1. Vajtswv Txojlus pab tau peb ua neej li cas?

YEHAUVAS yog tus xibhwb uas txawj qhia tshaj plaws. (Yaxaya 30:20, 21) Txawm peb yuav raug teeb meem li cas los, nws yeej yuav pab peb daws tibsi. Vajtswv Txojlus taw qhia peb ua neej xwv peb “thiaj li npaj txhij zog ua tau txhua yam haujlwm zoo.” (2 Timaute 3:17) Yog peb ua neej raws li phau Vajlugkub qhia, peb yuav muaj tswvyim dua cov uas ua raws li “tej tswvyim hauv ntiajteb.”​—1 Khaulee 3:19; Ntawv Nkauj 119:97-100.

2. Hauv zaj no peb yuav kawm txog dabtsi?

² Ntiajteb lub tswvyim kheev txhawb kom peb ua raws li lub cev nqaij tawv ntshaw. Yog li ntawd, peb yuav tsum tswj peb lub siab peb thiaj tsis coj thiab xav raws li lub ntiajteb. Phau Vajlugkub thiaj hais tias: “Cia li ceev faj tsis txhob cia leejtwg tej lus txawj ntse thiab tej lus dag do do ntes tau nej mus ua qhev. Tej lus ntawd yog raws li neeg tej qub kevcai.” (Khaulauxi 2:8) Hauv zaj no, peb yuav kawm txog 2 lub tswvyim uas Xatas qhia los dag tibneeg yuam kev. Peb yuav taug qab seb 2 lub tswvyim no tau pib li cas. Peb yuav pom tias Vajtswv lub tswvyim yeej zoo tshaj ntiajteb lub tswvyim lawm ntau npaug.

3, 4. Txij tiam 20 los, cov neeg hauv tebchaws U.S.A. pib hloov li cas?

³ Yav thaud, coob leej ntau tus hauv tebchaws U.S.A. qhia tias tsuas yog cov txij nkawm thiaj pw tau ua ke xwb. Lawv yeej tsis lam tham txog tej no tab meeg sawvdaws. Tiamsis pib tiam 20 los tibneeg txawm hloov zuj zus lawm. Lawv tsis txaj muag rau kev plees kev yi thiab nyias pib ua ywj nyias siab lawm xwb.

⁴ Thaum txog xyoo 1920, ntuj fa teb lam tibneeg tej kev coj noj coj ua thiab tus cwj pwm hloov tag. Ib tug neeg tshawb fawb tau  piav tias “tej yeeb yaj kiab, tej yeeb yam ua si, tej nkauj, tej ntaub ntawv uas luag sau, tsis txaj muag tham txog kev nkauj kev nraug. Luag kuj muab kev plees kev yi siv los ua lag ua luam tibsi.” Lub caij ntawd, thaum tibneeg mus seev cev ua si, lawv tus cwj pwm qhia tias lawv nyiam sib daj sib dee. Tibneeg kuj pib hnav tej tsoos tsis raug muag uas pom zam lossis pom nqaij heev. Muaj raws nkaus li phau Vajlugkub tau hais tiag, nyob rau tiam kawg tibneeg yuav “nyiam kev lomzem heev.”​—2 Timaute 3:4.

5. Txij xyoo 1960 los tibneeg hloov li cas ntxiv lawm thiab?

⁵ Los txog rau xyoo 1960, tibneeg hajyam hloov ntau tshaj qhov qub lawm. Tej hluas nkauj hluas nraug cia li nyob ua ib tse, tsis ua tshoob li. Cov txij nkawm los sib nrauj coob zuj zus. Kuj muaj txivneej deev txivneej, pojniam deev pojniam coob zuj zus lawm thiab. Tsis tas li ntawd xwb, tej kev lomzem ua si los txuam nrog kev sib daj sib dee tsis paub txaj muag li. Tej no ua rau tibneeg coj li cas xwb? Ib tug kawm txujci tau hais tias “twb yog tibneeg tsis leem cai ua kev plees kev yi ywj siab” thiaj ua rau coob leej ntau tus lub neej tawg tas, muaj cov ib txhais yim neeg coob zuj zus tuaj, muaj cov uas tiv tej duab liab qab, thiab coob tus raug kev nyuaj siab ntxhov plawv ntau yam. Kuj hnov txog coob tus uas mob Ej (AIDS) thiab mob kas cees lwm yam. Tej kev txom nyem no yog ntiajteb lub tswvyim txw ntag. Muaj tseeb raws li phau Vajlugkub hais tiag, ntiajteb lub tswvyim yeej ruam kawg li.​—2 Petus 2:19.

6. Vim li cas Xatas xav kom tibneeg qaug rau kev plees kev yi?

⁶ Xatas yeej paub tias Yehauvas yog tus rhawv txojkev txij nkawm. Yehauvas pom zoo cov txij nkawm pw ua niam txiv kom muaj tub muaj ki. Yog ib qho koob hmoov zoo kawg nkaus li. Tiamsis Xatas xav kom tibneeg ua puas lawv lub cev, kom lawv muab txojkev pw ua niam txiv siv ua lwj ua liam. Thaum tibneeg qaug rau kev plees kev yi, kev nkauj kev nraug, mas Xatas zoo siab kawg li. Kev plees kev yi tsis yog rhuav tej uas Yehauvas npaj tseg xwb, tseem rhuav cov uas qaug rau Xatas lub tswvyim kom lawv plam txojsia ib txhis tsis kawg thiab.​—Efexau 2:2; 1 Khaulee 6:9, 10.

7, 8. Phau Vajlugkub lub tswvyim qhia li cas txog kev pw ua niam txiv?

⁷ Cov uas qaug rau ntiajteb lub tswvyim xav tias phau Vajlugkub nruj dhau tsis muaj leejtwg coj tau. Lawv cav tias Vajtswv twb yog tus tsim  kom tibneeg txawj sib nyiam sib ntshaw, nws tseem txwv thiab lov? Lawv xav yuam kev tias tsis txhaum leejtwg, kavtsij ua raws li yus lub siab ntshaw. Tiamsis phau Vajlugkub tsis qhia li ntawd. Vajtswv txuag peb lub koob, nws thiaj tsav tswvyim kom peb txawj tswj peb lub siab lub cev. (Khaulauxi 3:5) Yehauvas kuj pub peb muaj txij nkawm, xwv peb thiaj tsis ua txhaum rau peb lub cev. (1 Khaulee 7:8, 9) Yog sib yuav tas mam pw ua ke yus yuav kaj siab dua, vim yus tsis tu siab tias yus ua txhaum lossis txhawj tsam luag muab yus so taw av xwb.

⁸ Phau Vajlugkub cob qhia kom peb txhob muab txojkev pw ua niam txiv siv ywj siab xwv peb thiaj tsis ntsib teeb meem. Kev pw ua niam txiv yog ib txojkev tshwj cia rau tej txij nkawm kom ib leeg txaus siab rau ib leeg. (Paj Lug 5:18, 19) Txawm tej txij nkawm los yuav tsum nco ntsoov nqe Vajlugkub no: “Cia txhua tus paub tswj nej lub cev kom dawb huv kom luag thiaj saib taus, tsis yog ua raws li lub siab ntshaw kev phem kev qias yam li lwm haiv neeg uas tsis paub Vajtswv.”​—1 Thexalaunika 4:4, 5.

9. (1) Pib tiam 20 los, Yehauvas qhia kom nws cov tibneeg coj txawv li cas ntawm lub ntiajteb? (2) Ib Yauhas 2:15, 16 qhia tswvyim li cas rau peb? (3) Loos 1:24-27 qhia kom peb tsis txhob ua tej kev phem kev qias twg?

⁹ Pib tiam 20 los, cov uas qaug rau ntiajteb lub tswvyim “yeej tsis paub txaj muag” li tiag! (Efexau 4:19) Txawm li ntawd los, Yehauvas cov tibneeg tsis qaug rau lub tswvyim dag ntawd. Lawv xav coj dawb huv raws li Yehauvas tej kevcai. Phau Tsom Faj Askiv lub 5 Hlis tim 15 xyoo 1926 thiaj qhia tias: “Txhua tus tsis hais pojniam txivneej, yuav tsum coj zoo thiab xav txog yam dawb huv xwb. Yuav tsum hajyam ceev faj thaum ib tug txivneej nrog ib tug pojniam ua ke.” Txawm tias lub qab ntuj phem zuj zus los, Yehauvas cov tibneeg coj raws li lub tswvyim hauv phau Vajlugkub. (Nyeem 1 Yauhas 2:15, 16.) Zoo kawg li uas muaj Vajtswv Txojlus! Yehauvas tau npaj tej zaub mov ntawm sab kev ntseeg raws sijhawm los tsav tswvyim rau nws cov tibneeg. Txawm ntiajteb qhia kom ua kev plees kev yi los, peb tsis qaug rau lub tswvyim ntawd. *​—Nyeem Loos 1:24-27.

10, 11. Phau Vajlugkub ceeb toom tias tibneeg yuav coj li cas rau tiam kawg?

¹⁰ Phau Vajlugkub ceeb toom tias tiam kawg tibneeg yuav “xam pom lawv tus kheej xwb.” (2 Timaute 3:1, 2) Twb yog li ntawd, neeg feem coob thiaj txhawb kom yus muab yus tus kheej saib hlob. Ib phau ntawv tshawb fawb hais tias, lub caij 1970 tibneeg “sau ntaub ntawv ntau heev los qhia tias yus yuav kho lub neej li cas thiaj vam meej.” Muaj tej phau qhia tias txawm yus yuav coj thiab nyiam li cas los xij, tsis txhaum, cia li ua tab meeg tebchaws. Muaj dua ib phau cav hais tias: “Yeej tsis muaj ib tug yuav zoo nkauj zoo nraug cuag li koj! Tsim nyog koj hlub koj tus kheej.” Phau ntawd qhia kom hwm yus tus kheej ib yam li hwm vajtswv ntag, thiab qhia tias “koj yog tus rhawv kevcai rau koj coj xwb. Yog haum koj lawd ces tsis txhaum leejtwg.”

¹¹ Koj puas tau hnov dua lub tswvyim no? Xatas tau siv lub tswvyim no los ntxias Eva thiab. Nws hais rau Eva tias: “Neb yuav zoo ib yam li Vajtswv, yog paub qhov zoo qhov phem.” (Chiv Keeb 3:5) Yog tim lub tswvyim dag no coob tus thiaj tsab ntse ua luaj. Lawv tsis pub leejtwg hais lawv li. Txawm Vajtswv kiag los, lawv twb tsis pub. Lawv khav tias lawv muaj cai txiav txim seb yam twg zoo los phem. Lub tswvyim no kuj rhuav tau tej txij nkawm lub neej tawg tas.

12. Piav seb lub ntiajteb puas txhawb kom cov niam txiv sib hlub.

 ¹² Phau Vajlugkub qhia kom cov niam txiv ib leeg hwm ib leeg. Nkawd yuav tsum muab siab npuab ib leeg ib tug raws li nkawd tau cog tseg thaum txis tshoob. Phau Vajlugkub thiaj hais tias: “Vim li no tus txivneej thiaj ncaim ntawm nws niam nws txiv thiab nrog nws tus pojniam tsheej xeeb ua ke mas ob tug koom ua ib lub cev.” (Chiv Keeb 2:24) Tiamsis ntiajteb lub tswvyim qhia txawv deb heev. Lawv qhia kom nyias xam pom nyias tus kheej ua ntej. Ib phau ntawv ntsig txog kev sib nrauj hais tias, hauv tej lub tebchaws thaum ua tshoob ua kos, tus nkauj nyab nraug vauv cog lus tias nkawd yuav sib yuav mus txog hnub kawg. Tiamsis nimno ib txhia hloov tej lus ntawd lawm. Lawv tsuas cog lus tias, sib yuav mus txog thaum tsis sib hlub lawm xwb. Vim coob tus tsis cog lus ruaj khov li qub lawm, lub cuab lub yig thiaj tawg tas. Ntiajteb lub tswvyim ua rau neeg lub neej lwj siab ntsuav. Lub tswvyim ntawd ruam kawg li tiag.

13. Vim li cas Yehauvas ho ntxub cov uas khav theeb?

¹³ Phau Vajlugkub hais tias: “Txhua tus uas khav theeb mas [Yehauvas] ntxub kawg li.” (Paj Lug 16:5) Vim li cas Yehauvas ho ntxub cov uas khav theeb? Vim lawv xyaum Xatas tus cwj pwm khav theeb. Yexus twb yog tus uas Vajtswv txib kom tsim ib puas tsav los, Xatas tseem muaj cuab kav hais kom Yexus pe nws thiab! (Mathai 4:8, 9; Khaulauxi 1:15, 16, TMZ) Cov uas muab lawv tus kheej saib hlob li ntawd, Vajtswv suav tias ruam kawg li tiag.

14. Loos 12:3 qhia kom peb saib peb tus kheej zoo li cas?

¹⁴ Phau Vajlugkub qhia tias peb yuav tsum saib peb tus kheej rau nqe, thiab hlub peb tus kheej kom tsim nyog xwb. Yexus thiaj qhia tias: “Koj yuav tsum hlub kwvtij zej zog ib yam li koj hlub koj tus kheej.” (Mathai 19:19) Raws li nqe no, peb yuav tsum hlub peb tus kheej, peb thiaj txawj hlub luag lwm tus. Tiamsis phau Vajlugkub kuj tsis tau qhia kom peb muab peb tus kheej saib hlob dua luag. Phau Vajlugkub kom peb ua li no: “Tsis txhob ua siab hlob txeeb ua ib yam dabtsi rau yus lossis tsab ua loj tiamsis  yuav tsum txo hwjchim xam pom lwm tus zoo dua yus.”​—Filipi 2:3; nyeem Loos 12:3.

15. Vim li cas zoo rau peb xam pom lwm tus raws li phau Vajlugkub qhia?

¹⁵ Niaj hnub no, cov neeg uas luag qhuas tias muaj tswvyim txawj ntse thuam tej uas phau Vajlugkub tau hais. Lawv thuam tias yog yus ua li Vajlugkub hais es xam pom lwm tus zoo dua ces luag yuav caij tsuj yus xwb. Lawv thiaj qhia kom xam pom yus tus kheej ua ntej yus thiaj vam meej. Tiamsis lub tswvyim ntawd puas pab tau tibneeg lub neej tiag? Cov uas khav theeb li ntawd puas muaj kev zoo siab? Lawv tsev neeg puas sib haum xeeb? Lawv puas muaj tej phoojywg zoo uas hlub lawv tiag? Lawv puas nrog Vajtswv sib raug zoo? Muab luj seb lub tswvyim twg pab tau tibneeg lub neej dua, ntiajteb lub los yog Vajtswv lub tswvyim hauv phau Vajlugkub?

16, 17. Vim li cas tsim nyog peb ua Vajtswv tsaug?

¹⁶ Yog tias koj tabtom nrhiav kev mus ib qho chaw twg, koj puas yuav nug ib tug neeg uas poob zoo lawd? Koj yeej tsis nug ib zaug li. Yog peb nug tswvyim ntawm cov neeg txawj ntse hauv lub qab ntuj ces zoo ib yam li ntawd. Nyob rau Yexus tiam, cov neeg uas khav tias lawv muaj tswvyim zoo tib yam thiab. Yexus thiaj hais tias: “Lawv yog cov dig muag coj dig muag kev. Yog tus dig muag coj tus dig muag kev mas ob leeg yeej yuav poob rau hauv qhov.” (Mathai 15:14) Vajtswv thiaj hais tias ntiajteb lub tswvyim ruam kawg li tiag.

¹⁷ Lub tswvyim hauv phau Vajlugkub ib txwm pab tau tibneeg. “Siv tau qhuab qhia, qhuab ntuas, qhia tus uas txhaum rov ua zoo, thiab cob qhia ua ncaj ua ncees.” (2 Timaute 3:16) Tsim nyog peb ua Yehauvas tsaug! Twb yog Yehauvas siv nws lub koom haum los cob qhia peb kom txhob qaug rau ntiajteb lub tswvyim dag! (Efexau 4:14) Tej zaub mov ntawm sab kev ntseeg uas Yehauvas pub rau peb pab kom peb ua neeg ncaj ncees raws li phau Vajlugkub qhia. Peb yeej tso siab tau rau lub tswvyim hauv phau Vajlugkub. Zoo siab kawg li uas peb muaj lub tswvyim ntawd los coj peb txoj hau kev.