1-2. (1) Vim li cas niaj hnub niam no ib txhia ho tsis tso siab rau lawv tej thawj coj? (2) Nyob hauv zaj kawm no, peb yuav piav txog dabtsi?

 NIAJ HNUB niam no tibneeg tso siab tsis tau rau lawv tej thawj coj vim hais tias tej thawj coj xam pom cov muaj xwb, tsis xam pom cov pluag. Phau Vajlugkub yeej tau qhia tseeb tseeb lawm tias “ib txhia muaj hwjchim thiab ib txhia raug txomnyem vim kev tswjhwm ntawm cov neeg muaj hwjchim.” (Tej Lus Qhia 8:9) Ntxiv ntawd, muaj ib co thawj coj hauv tej kev ntseeg coj tsis zoo. Yog li ntawd, tibneeg thiaj li tsis tso siab rau Vajtswv ntxiv lawm.

² Nco ntsoov thaum peb mus qhia Vajlugkub rau ib tug twg, peb yuav tsum pab kom tau nws tso siab rau Yehauvas thiab cov Yehauvas tsa los saib xyuas nws lub koom haum. Yog li ntawd, tsis hais peb cov uas twb tau teev tiam Yehauvas tau ntev loo lawm lossis cov uas nyuam qhuav pib kawm Vajlugkub yuav tau tso siab rau Yehauvas, thiab cov uas nws tsa los coj nws lub koom haum. Tej zaud yuav muaj qho lub sijhawm peb yeej yuav raug sim seb peb puas tso siab rau Yehauvas. Nyob rau hauv zaj kawm no, peb yuav mus piav 3 lub ntsiab seb peb txojkev ntseeg raug sim li cas: (1) Thaum peb nyeem ib nqe Vajlugkub twg, (2) thaum cov Yehauvas tsa los coj peb hais li cas peb puas ua li ntawd, thiab (3) tej kev sim siab peb yuav raug yav pem suab.

3. Muaj tej nqe Vajlugkub twg ho sim seb peb puas tso siab rau Yehauvas?

 ³ Thaum peb nyeem Vajtswv Txojlus, peb puas xav rau hauv nruab siab tias vim li cas Vajtswv Yehauvas ho coj li no rau tus no es ho coj li tod rau tus tod? Xws li, nyob rau hauv Teev Npe, peb nyeem tias Yehauvas rau lub txim tuag rau ib tug Yixalayees  uas mus khaws taws rau hnub Xanpataus. Hos nyob hauv 2 Xamuyees, peb pom tau hais tias ntau pua xyoo tom qab no, Yehauvas kuj zam Vajntxwv Daviv thaum nws mus deev luag poj luag sev thiab ho muab ib tug tua. (Teev Npe 15:32, 35; 2 Xamuyees 12:9, 13) Ntshe peb yuav xav mus xav los tias, ‘Vim li cas Yehauvas ho zam txim rau Daviv thaum nws mus deev luag poj luag sev thiab muab lwm tus tua? Hos tus txivneej Yixalayees no lub txim twb tsis loj ua luaj twg, ua cas nws ho raug lub txim tuag?’ Yuav kom peb nkag siab zoo txog tej no, nco ntsoov 3 yam yuav hais tuaj no rau hauv nruab siab thaum peb nyeem Vajtswv Txojlus.

4. Raws li Chivkeeb 18:20, 21 thiab 2 Kevcai 10:17, txhawb li cas kom peb tso siab rau Yehauvas?

⁴ Nyob hauv Vajtswv Txojlus yeej piav tsis txhij tsis txhua seb muaj li cas tiag. Xws li, peb pom tau tias Daviv thov Yehauvas tawm plaws hauv nws nruab siab tuaj kom Yehauvas zam nws lub txim. (Phau Ntawv Nkauj 51:2-4) Tiamsis ua li tus txivneej Yixalayees ntawd ne, nws ho tsis mloog txojcai Xanpataus pes tsawg zaus lawm? Ua li, nws puas lees nws lub txim txhaum? Yav tas los nws tsis mloog Yehauvas tej kevcai pes tsawg zaus lawm? Txawm hais tias luag twb ceeb toom nws npaum li cas los, nws puas mloog? Phau Vajlugkub qhia tsis txhij tsis txhua. Yog li ntawd, peb paub tsis tshab txhua yam tiamsis nco ntsoov tias Yehauvas yeej ua txhua yam “ncaj ncees.” (2 Kevcai 32:4) Nws tej kev txiav txim siab yeej muaj puav pheej. Nws tsis mloog luag tej lus paj paws, lus ntxub ntxaug, lossis ib yam twg uas yuav ua rau nws xav tsis zoo txog tus ntawd. (Nyeem Chivkeeb 18:20, 21; 2 Kevcai 10:17.) Yog peb yim kawm Yehauvas thiab nws tej kab lig kevcai, peb yuav yimhuab tso siab rau nws. Txawm hais tias muaj qho nqe Vajlugkub ua rau peb xav tsis thoob, peb yeej tso siab tau tias “ib puas tsav yam uas [Yehauvas] ua puavleej ncaj ncees.”​—Phau Ntawv Nkauj 145:17.

5. Kev txaug kev txhaum ua rau peb txiav txim tsis ncaj ncees li cas? (Saib lub ntsiab “ Kev Txaug Kev Txhaum Ua Rau Peb Txiav Txim Tsis Ncaj Ncees.”)

⁵ Peb yog noob txaug neeg txhaum, feem ntau peb yuav txiav txim tsis tau zoo. Vajtswv tsim peb muaj Vajtswv tus yam ntxwv, peb thiaj xav kom txhua tus ntsib kev ncaj ncees. (Chivkeeb 1:26) Yog li ntawd, muaj qee zaug peb xav hais tias peb twb txiav txim tau zoo lawm, tiamsis peb ho txiav txim tsis tau zoo. Nej puas nco qab thaum Yaunas npau taws vog vim Yehauvas zam txim rau cov tibneeg nyob hauv lub  nroog Nineves? Tom qab Yehauvas zam lawv lub txim lawm, tau muaj li cas? (Yaunas 3:10–4:1) Cov tibneeg Nineves thov Yehauvas zam lawv lub txim ces 120,000 leej neeg Nineves thiaj li tsis raug kev ploj tuag. Qhov no qhia tau tias Yaunas txiav txim tsis ncaj rau cov tibneeg Nineves, tiamsis tej Yehauvas ua yog lawm.

6. Puas tas Yehauvas qhia txhua yam rau peb paub?

⁶ Yehauvas tsis tas yuav piav txhij piav txhua rau tibneeg paub. Tab txawm puag txheej thaum ub, Yehauvas yeej tau qhia rau nws cov tibneeg txog tej yam nws yuav ua lossis tej yam nws tabtom tseem yuav ua, seb lawv ho xav li cas. (Chivkeeb 18:25; Yaunas 4:2, 3) Muaj qee zaug nws qhia hlo nws tej kev txiav txim siab rau lawv. (Yaunas 4:10, 11) Txawm li ntawd los, Yehauvas tsis tas qhia tibneeg paub txog tej yam nws yuav ua vim nws yog tus Tswv Tsim. Nws tsis tas nug seb peb pom zoo lossis tsis pom zoo nws mam li ua.​—Yaxayas 40:13, 14; 55:9.

7. Ua li cas muaj qee lub sijhawm ho nyuaj rau peb mloog, thiab vim li cas?

⁷ Peb yeej paub tias Yehauvas yeej ua qhov ncaj qhov yog tiamsis peb puas tso siab rau cov Yehauvas tsa los sawv nws cev? Nyob hauv peb nruab siab muaj qee zaug peb puas xav twjywm tias cov neeg no puas ua li Yehauvas qhia tiag, los yog ua li lawv lub siab xav xwb? Nyob puag txheej thaum ub los cov ntseeg ib txhia kuj tau xav li ntawd thiab. Xws li, tus txivneej uas peb twb tham dua los lawd uas nyob rau  nqe 3. Ntshe nws tej nruab ze yuav xav zoj tias, ‘Ua li, Mauxes puas tau nrog Yehauvas tham zoo zoo ua ntej nws muab lub txim tuag rau tus txivneej uas hla tsab cai Xanpataus?’ Lossis ntshe Uliyas uas yog neeg Hitis, tus uas nws pojniam deev Daviv, tus phoojywg tej zaum nws yuav xav tias, ‘Twb yog Daviv ua vajntxwv nws thiaj li tsis raug lub txim tuag.’ Yehauvas tso siab rau cov uas nws tsa los saib xyuas nws lub koom haum thiab lub koom txoos. Yog peb twb tsis tso siab rau lawv peb yuav ua li cas qhia tias peb tso siab rau Yehauvas?

8. Raws li Tes Haujlwm 16:4, 5, cov ntseeg txheej puag thaum ub thiab cov ntseeg niaj hnub niam no coj tau sib xws li cas?

⁸ Niaj hnub niam no Yehauvas cia tus qhev ncaj thiab ntse saib xyuas nws lub koom haum uas yog feem nyob hauv ntiajteb. (Mathais 24:45) Zoo tib yam li pab ntaus thawj nyob rau thawj 100 xyoo, tus qhev ncaj thiab ntse no tau saib xyuas Yehauvas cov tibneeg thoob plaws ntiajteb thiab yog tus qhia cov txwj laus hauv koom txoos seb yuav coj li cas rau li cas. (Nyeem Tes Haujlwm 16:4, 5.) Cov txwj laus yeej coj raws nraim li no hauv lub koom txoos. Thaum peb mloog Yehauvas lub koom haum thiab cov txwj laus tej lus qhia tau tias peb tso siab rau Yehauvas.

9. Thaum cov txwj laus txiav txim siab ua ib yam dabtsi twg, cas ho ua rau peb tsis xav mloog thiab vim li cas?

⁹ Muaj qee lub sijhawm yuav nyuaj rau peb mloog cov txwj laus tej lus. Xws li tau ob peb xyoos tas los no, cov koom txoos yuav tau muab kho me ntswb mentsis. Muaj qee zaus cov txwj laus yuav tau muab ib pawg faib rau ib pawg kom nyob rau ib lub Tsev Nceeg Vaj twg sawvdaws tuaj ntom nkaus rau hauv. Tej zaum cov txwj laus yuav hais kom peb mus rau lwm lub koom txoos, ces peb yuav tseg peb tej phoojywg kwvluag lossis tej nruab ze rau tom qab. Ua li, puas yog Yehauvas hais kiag rau cov txwj laus kom faib tus no nyob rau qhov no, tus tod mus rau qhov tod? Tsis muaj li ntawd. Tej zaum qhov no yuav ua rau peb tsis xav mloog cov txwj laus hais. Tiamsis nco ntsoov  tias Yehauvas twb tso siab rau cov txwj laus, ces peb yuav tau tso siab rau lawv tib yam nkaus thiab. *

10. Raws li Henplais 13:17, vim li cas peb ho yuav tau mloog cov txwj laus lus?

¹⁰ Vim li cas peb ho yuav tau mloog cov txwj laus tab txawm lawv txiav txim siab rau tej yam uas peb tsis xav mloog? Yog peb mloog cov txwj laus lus, ces yuav pab kom cov nyob hauv koom txoos muaj kev sib haum xeeb. (Efexus 4:2, 3) Yog txhua leej txhua tus mloog cov txwj laus lus lawm ces lub koom txoos yuav tawg paj txi txiv. (Nyeem Henplais 13:17.) Tiamsis qhov tseem ceeb tshaj plaws huv tibsi yog peb tso siab rau Yehauvas thiab cov Yehauvas tsa los saib xyuas peb.​—Tes Haujlwm 20:28.

11. Muaj tej yam twg tsav tau peb kom tso siab rau cov txwj laus?

¹¹ Nco ntsoov tias thaum cov txwj laus tuaj sib sau ua ke tham txog lub koom txoos, lawv yeej xub xub thov Yehauvas tag, lawv mam li sablaj. Tsis tas li ntawd, cov txwj laus yeej tshawb tej nqe Vajlugkub los saib seb yuav txiav txim siab li cas rau li cas, thiab lawv kuj saib seb Yehauvas lub koom haum tau sau li cas tuaj pab lawv tej kev txiav txim siab. Nyob hauv cov txwj laus nruab siab nruab plaw lawv tsuas xav ua kom haum Yehauvas siab thiab saib xyuas tau nws cov tibneeg. Cov txwj laus no yeej paub hais tias Vajtswv yeej saib ntshis seb lawv yuav saib xyuas nws cov tibneeg zoo npaum li cas. (1 Petus 5:2, 3) Cia peb zaum tsaws xav li no. Yog peb tig mus rau sab twg los peb tsuas pom tibneeg thoob plaws ntiajteb no sib cais ua pab ua pawg tsis hais kev nom kev tswv kev dab kev qhua lossis haiv neeg no rau haiv neeg tod. Tiamsis Yehauvas cov tibneeg thooj siab koom ntsws teev tiam nws tib leeg nkaus nkaus xwb. Tos Yehauvas Cov Timkhawv thooj siab koom ntsws li no los yeeb vim yog Yehauvas yog tus txha nqaj qaum ntawm nws lub koom haum.

12. Thaum ib tug neeg twg lees nws tej kev txhaum, cov txwj laus yuav tau ua tib zoo xav mus xav los txog tej twg?

¹² Yehauvas tso siab rau cov txwj laus tias lawv yuav yog cov saib xyuas kom cov ntseeg coj tau lub neej dawb huv. Yog ib tug ntseeg twg ua txhaum loj lawm, Yehauvas cia cov txwj laus los mus tu tej plaub ntug no. Yog li ntawd, cov txwj laus yuav tau mus nug tus neeg txhaum ntawd seb nws puas lees nws tej kev txhaum tawm plaws hauv nruab siab tuaj tiag. Yog li ntawd, cov txwj laus yuav tau soj qab taug lw saib seb tus neeg ntawd puas tau tso nws tej kev txhaum tseg lawm tiag tiag. Txawm nws lees tab meeg tias nws ua txhaum lawm los nyob nraim nkoos hauv nws nruab siab nws puas tseem xav ua zaj phem? Ua li, thaum nws lub siab xav txog tej yam tsis zoo nws puas muab dua rhe pov tseg? Ua li, puas yog nws mus poo cov neeg tsis zoo, nws thiaj coj tau tsis zoo xwb? Yog muaj li ntawd tiag, nws puas yuav tso tau lawv tseg? Cov txwj laus yuav tau thov Yehauvas thiab mloog seb muaj li cas tiag, saib seb phau Vajlugkub hais li cas, thiab ntsuas tus neeg txhaum ntawd cov lus. Tom qab ntawd, lawv mam li txiav txim seb lawv yuav cia tus txhaum ntawd nyob hauv lub koom txoos los yuav muab nws rho tawm.​—1 Kauleethaus 5:11-13.

13. Yog tias peb muaj ib tug phoojywg kwvluag lossis ib tug nruab ze raug rho tawm, peb yuav hais li cas?

¹³ Txojkev peb tso siab rau cov txwj laus raug sim li cas tiag? Yog hais tias tus raug rho tawm ntawd tsis yog peb tej phoojywg kwvluag lossis tej nruab ze, ces twb tsis txog txij twg. Ua li, yog hais tias tus raug rho tawm ntawd yog peb ib tug phoojywg kwvluag ne? Peb puas xav tias cov txwj laus txiav txim sai dhau lawm? Lossis  peb puas xav tias cov txwj laus txiav txim raws nkaus li Yehauvas lub siab xav? Yuav ua li cas peb thiaj tsis xav txog tej yam zoo li no?

14. Peb yuav tau nco ntsoov li cas yog hais tias cov txwj laus muab peb ib tug phoojywg kwvluag lossis ib tug nruab ze rho tawm?

¹⁴ Nco ntsoov tias tos Yehauvas tsa kom muaj tsab cai raug rho tawm los twb yog Yehauvas xav tiv thaiv cov ntseeg, thiab tus raug rho tawm ntawd. Yog hais tias cov txwj laus tsis muab tus ua txhaum ntawd rho tawm, ces nws yuav txw tau lwm tus mus ua tib yam li nws thiab. (Kalatias 5:9) Ntxiv ntawd, nws yuav xam tsis pom nws tej kev txhaum thiab nws yuav tsis pauv nws lub siab los ua raws li Yehauvas lub siab xav. (Tej Lus Qhia 8:11) Yog li ntawd, thaum cov txwj laus yuav txiav txim siab rho ib tug tawm lawv yeej ua tib zoo xav mus xav los tag lawm. Cov txwj laus yeej paub tias tsis yog lawv “txiav txim raws li neeg lub siab nyiam, tiamsis yog raws li [Yehauvas] lub siab nyiam.”​—2 Xwmtxheej Vajntxwv 19:6, 7.

15. Vim li cas peb yuav tau huab yam tso siab rau Yehauvas heev tshaj li yav tas los lawm?

¹⁵ Lub sim ceeb qab ntuj phem no tabtom yuav dua mus. Yog li ntawd, peb yuav tau tso siab rau Yehauvas heev tshaj li yav tas los lawm. Vim li cas peb yuav tau tso siab? Rau qhov tias thaum txog lub sijhawm uas txom nyem kawg nkaus, peb puas ua xyem xyav? Yog hais tias cov tau tsa los saib xyuas hais li cas, peb puas ua li ntawd? Nyob rau lub sijhawm ntawd, Yehauvas yeej yuav tsis nqes kiag los hais lus rau peb tim ntsej tim muag, tiamsis nws tsa tau cov los sawv nws cev qhia seb peb yuav ua li cas. Thaum txog lub sijhawm ntawd, peb yuav tau tsis txhob ua xyem xyav lossis xav hais tias, ‘Tej lus no puas yog los ntawm Yehauvas tiag mas? Los yog cov kwvtij uas saib xyuas ntawd lam tau lam hais xwb?’ Ua li, peb puas tso siab rau Yehauvas thiab nws lub koom haum tiag tiag? Yog tamsim no peb mloog lawv tej lus ces yav tom ntej no, yuav tsis nyuaj ua luaj twg rau peb mloog lawv tej lus thiab.​—Lukas 16:10.

16. Peb txojkev tso siab rau Yehauvas yav tom ntej yuav raug sim li cas?

¹⁶ Cia li zaum tsaws ua tib zoo xav txog thaum Yehauvas los rhuav tshem tej kev phem hauv lub qab ntuj khwb no. Peb vam thiab cia siab hais tias niaj hnub niam no coob leej ntau tus yuav tig los mus teev tiam Yehauvas, tsis hais peb tej nruab ze huv tibsi. Thaum Amankedoos los, Yehauvas tso cai rau Yexus ua tus txiav txim seb lawv lub neej yuav mus zoo li cas. (Mathais 25:31-33; 2 Thexalaunikes 1:7-9) Yehauvas tsis tau tso cai rau peb ua tus xaiv  seb tus twg ciaj tus twg tuag. (Mathais 25:34, 41, 46) Peb puas tso siab rau Yehauvas tej kev txiav txim siab, lossis peb yuav cia tej no ua rau peb muab Yehauvas tso pov tseg? Peb yuav tau puab peb txojkev tso siab rau Yehauvas tamsim no xwv lwm hnub peb thiaj yuav tso siab plhuav tag nrho rau nws.

17. Tom qab Yehauvas rhuav tshem lub qab ntuj phem no tag lawm, yuav muaj dabtsi zoo tshwm sim tuaj?

¹⁷ Cia li pw rau ncoo xav zoo zoo txog thaum peb nyob lub ntiajteb tshiab seb yuav zoo npaum li cas tiag. Tej kev ntseeg cuav los yuav tsis muaj li lawm. Tej tub lag tub luam lossis tej nom tej tsw uas ib txwm tsim txom tibneeg yuav tsis muaj ntxiv li lawm. Yuav tsis muaj mob muaj nkeeg, yuav tsis txawj laus txawj tuag, thiab yuav tsis muaj kev quaj ntsuag los raug peb lub neej ib zaug ntxiv li lawm. Dab Ntxwg Nyoog thiab cov dab yuav raug kaw ib txhiab xyoo. Txhua yam kev phem uas lawv ua, yuav tsis muaj ntxiv li lawm. (Tshwmsim 20:2, 3) Zoo tiag tiag li uas peb tso siab plhuav rau Yehauvas thiab coj raws li nws lub siab xav!

18. Raws li Teev Npe 11:4-6 thiab 21:5, cov Yixalayees lub neej qhia peb li cas?

¹⁸ Ua li thaum txog lub ntiajteb tshiab, puas yuav muaj dabtsi los cuam tshuam peb txojkev tso siab rau Yehauvas ntxiv? Nej puas nco qab puag thaum ub thaum cov Yixalayees tawm tim tebchaws Iziv los tsis tau ntev? Muaj ib co txawm pib yws zom zaws vim hais tias lawv nqhis tej zaub mov yav ntuj qub qab, thiab lawv hais tias Yehauvas cov manas mas tsis qab kiag li. (Nyeem Teev Npe 11:4-6; 21:5.) Tom qab lub sijhawm uas txom nyem kawg nkaus dua lawm, peb puas yuav yws tib yam li ntawd thiab? Lub sijhawm ntawd, peb tsis paub hais tias peb yuav tau muab lub ntiajteb no kho li cas rau li cas kom thiaj li zoo nkauj mus thoob plaws lub ntiajteb. Thaum lub sijhawm ntawd, yuav muaj haujlwm ntau heev ua, yeej yuav tsis yoojyim thaum chiv thawj. Lub sijhawm ntawd, peb puas muaj cuab kav yws Yehauvas? Ib yam uas yuav pab tau peb txaus siab tamsim no yog peb cia li txaus siab rau tej uas Yehauvas muab rau peb ces lwm hnub los peb thiaj li yuav txaus siab tib yam nkaus.

19. Zaj kawm no cov ntsiab lus muaj li cas tiag?

¹⁹ Peb yuav tau tso siab rau Yehauvas tiag tiag li tias txhua yam nws ua yog qhov zoo thiab qhov yog. Tsis tas li ntawd, peb yuav tau tso siab rau cov Yehauvas tsa los saib xyuas. Nco ntsoov Yehauvas tej lus nws hais rau tus cev lus Yaxayas tias: “Nyob twjywm thiab cia siab rau kuv, nej thiaj yuav muaj zog.”​—Yaxayas 30:15.