ZAJ KAWM 19
Kev Hlub Thiab Kev Ua Ncaj Thaum Raug Kev Limhiam
“Koj tsis yog tus Vajtswv uas zoo siab rau txojkev limhiam, txojkev phem nrog koj nyob tsis tau li.”—NTAWV NKAUJ 5:4.
ZAJ NKAUJ 119 Peb Yuav Tsum Muaj Kev Ntseeg
ZAJ NO THAM TXOG DABTSI? *
1. Raws li Ntawv Nkauj 5:4-6, Yehauvas xav li cas txog txojkev phem limhiam?
VAJTSWV YEHAUVAS ntxub txhua txojkev phem limhiam. (Nyeem Ntawv Nkauj 5:4-6.) Yehauvas hajyam ntxub txojkev yuam menyuam ua phem ua qias vim yog ib qho txhaum uas qias vuab tsuab tshaj plaws! Peb yog Yehauvas Cov Timkhawv, peb yeej ntxub txojkev yuam menyuam ib yam li Yehauvas. Peb yuav tsis npog cov uas ua phem ua qias rau menyuam hauv lub koom txoos Khixatia kiag li.—Loos 12:9; Henplais 12:15, 16.
2, 3. Vim li cas thiaj hais tias kev yuam menyuam ua phem ua qias tawm tsam “Khetos txoj kevcai”?
2 Kev yuam menyuam ua phem ua qias txhaum “Khetos txoj kevcai”! (Kalatia 6:2) Txhaum li cas? Zaj tas los, peb kawm tias cov uas coj Khetos txoj kevcai yeej xyaum Yexus tus qauv es hlub thiab ua ncaj rau txhua tus. Yog li ntawd, cov uas coj Khetos txoj kevcai yeej hlub thiab tiv thaiv tej menyuam tiag tiag. Tus uas yuam menyuam ua phem ua qias tsis coj li ntawd. Nws tsuas xam pom nws tus kheej xwb. Nws kuj ua rau tus menyuam tsis pom qab tso siab rau leejtwg thiab xav tias tsis muaj leejtwg hlub nws.
3 Tu siab kawg uas kev yuam menyuam ua phem ua qias yog ib qho teeb meem loj heev thoob qab ntuj. Qhov teeb meem no kuj los raug lub koom txoos thiab. Yog vim li cas? Vim muaj “cov neeg phem thiab cov neeg txawj dag” coob heev, ib txhia kuj xav los ntxias cov uas nyob hauv lub koom txoos. (2 Timaute 3:13) Tsis tas li ntawd xwb, ib txhia uas teev tiam Yehauvas cia lawv lub siab ntshaw tej yam qias vuab tsuab, lawv thiaj yuam menyuam. Cia peb tham seb vim li cas kev yuam menyuam ua phem ua qias thiaj yog ib txojkev txhaum loj ua luaj. Tom qab ntawd, peb mam kawm tias thaum muaj ib tug ua txhaum loj li no, cov txwj laus yuav tu li cas thiab cov niam txiv yuav tiv thaiv lawv cov menyuam li cas. *
IB TXOJKEV TXHAUM LOJ HEEV
4, 5. Vim li cas txojkev yuam menyuam ua phem ua qias txhaum tus menyuam?
4 Tus menyuam uas raug yuam ua phem ua qias mas yuav nyuaj siab thiab nco ntsoov mus ntev heev. Qhov ntawd tsis yog mob tus menyuam nkaus xwb tiamsis kuj mob nws tsev neeg thiab cov kwvtij nkauj muam Khixatia sawvdaws siab thiab. Tus neeg yuam menyuam ua phem ua qias yeej ua txhaum loj kawg li tiag.
5 Txhaum tus menyuam. Thaum ib tug neeg txhob txwm ua rau lwm tus raug mob thiab txom nyem, yeej yog nws ua txhaum lawm. Zaj tom ntej, peb yuav kawm tias tus uas yuam menyuam yeej ua rau tus menyuam raug mob thiab raug kev nyuaj siab ntau yam. Tus menyuam tso siab rau nws tiamsis nws tseem ua phem rau tus menyuam. Thaum kawg tus menyuam thiaj tsis pom qab tso siab rau leejtwg li lawm. Peb yuav tsum tiv thaiv menyuam ntawm cov neeg phem limhiam thiab nplig cov menyuam uas raug yuam ua phem ua qias.—1 Thexalaunika 5:14.
6. Vim li cas txojkev yuam menyuam ua phem ua qias txhaum lub koom txoos?
6 Txhaum lub koom txoos. Tus Khixatia hauv lub koom txoos uas yuam menyuam ua phem ua qias ua rau luag thuam lub koom txoos. (Mathai 5:16; 1 Petus 2:12) Tsis tas li ntawd xwb, nws ua txhaum tsheej plhom tus kwvtij nkauj muam uas siv zog tuav kev ntseeg kom Yehauvas tau koob meej. (Yuda 3) Nws ua puas tsuas lub koom txoos lub koob lub npe. Peb thiaj txwv hlo tsis pub ib tug uas tsis kam tso nws txoj kev phem kev qias tseg nyob rau hauv lub koom txoos Khixatia.
7. Vim li cas txojkev yuam menyuam ua phem ua qias txhaum nom tswv?
7 Txhaum nom tswv. Cov Khixatia yuav “tsum nyob hauv tus uas kav qab kev tswjhwm.” (Loos 13:1) Yog peb nyob hauv nom tswv qab kev tswjhwm ces peb yuav hwm thiab ua raws li lawv tej kevcai. Thaum ib tug Khixatia hauv lub koom txoos yuam menyuam, nws ua txhaum nom tswv kevcai. (Muab piv rau Tubtxib Tes Haujlwm 25:8.) Cov txwj laus tsis muaj cai teem txim rau nws. Yog nom tswv rau txim li cas los nws yuav tau ris lub txim ntawd. (Loos 13:4) Phau Vajlugkub hais tias: “Leejtwg tseb yam twg nws kuj yuav sau yam ntawd.”—Kalatia 6:7.
8. Thaum ib tug ua txhaum rau ib tug, twb yog txhaum leejtwg?
8 Qhov tseem ceeb tshaj, yog txhaum Vajtswv. (Ntawv Nkauj 51:4) Thaum ib tug twg ua txhaum rau lwm tus, nws kuj ua txhaum Vajtswv thiab. Mauxe Txoj Kevcai hais tias thaum ib tug dag nws tus kwvtij zej zog, nws ‘ua txhaum ua tsis ncaj rau Yehauvas.’ (Levi Tej Kevcai 6:2-4) Yog li ntawd, thaum ib tug Khixatia hauv lub koom txoos dag ntxias menyuam ua phem ua qias, kuj yog nws ua txhaum Vajtswv lawm thiab. Yog Yehauvas Cov Timkhawv ib tug ua li no, nws ua rau luag thuam Yehauvas lub npe. Vim li ntawd peb thiaj ntxub txojkev yuam menyuam ua phem ua qias.
9. Yehauvas lub koom haum npaj tau tej ntaub ntawv Vajlugkub twg thiab yog vim li cas?
9 Yehauvas lub koom haum tau npaj tej ntaub ntawv Vajlugkub ntau heev los pab tiv thaiv menyuam. Phau Tsom Faj thiab phau Tsim Dheev! qhia tias cov uas raug yuam ua phem ua qias yuav ua li cas thiaj thev taus lawv tej kev nyuaj siab. Ob phau no kuj qhia seb lwm tus yuav pab nplig lawv li cas, thiab cov niam txiv yuav tiv thaiv lawv cov menyuam li cas. Lub koom haum cob qhia cov txwj laus tias thaum muaj ib tug yuam menyuam ua phem ua qias, lawv yuav siv phau Vajlugkub los tu qhov teeb meem no li cas. Lub koom haum ua tib zoo tshuaj xyuas kom lub koom txoos txawj tu tej teeb meem zoo li no. Yog vim li cas? Vim lub koom haum xav kom cov txwj laus coj raws nraim li Khetos txoj kevcai.
YUAV TU TEJ KEV TXHAUM LOJ LI CAS
10. Thaum muaj kev txhaum loj cov txwj laus yuav tu li cas thiab lawv txhawj txog dabtsi?
10 Thaum muaj kev txhaum loj, cov txwj laus yuav tu raws li Khetos txoj kevcai. Lawv hlub thiab ua ncaj rau cov kwvtij nkauj muam raws li Vajtswv lub siab nyiam. Thaum lawv hnov tias ib tug ua txhaum loj lawd, lawv txhawj txog ntau yam. Qhov uas lawv txhawj tshaj yog Yehauvas lub npe dawb huv. (Levi Tej Kevcai 22:31, 32; Mathai 6:9) Lawv kuj txhawj txog cov kwvtij nkauj muam hauv lub koom txoos txojkev sib raug zoo nrog Yehauvas thiab xav nplig cov uas raug lwm tus ua phem rau.
11, 12. Raws li Yakaunpau 5:14, 15, cov txwj laus lub luag haujlwm yog li cas?
11 Tsis tas li ntawd xwb, yog tus uas ua txhaum nyob hauv lub koom txoos, cov txwj laus yuav xyuas seb lawv puas pab tau nws rov nrog Yehauvas sib nraug zoo. (Nyeem Yakaunpau 5:14, 15.) Ib tug Khixatia uas cia nws lub siab ntshaw tej yam qias vuab tsuab coj nws mus ua txhaum loj, kuj zoo ib yam li tus neeg muaj mob. Nws txojkev sib raug zoo nrog Yehauvas tsis khov lawm. * Cov txwj laus zoo li tus kws kho mob, xav “kho tus mob zoo.” Lawv siv phau Vajlugkub tej lus qhuab qhia los pab tus uas ua txhaum loj kho nws txojkev sib raug zoo nrog Yehauvas. Tiamsis nws yuav tsum ntxeev dua siab tshiab tiag cov txwj laus thiaj pab tau nws.—Tubtxib Tes Haujlwm 3:19; 2 Khaulee 2:5-10.
12 Cov txwj laus muaj lub nra hnyav heev. Lawv hlub thiab tsom kwm Vajtswv pab yaj uas nws muab cob rau lawv. (1 Petus 5:1-3) Lawv xav txhawb kom cov kwvtij nkauj muam nyob kaj siab lug tso siab plhuav hauv lub koom txoos. Yog li ntawd thaum lawv hnov tias ib tug ua txhaum loj, xws li yuam menyuam ua phem ua qias, lawv yuav tshuaj saib tamsid. Cov txwj laus yuav ua li cas? Nqe 13 txog 18 yuav tham txog qhov no.
13, 14. Thaum muaj neeg liam tias ib tug yuam menyuam ua phem ua qias, cov txwj laus puas qhia nom tswv paub? Piav seb.
13 Thaum muaj neeg liam tias ib tug yuam menyuam ua phem ua qias, cov txwj laus puas qhia nom tswv paub? Tej lub tebchaws muaj kevcai lij choj tias yuav tsum qhia rau nom tswv paub. Cov txwj laus uas nyob hauv cov tebchaws ntawd yeej coj raws nraim li nom tswv hais. (Loos 13:1) Tej kevcai lij choj no tsis hla Vajtswv txoj kevcai. (Tubtxib Tes Haujlwm 5:28, 29) Yog li, thaum cov txwj laus hnov tias muaj menyuam raug yuam ua phem ua qias, lawv yeej maj nroos hu nrog ceg Npe-ee tham seb yuav ua li cas thiaj ua raws li nom tswv txojcai.
14 Cov txwj laus yuav qhia tus menyuam, nws niam nws txiv, thiab cov uas paub txog qhov teeb meem no tias lawv yeej muaj cai qhia rau nom tswv paub. Yog yus coj ib tug hauv lub koom txoos mus kom rau nom tswv, puas tsim nyog yus ntshai tsam zej tsoom sawvdaws paub thiab ua rau luag thuam Vajtswv lub npe? Tsis tsim nyog yus ntshai. Tus uas ua txhaum yog tus uas ua rau luag thuam Vajtswv lub npe xwb.
15. Raws li 1 Timaute 5:19, ua ntej cov txwj laus tsa ib rooj txiav txim, vim li cas yuav tsum muaj 2 tug timkhawv?
15 Ua ntej cov txwj laus hauv lub koom txoos tsa ib rooj txiav txim, vim li cas yuav tsum muaj 2 tug timkhawv? Rau qhov phau Vajlugkub hais tias ua li no thiaj ncaj. Yog tus uas raug liam tsis kam lees txim ces yuav tsum muaj 2 tug timkhawv cov txwj laus thiaj tsa tau ib rooj txiav txim. (Kevcai 19:15; Mathai 18:16; nyeem 1 Timaute 5:19.) Ua li, nom tswv tej kevcai lij choj ne, puas yuav tsum muaj 2 tug timkhawv mam li qhia rau nom tswv? Tsis muaj los tau. Txawm tsis muaj ib tug timkhawv li los, cov txwj laus lossis lwm tus yeej qhia tau rau nom tswv paub.
16. Thaum cov txwj laus hnov tias ib tug hauv lub koom txoos raug liam, lawv yuav ua li cas?
16 Thaum ib tug hauv lub koom txoos raug liam, cov txwj laus yuav ua raws li nom tswv tej kevcai li choj. Tom qab ntawd, lawv mam taug qab seb tau muaj li cas tiag. Lawv tshuaj raws li phau Vajlugkub qhia, lawv thiaj paub seb puas tsim nyog tsa ib rooj txiav txim. Yog tus raug liam tsis lees txim ces cov txwj laus mam li nug cov uas paub qhov teeb meem. Yuav tsum muaj 2 tug timkhawv thiaj tsa tau ib rooj txiav txim. Leejtwg thiaj ua tau tus timkhawv? Tus timkhawv 1 yog tus uas foob, tus timkhawv 2 yog lwm tus. Tus timkhawv 2 yuav tsum ua tau pov thawj tias qhov teeb meem no muaj tseeb lossis paub tias tus raug liam twb yuam dua menyuam los lawm. * Txawm tsis muaj lwm tus ua timkhawv li los, kuj hais tsis tau tias tus foob dag xwb. Yog tias ib tug raug liam lawd, cov txwj laus yuav tsum saib tias tej zaum kuj muaj tiag. Lawv yuav mob siab nplig cov uas raug yuam thiab lawv tsev neeg. Tsis tas li ntawd xwb, cov txwj laus yuav ceev faj ua tib zoo saib lub koom txoos thiab tiv thaiv lawv ntawm tus uas raug liam, tsam nws ho mus ua phem rau lwm tus thiab.—Tubtxib Tes Haujlwm 20:28.
17, 18. Piav seb cov txwj laus tsa ib rooj txiav txim ua dabtsi.
17 Cov txwj laus tsa ib rooj txiav txim ua dabtsi? Lawv tsa los txiav txim seb puas tsim nyog cia tus uas ua txhaum loj nyob hauv lub koom txoos lossis rho nws tawm. Txawm nws ua txhaum nom tswv txojcai lawm los, cov txwj laus tsis txiav txim seb yuav muab nws rau txim li cas. Lawv cia nom tswv tu tej no.—Loos 13:2-4; Titau 3:1.
18 Thaum cov txwj laus tsa ib rooj txiav txim, lawv tsuas txiav txim txog tus neeg txojkev sib raug zoo nrog Yehauvas thiab nrog nws cov kwvtij nkauj muab xwb. Lawv siv phau Vajlugkub los pab lawv txiav txim seb tus uas ua txhaum loj puas ntxeev dua siab tshiab los tsis ntxeev. Yog nws tsis ntxeev dua siab tshiab, ces nws yuav raug rho tawm. Cov txwj laus yuav tshaj tawm rau lub koom txoos paub tias nws tsis yog Yehauvas ib tug Timkhawv lawm. (1 Khaulee 5:11-13) Yog nws ntxeev dua siab tshiab lawd ces nws yuav tsis raug rho tawm. Tiamsis tej zaum nws yuav tsis tau tuav haujlwm hauv lub koom txoos tas lub neej los kuj muaj. Cov txwj laus mob siab thiab xav tiv thaiv cov menyuam hauv lub koom txoos. Yog li ntawd, lawv yuav ua twjywm hais cov niam txiv tias thaum nrog tus neeg ntawd, lawv yuav tsum ceev faj saib lawv cov menyuam kom zoo. Tsis tas li ntawd xwb, cov txwj laus yuav txuag tus menyuam ntsej muag es tsis qhia rau cov niam txiv paub tias nws yog leejtwg.
NIAM TXIV YUAV TIV THAIV MENYUAM LI CAS
Ob niam txiv siv tej ntaub ntawv uas Vajtswv lub koom haum luam tawm los qhia menyuam. Nkawd qhia menyuam tias kev sib deev yog li cas. Ua li no yuav tiv thaiv kom lawv txhob raug yuam ua phem ua qias. (Saib nqe 19-22)
19, 20. Niam txiv yuav tiv thaiv menyuam li cas?
19 Lub luag haujlwm tiv thaiv cov menyuam yog leejtwg lub? Yog leej niam leej txiv lub. * ‘Tej tub ki yog qub txeeg qub teg ntawm Yehauvas.’ (Ntawv Nkauj 127:3) Yehauvas muab lub luag haujlwm tiv thaiv menyuam rau leej niam thiab leej txiv ua. Ua li neb yuav tiv thaiv neb cov menyuam kom txhob raug yuam ua phem ua qias li cas?
20 Qhov 1, kawm kom neb paub seb tus neeg uas nyiam yuam menyuam coj li cas. Neb yuav tsum paub seb nws siv tswvyim haub ntxias menyuam li cas. Ceev faj tsis txhob tso tso siab rau txhua tus thiab txhua lub sijhawm. (Paj Lug 22:3; 24:3) Nco ntsoov tias ntau zaus, tus uas yuam menyuam yog ib tug uas menyuam twb ncawg lawm.
21. Niam txiv yuav tiv thaiv menyuam li cas ntxiv?
21 Qhov 2, niaj hnub nrog neb cov menyuam tham lawv thiaj tsis ntshai qhia siab rau neb. (Kevcai 6:6, 7) Thaum nrog menyuam tham, ua tib zoo mloog. (Yakaunpau 1:19) Nco ntsoov tias cov menyuam uas raug yuam ua phem ua qias ntshai qhia rau lwm tus paub tsam tsis muaj leejtwg ntseeg. Lossis tej zaum tus uas yuam lawv twb hem tias yog lawv qhia lwm tus paub ces nws yuav ua phem ntxiv rau lawv. Yog neb pom tias neb tus menyuam tus cwj pwm txawv lawm, ua tib zoo nug nws thiab ua siab ntev mloog thaum nws qhia siab.
22. Niam txiv yuav tiv thaiv menyuam li cas ntxiv thiab? (Saib daim duab ntawm lub khaum.)
22 Qhov 3, cob qhia neb cov menyuam. Qhia lawv paub tias kev pw ua niam txiv yog li cas tiag. Menyuam ib tug tsis thooj ib tug. Yog li yuav tsum ntsuas seb lawv paub tab li cas thiab muaj hnub nyoog li cas, mam qhia raws li ntawd. Qhia lawv tias yog muaj leejtwg kov lawv qhov chaw mos lawv yuav tsum hais li cas thiab ua li cas. Yehauvas lub koom haum twb npaj tau ntau yam rau neb siv los cob qhia neb cov menyuam lawm.—Saib lub ntsiab me “ Kawm Thiab Cob Qhia Neb Cov Menyuam.”
23. Peb xav li cas txog qhov uas yuam menyuam ua phem ua qias, thiab zaj tom ntej peb yuav kawm txog dabtsi?
23 Yehauvas Cov Timkhawv saib qhov uas yuam menyuam ua phem ua qias tias yog ib qho uas limhiam vuab tsuab tshaj plaws thiab yog kev txhaum loj heev. Peb coj raws li Khetos txoj kevcai. Peb lub koom txoos tsis npog tej kev phem kev qias no. Tus yuam menyuam yuav tau ris nws lub txim txhaum. Zaj tom ntej, peb yuav kawm tias thaum peb cov kwvtij nkauj muam raug tej xwm no, peb yuav ua li cas nplig lawv.
ZAJ NKAUJ 102 Pab Cov Qaug Zog
^ nqe 5 Zaj no yuav tham seb yuav pab cov menyuam li cas lawv thiaj tsis raug yuam ua phem ua qias. Peb yuav kawm seb cov txwj laus saib xyuas lub koom txoos li cas thiab cov niam txiv tiv thaiv lawv cov menyuam li cas.
^ nqe 3 TXHAIS TAWM: Hmoob ib txwm txaj muag hais phua hlo li yuav hais no, tiamsis yuav tsum piav lub ntsiab kom meej, sawvdaws thiaj paub zam tej yam uas Vajtswv ntxub. Yuam menyuam ua phem ua qias yog thaum ib tug laus ntxias ib tug menyuam deev, xws li nrog pw, siv qhov ncauj qhov quav, kov chaw mos, kov mis, kov pob tw, lossis lwm yam kev ua phem ua qias. Nco ntsoov tias tsis yog tim tus menyuam rau qhov menyuam tsis tau paub qabhau. Tus menyuam uas raug yuam yuav txaj muag thiab txom nyem lub siab lub ntsws. Cov menyuam uas raug yuam feem coob yog ntxhais xwb, tiamsis ntau tus kuj yog tub thiab. Cov uas yuam menyuam feem coob yog txivneej tiamsis qee tus kuj yog pojniam thiab.
^ nqe 11 Tus uas ua txhaum loj liam tsis tau tias vim nws txojkev sib raug zoo nrog Yehauvas tsis khov nws thiaj li mus ua txhaum. Nws yuav tsum ris nws lub txim txhaum thiab hais nws zaj rau Yehauvas.—Loos 14:12.
^ nqe 16 Cov txwj laus tsis tas coj tus menyuam nrog lawv mus ntsib tus uas nws foob. Yog tus menyuam qhia siab rau nws niam nws txiv lossis rau ib tug laus twg, tus ntawd mam li qhia rau cov txwj laus los tau. Ua li ntawd, thiaj tsis ua rau tus menyuam yimhuab puas siab puas ntsws thiab ntshai.
^ nqe 19 Tej uas hais rau leej niam leej txiv kuj yog hais rau cov uas saws tej metub menyuam los tu thiab.
