NYOB hauv phau Vajlugkub, cov tibneeg txheej thaum ub lawv sau nqe tshoob thaum lawv qua ib tug ntxhais. Thaum nraug vauv tog them tus nqe tshoob lawv siv txhiam laj txhiam xwm, tsiaj txhu lossis nyiaj txiag los them. Tej zaug tus nraug vauv kuj mus yug niam tais yawm txiv yam nkaus li Yakhauj tau mus ua haujlwm 7 lub xyoos rau nws yawm txiv los them nqe tshoob. (Chivkeeb 29:17, 18, 20) Ua li cas thiaj li sau nqe tshoob?

Muaj ib tug pojniam tshawb fawb Vajlugkub npe hu ua Khalaum Maiyawm (Carol Meyers) tau hais li no: “Tus nqe tshoob yog los mus txhaws qhov uas tsis muaj tus ntxhais pab niam pab txiv lawm.” Ntxiv ntawd, tus nqe tshoob kuj yog los mus tuav ob tse tibneeg kom noj sib hlub haus sib ce. Ob tog kwvtij neej tsa los kuj txawj sib hlub sib pab thaum muaj kev nyuaj siab los raug. Thaum them tus nqe tshoob tas lawm, tus ntxhais yuav tau tawm ntawm nws niam nws txiv mus nrog nws tus txiv ua txwj ua nkawm.

Tus nqe tshoob tsis yog los them tus pojniam tam li nws yog tej rooj tej tog. Muaj ib phau ntawv sau txog cov Yixalayees lub neej txheej puag thaum ub tau hais li no: “Yog tias tej pej kum neeg saib thaum them tus nqe tshoob mas tej zaum yuav zoo li them tej txhiam laj txhiam xwm. Tiamsis tus nqe tshoob yog los mus txhaws qhov uas tsis muaj tus ntxhais nyob ntawd pab niam pab txiv xwb, tsis yog mus yuav tus ntxhais.”

Niaj hnub niam no muaj tej lub tebchaws haj tseem them nqe tshoob nqe kos. Thaum cov ntseeg ib tug twg sau nqe tshoob nqe kos, tsis txhob sau tshaj li tsim nyog sau thiaj yog “ua siab mos siab muag rau txhua tus.” (Filipis 4:5; 1 Kauleethaus 10:32, 33) Tsis tas li ntawd, kuj qhia hais tias lawv tsis “ntshaw nyiaj” lossis ua neeg siab hlob. (2 Timautes 3:2) Yog tias ib tug ntseeg twg tsis sau nqe tshoob siab siab ces tus nraug vauv thiaj li tsis muab rooj tshoob ncua mus txog rau thaum nws them tau. Lossis tus vauv thiaj li yuav tsis tso nws tes haujlwm ua ib tug tho kev tseg los mus ua haujlwm sab nraud kom them taus tus nqe tshoob.

Nyob tej lub tebchaws, nom tswv yog tus lov tej nqe tshoob nqe kos. Yog hais tias muaj li no ces cov ntseeg yuav tau coj raws li nom tswv tej kevcai. Vim li cas yuav tau coj raws li ntawd? Rau qhov Vajtswv Txojlus yuav kom cov ntseeg sawvdaws “mloog nomtswv” lus thiab mloog tej kevcai uas tsis cov nyom Vajtswv tej kevcai.​—Loos 13:1; Tes Haujlwm 5:29.