawv yog txivneej yawg. Cov txivneej uas zoo li no, tej zaum yuav xav tias lawv yuam tsis tau kom lawv tus pojniam hlub lawv tiamsis lawv yeej ua tau kom lawv tus pojniam nyoo lawv. * Cov txivneej uas ua li no, lawv ua tsis yog thiab tsis ua li Vajtswv hais.​—Nyeem Efexus 5:25, 28.

8. Tus txiv yuav ua li cas nws thiaj ua tau ib tug txiv tsev zoo?

⁸ Tus txiv yuav ua tau ib tug txiv tsev zoo yog nws xyaum coj li Yehauvas thiab Yexus nkawd. Muaj 2 yam uas tus txiv tsev yuav kawm tau los ntawm Yehauvas thiab Yexus seb nws yuav coj li cas nrog nws tus pojniam thiab cov menyuam.

9. Ua cas peb thiaj paub hais tias Yehauvas txo hwjchim?

⁹ Yehauvas txo hwjchim. Yehauvas yog tus ntse tshaj los nws tseem mloog seb nws cov tub qhe xav li cas. (Chivkeeb 18:23, 24, 32;  1 Vajntxwv 22:19-22) Txawm Yehauvas zoo tiav log los nws tsis kom peb ua tau ib yam li nws. Nws tseem pab kom peb teev tiam tau nws li nws lub siab nyiam thiab. (Phau Ntawv Nkauj 113:6, 7) Phau Vajlugkub thiaj hais tias: “Vajtswv yog tus uas pab” nws cov neeg. (Phau Ntawv Nkauj 27:9; Henplais 13:6) Vajntxwv Daviv hais tias tos nws ua tau tej haujlwm Yehauvas muab rau nws ua tiav los twb yog Yehauvas txo hwjchim thiab pab nws.​—2 Xamuyees 22:36.

10. Ua cas peb thiaj paub hais tias Yexus txo hwjchim?

¹⁰ Cia peb xav txog Yexus. Txawm nws yog tus Tswv ntawm nws cov thwjtim los nws tseem ntxuav lawv kotaw. Yehauvas muab cov lus no sau cia rau hauv phau Vajlugkub vim nws xav kom cov txiv tsev thiab cov txivneej uas nws tsa los ua cov coj thiab saib xyuas nws cov neeg xyaum Yexus tus qauv. Yexus hais tias: “Kuv ua qauv li no qhia rau nej kom nej xyaum ua raws li kuv ua rau nej lawm.” (Yauhas 13:12-17) Txawm hais tias Yexus muaj hwjchim kawg los nws tsis kom lwm tus tiam nws tiamsis nws yog tus uas tiam lawv.​—Mathais 20:28.

11. Tus txiv tsev yuav xyaum Yehauvas thiab Yexus nkawd li cas?

¹¹ Peb kawm tau li cas? Peb kawm tau tias tus txiv tsev yuav tsum txo hwjchim. Muab piv txwv li no, tus txiv tsev yuav tsis kom nws tus pojniam thiab cov menyuam ua tau li nws lub siab xav tas mus li xwb. Thaum lawv tsis pom zoo li nws los nws yeej mloog lawv thiab nug seb lawv xav li cas. Malis (Marley) uas nyob Mekas teb hais tias: “Muaj tej thaud kuv thiab kuv tus txiv wb yeej tsis xav ib yam nkaus tiamsis kuv yeej paub tias nws hlub kuv thiab saib taus kuv rau qhov nws yeej nug kuv seb kuv xav li cas ua ntej nws ua ib yam dabtsi.” Tsis tas li ntawd xwb, tus txiv tsev uas txo hwjchim yeej tsis ntshai ua tej haujlwm uas tej neeg zej zog xav hais tias yog haujlwm pojniam. Qhov nov yeej tsis yoojyim. Tus muam Lachee (Rachel) hais tias: “Nyob peb tebchaws mas yog cov txheeb ze thiab tej neeg zej zog pom tus txiv ntxuav tais diav thiab tu vaj tu tsev mas luag yeej hais tias nws ua tsis taus txiv.” Yog cov neeg  nyob koj thaj tsam coj tus cwj pwm zoo li ntawd, nco ntsoov hais tias Yexus twb ntxuav nws cov thwjtim kotaw txawm sawvdaws xav tias tsuas yog tus qhev xwb thiaj ntxuav luag kotaw. Tus zoo txiv tsev yuav tsis tsa hwjchim thiab ua kom luag qhuas nws xwb, tiamsis nws yuav txhawj txog nws tsev neeg seb nws yuav ua li cas lawv thiaj muaj kev zoo siab.

12. Vim Yehauvas thiab Yexus nkawd hlub peb nkawd ua dabtsi?

¹² Txhua yam uas Yehauvas ua rau peb twb yog vim nws hlub peb. (1 Yauhas 4:7, 8) Nws muab nws Txojlus thiab lub koom haum los cob qhia peb, peb thiaj paub hais tias nws hlub peb tiag. Yehauvas kuj “pub txhua yam rau peb kom peb muaj kev zoo siab.” (1 Timautes 6:17) Thaum peb ua yuam kev, nws qhuab ntuas peb vim nws hlub peb. Nws yeej hlub peb kawg, nws thiaj xa nws Leej Tub los tuag theej peb lub txhoj. Yexus los yeej hlub peb kawg, nws thiaj zoo siab hlo los tuag theej peb lub txhoj. (Yauhas 3:16; 15:13) Yeej tsis muaj ib yam dabtsi uas yuav cais tau nkawd txojkev hlub rau peb.​—Yauhas 13:1; Loos 8:35, 38, 39.

13. Vim li cas thiaj tseem ceeb rau tus txiv tsev hlub nws tsev neeg? (Saib lub ntsiab me “ Tus Txivneej Uas Nyuam Qhuav Yuav Pojniam Yuav Ua Li Cas Nws Tus Pojniam Thiaj Hwm Nws?”)

¹³ Peb kawm tau li cas? Peb kawm tau tias txhua tus txiv tsev yuav tsum hlub nws tsev neeg. Vim li cas thiaj tseem ceeb rau nws ua li ntawd? Tus tubtxib Yauhas hais tias: “Yog nws twb tsis hlub nws kwv nws tij [lossis tsev neeg] tus uas nws qhovmuag pom, nws yuav ua li cas hlub Vajtswv tus uas nws qhovmuag tsis pom.” (1 Yauhas 4:11, 20) Tus txiv tsev uas hlub nws tsev neeg thiab xav xyaum ua li Yehauvas thiab Yexus nkawd yuav tsum pab nws tsev neeg kom muaj kev sib raug zoo nrog Yehauvas, pab kom lawv tsis txhob txhawj txog dabtsi, thiab mus khwv los yug nws tsev neeg. (1 Timautes 5:8) Tus txiv tsev yuav tsum qhuab qhia nws cov menyuam thiab tej nws ua yuav tsum zoo rau nws tsev neeg thiab qhia tias nws hwm Yehauvas. Cia peb kawm seb tus  txiv tsev yuav xyaum Yehauvas thiab Yexus nkawd li cas.

14. Tus txiv tsev yuav ua li cas nws tsev neeg thiaj muaj kev sib raug zoo nrog Yehauvas?

¹⁴ Tus txiv tsev yuav tsum pab nws tsev neeg kom muaj kev sib raug zoo nrog Vajtswv. Yexus ua ib yam li nws txiv, nws pab nws cov thwjtim kom lawv txojkev ntseeg ruaj khov. (Mathais 5:6; Malakaus 6:34) Ib yam li ntawd, tus txiv tsev lub luag haujlwm uas tseem ceeb tshaj yog pab nws tsev neeg kom muaj kev sib raug zoo nrog Yehauvas. (2 Kevcai 6:6-9) Yog li ntawd, nws yuav tsum pab kom lawv rau siab ntso kawm Vajtswv Txojlus, mus kev sib txoos, thiab mus tshaj tawm.

15. Tus txiv tsev yuav ua li cas nws tsev neeg thiaj paub hais tias nws hlub lawv?

¹⁵ Pab kom nws tsev neeg tsis txhob txhawj txog dabtsi. Yehauvas qhia tias nws hlub Yexus tab meeg sawvdaws. (Mathais 3:17) Yexus los kuj ua ib yam li Yehauvas thiab, tej nws hais thiab tej nws ua puav leej qhia tias nws hlub nws cov thwjtim. Yexus cov thwjtim los kuj qhia tias lawv hlub nws. (Yauhas 15:9, 12, 13; 21:16) Tus txiv tsev uas hlub nws tus pojniam thiab cov menyuam yuav nco ntsoov kawm Vajlugkub nrog lawv thiab qhia lawv tias nws hlub lawv thiab lawv muaj nuj nqis heev rau nws. Thaum tsim nyog qhuas los kuj qhuas lawv rau lwm tus thiab.​—Pajlug 31:28, 29.

16. Tus txiv tsev yuav tau ua li cas ntxiv thiab?

¹⁶ Tus txiv tsev yuav tsum khwv los yug nws tsev neeg. Thaum cov Yixalayees tsis mloog Yehauvas lus los nws yeej tsom kwm lawv thiab tsis pub lawv tu ncua ib yam dabtsi li. (2 Kevcai 2:7; 29:5) Niaj hnub nimno los Yehauvas yeej ua ib yam li ntawd rau peb thiab. (Mathais 6:31-33; 7:11) Yexus los kuj zoo ib yam li nws txiv, nws tsis pub cov uas nrog nws tshaib plab thiab nws kho cov uas muaj mob muaj nkeeg. (Mathais 4:24; 14:17-20) Tus txiv tsev uas ua haum Yehauvas siab yuav tsum mus khwv los yug nws tsev neeg. Tiamsis nws yuav tsum tsis txhob muab tag nrho nws lub sijhawm mus khwv noj khwv haus xwb es nws tsis muaj sijhawm los kawm Vajlugkub nrog nws tsev neeg thiab pab kom lawv muaj kev zoo siab.

17. Yehauvas thiab Yexus nkawd qhuab qhia thiab qhuab ntuas peb li cas?

¹⁷ Tus txiv tsev yuav tsum cob qhia nws cov menyuam. Yehauvas qhuab qhia thiab qhuab ntuas peb vim nws xav pab peb. (Henplais 12:7-9) Yexus los zoo ib yam li Yehauvas, nws ua tib zoo qhia nws cov thwjtim. (Yauhas 15:14, 15) Muaj tej thaud, Yexus yeej ntuas lawv tiamsis nws ua zoo hais lawv xwb. Nws tsis ua kub ua heev. (Mathais 20:24-28) Yexus paub zoo tias peb yog neeg zoo tsis tiav ces muaj  tej thaud peb yuav ua yuam kev.​—Mathais 26:41.

18. Tus txiv tsev uas zoo paub li cas txog nws pojniam tub se?

¹⁸ Tus txiv tsev uas xyaum ua li Yehauvas thiab Yexus nkawd paub tias nws tus pojniam thiab cov menyuam yuav ua tsis tau li nws lub siab xav tas mus li. Yog li ntawd, nws yuav tsis “ua nruj ua tsiv” rau nws pojniam tub se. (Kaulauxais 3:19, TT ) Tiamsis nws yuav “ua tib zoo ntuas” lawv li Kalatias 6:1 hais vim rau qhov nws paub hais tias nws los yeej zoo tsis tiav thiab. Nws yuav ua ib yam li Yexus es ua tus qauv zoo rau lawv xyaum.​—1 Petus 2:21.

19-20. Tus txiv tsev yuav xyaum Yehauvas thiab Yexus nkawd li cas thaum nws txiav txim siab yuav ua ib yam dabtsi?

¹⁹ Tus txiv tsev yuav tsum ua tej uas zoo rau nws tsev neeg xwb. Yehauvas ua li ntawd. Xws li thaum Yehauvas tsim tibneeg, nws tsis yog ua kom zoo rau nws xwb tiamsis yog vim nws xav kom peb muaj kev zoo siab. Yeej tsis muaj leejtwg hais Yehauvas kom nws muab nws tus Tub los tuag theej peb lub txhoj, tiamsis nws ua li ntawd vim nws hlub thiab xav pab peb. Yexus los kuj ua li ntawd thiab. (Loos 15:3) Thaum Yexus sab sab heev los nws tsis mus so tiamsis nws yeem nyob qhia ib pab neeg coob coob.​—Malakaus 6:31-34.

²⁰ Tus txiv tsev uas zoo paub tias ib qho uas nyuaj tshaj plaws rau nws yog qhov uas yuav tsum paub txiav txim siab zoo rau nws tsev neeg. Thiab qhov ntawd yog qhov uas tseem ceeb dua ntais rau nws. Nws tsis lam tau lam ua ib yam uas nws tsis tau muab coj los xav zoo zoo ua ntej tso. (Pajlug 2:6, 7) Nws ua raws nraim li Yehauvas hais rau qhov nws xav ua zoo rau nws tsev neeg, tsis yog ua zoo rau nws tus kheej xwb.​—Filipis 2:4.

21. Zaj tom ntej peb yuav tham txog dabtsi?

²¹ Lub luag haujlwm Yehauvas muab rau tus txiv tsev ua yeej tsis yooj yim tiamsis Yehauvas yeej xav kom nws ua zoo li zoo taus. Yog nws xyaum Yehauvas thiab Yexus nkawd ces nws yeej yuav ua tau ib tug txiv tsev zoo. Thiab yog tus pojniam ua nws lub luag haujlwm li Yehauvas hais ces nkawd tsev neeg yuav muaj kev zoo siab xwb. Tus pojniam yuav saib nws tus txiv zoo li cas xwb? Thiab yuav tsis yoojyim rau nws li cas? Zaj tom ntej yuav teb 2 lo lus nug no.